Read Hadiyya Hizqi'eel Kitaaba 7 Bible Online

Hizqi'eel Kitaaba 7 - Hadiyya bible

Hizqi'eel Kitaaba 7

²«Manchi beeto, An Moollanni Waa'i Isra'ee'l minaadabina ‹Hundem kollinnem ki'nnuwwi uullik lasaanchi bichchi afaakko.

³«Isra'ee'l minaadaba, kaba ki'nnuwwina bi'llakkam amman afaakko. I quunqa ki'nnuwwanne dilliisoommo; ki'nnuwwi baxisam oogatoommo; ki'nnuwwi haashaaranchi bikkinam guzumo'oommo.

⁴Hore'em an ki'nnuwwina qishixxoommoyyoo haafoommoyyoo. Haashaarantakko'i bikkina an ki'nnuwwa taakkisannem guzumo'oommo. Ee ammane an Waa'a ihummisa laqqakkamo yoolla› yihe» yukko.

⁵Moollanni Waa'i «Ki'nnuwwannne hawwonne exxaa hawwi waarookko.

⁶Lasaanchi waaraakko; lasaanchi afaakko; ki'nnuwwanne ki'aakko; oono'o, waaraakko.

⁷Ka uullanne hee'llakkam manni hundinam ki'nnuwwina bichchi amman afaakko; amman afaakko; ballim hincaakko. Oohim hambalaachchanchi balla bagaan duunnuwwanne firakka'a daabbarakkam ballayyo.

⁸Kaba an abbis ammanenne i quunqaa bala'aa ki'nnuwwanne dilliisoommo; ki'nnuwwi baxisinnem ki'nnuwwanne oogatoommo; ki'nnuwwi shigigaa'oo bax mashka'innem ki'nnuwwa guzumo'oommo.

⁹An hore'em ki'nnuwwina qishixxoommoyyoo haafoommoyyoo; haashaaranchanne yoontakke'i bikkina ki'nnuwwi baxisinnem guzumo'oommo; ee ammane ki'nnuwwa guzumo'oommi Waa'i anetti ihummisa laqqakkamo» yoolla.

¹⁰Oono'o, bichchi balli Isra'ee'l minaadabanne waareena hincaakko; damig, boqqoomii bolximmii lophphaakko.

¹¹Boqqoomiinsi ki'ukkok jor bax lophphaakko; ixxuwwiinsi mat manchim gatooyyo. Ixxuwwina yoo goddiinsii amaxxiinsi mat luwwim gatooyyo.

¹²Oono'o, amman afaakko; ballim hincaakko; i quunqi hundannem waaroo bikkina bitaa'oo manchi liiramoone; biteesoohim kichche'oone.

¹³Biteesaanchii bitaa'aanchii foorinne hee'llu'uuyyim biteesaanchi biteesu mu'uta dabaraa siideena xanoobee'isam hiraagoom wocamukkok hundi bikkinattem ihu bikkina ihoo'n gatooyyo. Hundim baaxiilo baxxo'i bikkina matim gattamoyyo.

¹⁴Xurumbi fugamookko; hundem luwwim gudookko; ihukkaarem Waa'ik quunqi mannanne hundannem dilloo bikkina ayyi manchim orina marooyyo.

¹⁵Biiranne or, min hundannem jabbii sibaarii yookko. Beero'iinsi tochchonne hee'ookkok hundim oranne lehookko. Beero'onne yookkokim jabbinnee sibaarinnee beeddookko.

¹⁶Cebbanne hee'llam handare'i ixxuwwi gaga gatixxiteena duunanne fittamisam lehiinsi gatto'i keenim duunanne ikka'a ixxuwwi baaxii'l bikkina kichche'lla'a wi'llitamo.

¹⁷Angi hundim hoogookko; malaayyi hundim wo'i ihookko.

¹⁸Kichchechchi eddechcha edde'llamo; muggitamo; tuuttamo; ixxuwwi horoorem hogoossaqqitamo.

¹⁹Ixxuwwika kin bira goog hundannem uunjitamo. Ixxuwwi worqim haashaarammi luwwisa ihookko; oo birii worqii Waa'i quunqi ayyaamonne gatisooyyo; sibaarom hoorooyyo; te'im godabo wonshooyyo; baaxiilonne ubbakkamisina mashka'i ihukkok ee keeno.

²⁰Bakke'llam hee'llo'i mishisoo wereeggi mu'utiinsi shigigaa'oo qophpha'n waa'uwwa baxxo'o; ee bikkina ee wereeggi mu'uttuwwa ixxuwwi beyyonnem haashaaramoo'isa issoommo.

²¹Waa'im «Ki'nnuwwika wereeggi mu'uta allaggi qeefadona, uulli baaxiilaammuwwim boggona higisaa uwwoommo. Ixxuwwim haashaassitamo.

²²Fanguwwi i Keesammi Minenne aagga'a haashaassitamo. Haashaassitu'uuyyim ixxuwwa hooroommoyyo.

²³Isra'ee'l uulli manna shimminne, beero'oomim boqqoominne wo'mmu bikkina chimchima gudise.

²⁴Boqqi minaadaba woraa ki'nnuwwi minneewwa lago aa'llamisa issoommo; malaayyaammuwwika bolxooma bi'isoommo; ki'nnuwwi keesammi beyyuwwam haashaassitamo.

²⁵U'n waaroo ammane xumma hassakkamo; ihukkaarem siiddakkamoyyo.

²⁶Boobananne booban exxookko; mat woshsham mulli woshshi awwonaa waarookko. Hiraagaan mo'llo'i kaalta ki'nnuwwina kuttamisina uunxitakkamo; qeessuwwi minaadabina losissam seera, lommannim soggam woshsha hooggamo.

²⁷Adil wi'llookko; gassaanchim neeyyato murookko; minaadab baachchinne huxe'ookko; ki'nnuwwi baxisannem guzumo'oommo. Mulli mannanne oogattakko'aannisanne anim oogatoommo; eehanninnem Waa'i anette ihummisa laqqakkamo» yoolla.