Read Hadiyya Hizqi'eel Kitaaba 5 Bible Online

Hizqi'eel Kitaaba 5 - Hadiyya bible

Hizqi'eel Kitaaba 5

¹Waa'i «Manchi beeto, qare'aalli bisa'inne kiikka haareeddaa horooree hogoossaqqe; ee hogoossitti horoo'l saraatam keennaanchonne keentaa sas beyyonne baxxanse.

²Beero'oom kibbamaa lasage ee saraaxxi saxxi suume beero'i kaarta'a baxxitti xuub lambe'enne shokkiise; saxxi suume odim muransitaa beero'i kaarta'i baxamu xuub kululleetanne disse. Gatu saxxi suume odim hafachchanne binnaa'e; anim eekeeno bisa'inne hollansoommo.

³Beero'i kululleetanne bisa'inne muranse; odim eehanniinsi hofqax horoo'l saraatam ki eddechchi ludonne gudde.

⁴Eehanniinsim odim hofqaxam qoncitaa giiranne eddaa shokkoo'isa isse; eehanniinsi ki'oo giirim Isra'ee'l minaadaphphi beyyi hundam afookko» yukko.

⁵Moollanni Waa'i «Oono'o, Yerusaaleema moo'e! Mulli uulli hundim ixxi kululleetanne ihaa minaadaphphi lambe'enne ihoo'isa issaammo.

⁶Ihukkaarem Yerusaaleem i seeraa heechchi qaanqaa gindimminne mulli minaadabiinsi loboka joraakkoohan ihukkisaa ixxi kululleetanne yoo uulli hundiinsim sabichchi ihukkisaa moo'isaakko. Yerusaaleem i seeraa heechchi qaanqaa gadaakko; iinam ijaajancha sabaakko» yoolla.

⁷Ee bikkina Moollanni Waa'i «Yerusaalee'm manna! Ki'nnuwwi kululleetanne yo'i minaadabiinsi loboka adabi'llakko'ookko. I seeraa ijaajoo egettakko'oyyo. Ki'nnuwwi olla'anne yoo minaadaphphi heechchi qaanqannem hee'llakko'oyyo.

⁸Ee mashka'inne an Moollanni Waa'i keesenne Yerusaaleemanne quunqinne ki'aammoohan ihummisa kuroommo. Minaadab hundim moo'ukkuuyyi keese guzumo'oommo.

⁹Ki haashaaranchi mashka'inne hundinnem kanniinsi illageen issumbee'isaa ka lasagem issoombee'isaa keese guzumo'oommo.

¹⁰Ee bikkina Yerusaaleemanne yo'i anno'ii amo'ii hanqo'isam ixxuwwi ooso ittamo. Oosim ixxuwwi anno'oo amo'oo ittamo. Ee'isinne an ki'nnuwwa hundam guzumo'oommo. Eehanniinsi gatu qaxam soorem qarannem binnaa'oommo.

¹¹«Hanqinam an hee'oommi Waa'i wocoommok kane. Jollii haashaaranchii wo'mmaakkoo luwwi hundam issimminne iikka Keesammi Mine haashaassitakko'i bikkina anim ki'nnuwwa qishixxoo'n sholliisoommo.

¹²Ki'n minaadabiinsi saxxi suum sibaarinnee jabbinnee beeddookko. Saxxi suum beero'iinsi tochchonne bisa'inne lehookko. Mulli saxxi suume odim soorem qarannem hafachchinne binnoo'isa issaa lasaanchonne odim bisa'inne hollansoommo.

¹³Ee lasage i quunqi siggookko. Ixxuwwanne dillu boobanim daba'llookko. Malaayyaam i quunqam ixxuwwanne dilliisaa xeebo mu'lloommo. Ka i quunqam ixxuwwanne dilliisoommi ammane an Waa'i to'achchimminne wocummisa laqqamo.

¹⁴Ee'isam ki'nnuwwika uulla udma'aa ki'nnuwwi hegeegonne hee'oo minaadabina osachchi beyyoo issoommo. Kakam issoommok googinne higoo manni hundim moo'ukkuuyyatte.

¹⁵Malaayyaam quunqinne ki'nnuwwa guzumo'oommi ammane ki'nnuwwi hegeegonne hee'llam minaadabina osachchinaa qaqqaxxanchinaa, baddimminaa muggimminaa mashka'i ikkakkamo. Eekka wocummi Waa'i anette.

¹⁶Shoo manchi xiyyisa ihaakkoo sibaaro ki'nnuwwanne eeboommok ki'nnuwwa bi'isoo'isinatte. Edaa edaa sibaaro ki'nnuwwanne eeboommo. Hurbaatam siiddakkambee'isa issoommo.

¹⁷Sibaaroo haqqo'l moochchaa ki'nnuwwanne fatakoommo. Oo keenim ki'nnuwwi ooso shitamo. Or, boobanii lehii ki'nnuwwanne lophphoo'isa issummo. An Waa'i kaka wocaammo» yukko.