Read Hadiyya Hizqi'eel Kitaaba 8 Bible Online

Hizqi'eel Kitaaba 8 - Hadiyya bible

Hizqi'eel Kitaaba 8

¹Qeefadammummi loh hiinchaannonne, loh agan aagu onti ballannee Yihuxxi uulliinsi qeefadanto'i minaadaphphi awwonsaan i minenne iinninne maqirem afuutta'a yo'aannonne, Moollanni Waa'ik malaayyi dangonnem eesenne dillukko.

²Iim moo'ummi ammanenne ixxek hagar gii'l laba'nnisa caakkisoo manchi kobi'lla moo'ummo. Oo manchi laboohim lamadii aad giira, lamadii iim odim belecce'oo naas xaa'llis hee'ukko.

³Ixxim anga laboo luwwa i kollonne biddiqaa'aa i horoo'l saraata amadukko. Waa'ik Ayyaan eese iim uulli lambe'ennee iima'n lambe'ennee ki'isaa Waa'i kaaltanne Yerusaaleema massukko. Hanaa'n qarinne woro'l wixxixxi beyyo aagakkam ooxxi goocinne higisaa Waa'i to'achchoo'isa issoo qophpha'n waa'i misil yoo beyyo afisukko.

⁴Ee beyyonnem Isra'ee'l Waa'ik lombi hee'ukko. Oohim Keebaar daajji gadanonne moo'ummaanni'nnoo'i kaalti hee'ukko.

⁵Waa'im «Manchi beeto, hanaa'n qarinne yoo kollo moo'e» yukko. Eekka moo'ummi ammanennem ee ooxxi gooc illaginne yoo kiti'm beyyi gadanonne Waa'i to'achchoo'isa issoo misil hee'ukko.

⁶Waa'i odim iina «Manchi beeto, ka issamoo luwwa moo'llaahinnihe? Isra'ee'l minaadab ka keesammi beyyonne baxxam shigigaa'oo luwwa moo'e; ixxuwwi ka jor baxinne eese ka keesammi beyyiinsi qee'lloommisa issito'ookko. Kanniinsim lophphoo mulli shigigaa'oo luwwa odim moo'llootto» yukko.

⁷Ixxim eese biiree'n kollinne hee'oo wixxixxi beyyo aagakkam gooc kolli massukko. Anim ee beyyonne kininne ootamaakkoo ootanne mat afo'o moo'ummo.

⁸Waa'im iina «Manchi beeto, ka ootanne afo'o fisse» yukko. Anim fissaa lasage mat gooca moo'ummo.

⁹Ixxim «Woronne aaggaa ee beyyonne baxakkam shigigaa'oo jor luwwa moo'e» yukko.

¹⁰Anim ee woronne aagaa gorte'enne hundannem biqinne shuroo qooccanchuwwik, muccuroom bee'i moochchikii Isra'ee'l minaadaphphi qophpha'n waa'uwwikii misil kitaabamaakkoo moo'ummo.

¹¹Shaafaan beet Azaaniyii Isra'ee'l awwonsaa'nnek lamarayyii ee beyyonne uullita'a hee'llo'o. Annannichchim aduruusa wiriissakkam mu'uta amadda'a hee'llo'o. Ee mu'utiinsim erisa enje'oo aduruus wiriir firam hee'ukko.

¹²Waa'im iina «Isra'ee'l awwonsaan ixxuwwi gaqqi qophpha'n waa'uwwi minenne tuunsonne aagga'a ‹Waa'i neese moo'ooyyo! Ni uullam uraakko› yitu'uuyyi issitam luwwa moo'lloollannihe?» yukko.

¹³Odim ixxi iina «Kanniinsim lophphoo shigigaa'oo luwwa issitu'uuyyi moo'llootto» yukko.

¹⁴Ee lasage hanaa'n qarinne Keesammi Mine aagakkam ooxxi gooc kolli massukko. Ee beyyonnem Tamuuza yakkam qophpha'n waa'ina meenti wi'llookkoka moo'isukko.

¹⁵Ixxim «Manchi beeto, kaka moo'llaahinnihe? Kanniinsi lophphoo shigigaa'oo luwwam moo'llootto» yukko.

¹⁶Odim Waa'i Mi'n woronne yoo wixxixxi beyyo eese massukko. Ee beyyonnem Keesammi Mine aagakkam gooc gadanonne kitima hincaa'akkam beyyinaa daba'llamakkam beyyinaa lambe'enne lamiyyee ontoo ihoo qax manni hee'ukko. Ixxuwwim afaree Waa'i mi'n kolli illee eelliinchi firoo kollonne daba'llita'a guruphphita'a eelliinchina otossitam hee'llo'o.

¹⁷Waa'im iina «Manchi beeto, kaka moo'llaahinnihe? Ku Yihuxxi manni ka beyyonne moo'llitti shigigaa'oo luwwi hundam baximminnee uullanne boqqoom lophphoo'isa issimminnee eese quuqissamuulla. Ee'isinne eese hinkid game'llitoda'ee quuqissoda'ee moo'e!

¹⁸Ee bikkina an ixxuwwanne iikka quunqa dilliisoommo. Ixxuwwinam qishixxoommoyyoo haafoommoyyoo; ixxuwwi laachcham macceesoommoyyo» yukko.