Read Hadiyya Hizqi'eel Kitaaba 9 Bible Online

Hizqi'eel Kitaaba 9 - Hadiyya bible

Hizqi'eel Kitaaba 9

¹Ee lasage Waa'i «Ka beero'o bi'issakkeena doo'llantakko'i keen o'l mu'uta amaddakka'a hinci'llehe!» yaa sagara iimaa'aa wocukkuuyyi macceesummo.

²O'l mu'uta amaddo'oo loh manchi hanaa'n qarinne yoo goocinne waatto'o. Ixxuwwiinsim mat talbiinsi dadamaakkoo wereeggi eddechcha edde'aa kitaabakkam mu'uta amadakkam gonoona midaadonne amadaa hee'ukko. Ixxuwwim aagga'a naas xaarinne baxamu kiti'm beyyi gadanonne uullito'o.

³Ee lasage Isra'ee'l Waa'ik lombi kiruubeelluwwiinsi hanaan yoo beyyiinsi ki'aa Keesammi Minenne awwaadina uullakkam beyyo marukko. Waa'im ee talbiinsi dadamaakkoo wereeggi eddechcha edde'aa kitaabakkam mu'uta amadakkam gonoona midaadonne amadaa hee'u mancho weeshaa

⁴«Yerusaalee'm beero'o mattaa ee beero'onne baxamu shigigaa'oo jolli bikkina kichche'lla'a wi'llitam manni miinenne mare'e isse!» yukko.

⁵Odim Waa'i gatto'i keenina «Ki'nnuwwim ixxo awwontakka'a mallehe; ayyenam qishixxitakkoo'n hundam shi'llehe.

⁶Lommanna, woraada, ciilluwwaa meentoo hundam shi'llehe. Ihukkaarem miinenne mare'i yoo mancho ayyem nakkitakkotte. Eeham ka i miniinsi asheellehe» yaa wocukkuuyyi macceesummo. Ee bikkina ee beyyonne Keesammi Minenne uullito'i awwonsaaniinsi ki'isaa shimma asheetto'o.

⁷Waa'i odim ee keenina «Mallehe, Keesammi Mine haashaassehe! Wixxixxi beyyuwwannem leesh wo'mmaakkoohan issehe!» yukko. Ixxuwwim fitta'a ee beero'onne yoo manna shito'o.

⁸Shitu'uuyyim an mullam gataa miininne uullanne aad heeshaa «Moollanni Waa'a! Aayye! Isra'ee'lleka baraara guulliteebe'i afeebe'e Yerusaaleemanne kaa'nna quuqqoohonnihe?» yaa laarummo.

⁹Waa'im iina «Isra'ee'llekii Yihuxxekii minaadab kee'mmaalli baaxiilo baxxo'ookko. Uulloomannem lobakat xiiga dunto'ookko. Beero'oomim hantaarinne wo'mmaakko. ‹Waa'i ni uulla uraakko; neesem moo'ooyyo› yitamuulla.

¹⁰Ee bikkina an ixxuwwina qishixxaa haafoommoyyo. Ixxuwwi baxxo'i baxo hundam anim ixxuwwanne dabaraa issoommo» yukko.

¹¹Ee lasage talbinne dadamu wereeggi eddechcha edde'aa kitaabakkam mu'uta dissakkam gonoona midaadonne amadu manchi daba'llaa waaraa Waa'ina «Eese ijaajjittoka hundam an issaa guullaammo» yukko.