Read Hadiyya Hizqi'eel Kitaaba 6 Bible Online

Hizqi'eel Kitaaba 6 - Hadiyya bible

Hizqi'eel Kitaaba 6

²«Manchi beeto! Isra'ee'l duunnuwwi kolli daba'llitaa ixxuwwanne hiraage.

³Isra'ee'l duunnuwwi Moollanni Waa'ika sagara macceessona kure. An Moollanni Waa'i wocoommoka duunnuwwi, hoffi duunnuwwii baallaam cebbuwwii hundim macceessona. Duunnuwwanne yoo otossitakkam beyyuwwa hundam bi'isoo bisa'a asse'oommo.

⁴Kiti'm beyyuwwi hundim gindamookko. Aduruusa hincaa'akkam luwwi hundim iiqamookko. Shakko'i manni hundim ixxuwwi waa'uwwi illagennem uunjantamo.

⁵Isra'ee'l oosik leesh qophpha'n waa'uwwi illagennem uboo'isa issoommo. Ixxuwwi miqem kitima hincaa'llam beyyuwwi kululleetanne binnaa'oommo.

⁶Ki'nnuwwi hee'llakkam beero'uwwi hundim udma'i ihookko. Otossitam beyyuwwim gindamookko. Kitima hincaa'llakkam beyyuwwim gindamaa udma'i ihookko. Ki'nnuwwi waa'uwwim iiqamaa ubookko. Aduruusa wiriissakkam mu'utim iiqamookko; baxxakko'i luwwi hundim bi'ookko.

⁷Shakko'i manni ki'nnuwwi hegeegonne ubookko. Ee lasage ki'nnuwwi an Waa'a ihummisa laqqakkamo.

⁸Ihukkaarem ki'nnuwwiinsi hofqaxim oriinsi gattakkamisaa mulli minaadaphphi lambe'enne binnitakka'a hee'llakkamisaa issoommo.

⁹Lehiinsi gattakko'i keen ki'nnuwwa qeefadaa massu minaadaphphi lambe'enne eese tiittakkamo. Eese sawwitakkamokim iinniinsi qee'llaakkoo boqqi wodaninnee saa'aanchi qophpha'n waa'uwwina otossimminne eese kichche'issakko'i bikkinattee. Ki'nnuwwaanninne haashaarammi baxinne baxxakko'i jor luwwina ki'nnuwwi gaga shigigitakkamo.

¹⁰An Waa'i ihummisa, ixxuwwanne bichcha eeboomman ihukkisaa qoxxisaa kurummi woshshi hundim awwaad bee'i kora'i sha'llancha ihubee'isaa laqqamo» yukko.

¹¹Moollanni Waa'i «Isra'ee'l minaadab baxxo'i jolliinsii haashaaranchiinsii ki'aa or, qaanne'ii boobanii ixxuwwanne ihoo bikkina anga aphphissittuuyyi, lokkinne uulla kade'llittuuyyii ‹aayye!› yittuuyyii laare!

¹²Qee'llonne yo'i keen xissita'a letamo. Abbisonne yo'i keenim oranne letamo. Eehanniinsi gatto'i keenim sibaarinne beedditamo. Ee'isinne malaayyaam i quunqa ixxuwwanne issoommo.

¹³Qophpha'n waa'uwwaannonnee kiti'm beyyuwwi kululleetannee, hoffi duunnuwwannee lob duunnuwwi ludonnee, ee'isam haqqi lugumonnee lob qilxo'i lugumonnee ixxuwwi qophpha'n waa'uwwina er enji yoo luwwa wiriissitakko'i beyyuwwi hundannee ixxuwwik leesh ubookko. Ee ammane manni hundim an Waa'a ihummisa la'ookko.

¹⁴Hanqo'isam i anga biddiqaa'aa ixxuwwika uulla bi'isoommo. Woroo'n qaranne yoo udma'i uulliinsi ki'isaa hanaa'n qaranne yoo Riibil beero'i afeebe'e udma'i uulli issoommo. Isra'ee'l minaadab hee'oo beyyi hundam matim gatoobee'isa bi'isoommo. Ee ammane an Waa'i ihummisa manni hundim la'ookko» yukko.