Read Hadiyya Daani'eel Kitaaba 1 Bible Online

Daani'eel Kitaaba 1 - Hadiyya bible

Daani'eel Kitaaba 1

¹Iyyoo'aaqeem Yihuxxi adil ihu saxxi hiinchonne Baabiloo'n uulli adil Nabukadanaxoor Yerusaalee'm beero'o waaraa kibbukko.

²Waa'im Yihuxxi adila lyyoo'aaqeemaa Keesammi Mi'n mu'uxxeka kolloo Nabukadanaxoorna higisaa uwwukko; Nabukadanaxoorim ee mu'uta Baabiloonanne hee'oo ixxi waa'uwwi mine massaa mu'uxxi minenne dissukko.

³Ee lasage adil Nabukadanaxoor Isra'eeliinsi qeefadanto'i keeniinsi adilluwwi abaroosaa gassaa'n shumo'oo ikko'i harde'i oosiinsi hofqaxam doo'llaa eebona ixxi mi'n gassaanina ijaajaanchi ihu Ashifaanaaza ijaajukko.

⁴Doo'llantam oosim adilla'n minenne awwaaddeena xantamisina dan, qooroomii lachchii yoo keen ikka'a luwwi hundam qaqqissa'a qoossitam miiqakkam luwwi bee'i keen ihimmi hasisookko. Baabiloo'n uulli suumee losanom losisoo'isina ijaajukko.

⁵Adilim hurbaataa woyi'n diqaasaa ixxi maaddiinsi ittu'uuyyii aggu'uuyyii sas hiinchi afeebe'e lossa'a lasage ixxi adilla'n minenne baxo asheettamisina qoodukko.

⁶Ee doo'llanto'i keeninne maqirem Yihuxxi sulliinsi Daani'eel, Hanaaniy, Miisaa'eelii Azaariyii hee'llo'o.

⁷Adi'l mi'n baxaa'n ijaajaanchim ixxuwwika summa dabaraa Daani'eelika Bilxaasoora, Hanaaniyika Sidiraaqa, Miisaa'eelika Miisaaqa, Azaaryikam Abdinaagoo yaa fissukko.

⁸Ihukkaarem Daani'eel adi'l mi'n hurbaata itimminnee woyi'n diqaasa agimminnee ixxi gag haashaaramoobee'isina ixxi tiironne qoodukko. Adi'l mi'n gassaa'n ijaajaanchim ee sawwitenne iittamona uunxukko.

⁹Waa'im Daani'eelina ee ijaajaanchi illagenne nuura uwwaa ixxena qishixxoo'isa issukko.

¹⁰Ihukkaarem adi'l mi'n gassaa'n ijaajaanchi Daani'eelina «Ittakkam hurbaataa aggakkam aggaa ki'nnuwwina ijaajukkok adil gagame; ki'nnuwwi darabiinsi naccakka'a i moollanni adil moo'ulas eese shoo bikkina baddoommo» yukko.

¹¹Ee lasage Daani'eel adi'l mi'n gassaa'n ijaajaanchi Daani'eela, Hanaaniya, Miisaa'eelaa Azaariyaa egeroo'isa issu manchina

¹²«Niina ki awwaadaanina xale'i wix hurbaataa wo'oo uwwitaa tommi ayyaamina keentaa moo'e.

¹³Ee tommi ayyaamiinsi lasage neesee ee adi'l hurbaata ittam keenoo moo'e; moo'llittisinne hundinnem neesenne ki awwaadaanonne iittitti luwwi hundam isse» yukko.

¹⁴Ee ixxuwwi yito'isanne iittamaatem tommi ayyaam afeebe'e keenukko.

¹⁵Tommi ayyaamiinsi lasonne adi'l hurbaata itto'i keeniinsi hundiinsim loboka ixxuwwi danto'ookkokaa geejjito'ookkokaa moo'ukko.

¹⁶Ixxuwwi egeraanchim adi'l hurbaataa aggamisina ijaajamu woyi'n diqaasaa uraa wix hurbaata uwwukko.

¹⁷Waa'i ka soorem oosinam losanonnee kitaabannee hundannem lachchaa qoossimmaa uwwukko; Daani'eelim kaaltannee haqaawwo tirimmannee hundannem lachchi yoohan hee'ukko.

¹⁸Adil qoodu sasem hiinchim beeddaa lasonne Ashifaanaaz ee woraadduwwa hundam woraa adil Nabukadanaxoor illagenne hincaa'ukko.

¹⁹Adilim hundam atoorassu ammanenne Daani'eelinne, Hanaaniyinne, Miisaa'eelinnee Azaariyinnee akeekamookkok hee'ukkoyyo. Ee bikkina ixxuwwi adilina awwaaddeena doo'llanto'o.

²⁰Adil lachchi bikkinaa qooroo'm bikkinaa xa'mmu xa'mmichchi hundannem ixxi gassi uullanne yo'i kiiraaniinsii gennaaniinsii hundiinsim ixxuwwi tommi suume lophphito'o.

²¹Daani'eelim adil Qiiroos adil ihu luxxi hiinchi afeebe'e adilla'n minenne awwaadam hee'ukko.