Read Hadiyya Daani'eel Kitaaba 11 Bible Online

Daani'eel Kitaaba 11 - Hadiyya bible

Daani'eel Kitaaba 11

¹«Anim Meedoo'n shumo'iinsetti ihu Daariyoos adilla'n luxxi hiinchonne ixxena hara'mmeenaa ixxo qoxxiseenaa gadanone uullaa hee'ummo.

²«An kabadem kiina kuroommi woshshi hanqo'ane. Mulli sas adilluwwi Faariis uullanne adilluwwi ikkamo; ee sasiinsim lasonne ki'oo soo'l adil mulli keeniinsi hundiinsim amaxxanne lophphaakkoohan ihookko. Amaxxinne ixxi malaayyaam ihoo ammane mulli keeno mat issaa Giriik adillanonne ki'ookko.

³Ee lasage malaayyaam adil ki'ookko; ixxi adillanim la'amaakkoohan ihookko; hasu luwwi hundam issookko.

⁴Ihukkaarem malaayyinne la'amukkuuyyi maraa lasage ixxi adillan gindamaa soorem qarannem baxxansamookko; adillanim hooramaa mulli keenina uwwamoo bikkina ixxi shumo'ina od uwwamooyyo. Ihona bagaan ixxuwwiinsi matim ixxesa malaayyaam ikkamoyyo; oohim oo adillan gindamaa mulli keenina baxxansamoo bikkinatte.

⁵«Woroo'n qa'l adil lobakata malaayyaam ihookko; ihukkaarem ixxi gaaxxi awwonsaaniinsi mat ixxeensi loboka malaayyaam ihookko; ixxi gassim la'amaakkoohan ihookko.

⁶Hofqax hiinchiinsi lasage oo adil hanaa'n qa'l adilinne hide'amaa mateeyyooma qooccookko; ixxi landichchom ee adilina ladiisookko; ihukkaarem iseka malaayye qoxxisseena xantambee'i bikkina ixxekim malaayyi qoxxeena xanooyyo; ee ayyaammuwwanne isee isena hara'mmitam keenoo, is annaa is awwaadaanoo higisakka'a uwwakkamo.

⁷«Ihukkaarem is abaroosiinsi mat ise bikkaa adil ihookko; hanaa'n qa'l adi'llekam girba iiqaa aagookko; ee adi'l gogotinnem oramookko. Ixxuwwinnem oramaa kaa'ookko.

⁸Ixxuwwi waa'uwwa, xaarinne baxamu misilluwwaa kin birinnee worqinnee baxamu lombi mu'uttuwwaa qeefadaa Gibxa massookko. Hofqax hiinchuwwinam hanaa'n qa'l adilinne oramooyyo.

⁹Ee lasage hanaa'n qa'l adil woroo'n qa'l adilinne orameena waarookko; ihukkaarem waarukkisinnem laso daba'llaa elle'ookko.

¹⁰«Ixxi goo'n oosim lobakat gogota wixxaa'lla'a orina gudamo; diina'i girbi afeebe'e maraa oramoo uullisakkeena xanakkambee'i dirisisam aanshoo kee'mmaalli gogota wixxaa'llamo.

¹¹Ee ammanenne woroo'n qa'l adil lobakata quuqaa hanaa'n qa'l adilinne orameena ki'ookko; hanaa'n qa'l adil lobakat gogota wixxaa'ukkaarem kaa'amookko.

¹²Woroo'n qa'l adil lobakat gogota qeefadu bikkina tobbe'ookko; lobakat kumam shookko; ihukkaarem kaachchoom ixxan ihukkisam qoxxaa hee'ooyyo.

¹³«Hanaa'n qa'l adil illagee'nnaanniinsi lophphoo mulli gogotam gudisookko; lobakat hiinchuwwiinsi lasage dut gogotinnee o'l mu'utinnee waarookko.

¹⁴Ee ammane dut keen woroo'n qa'l adilanne ki'llamo; ki minaadabiinsim lobakat keen ku kaalti wo'mmoo'isina bangujjitamo. Ihukkaarem ixxuwwi sawwito'isa ihooyyo.

¹⁵Ee lasage hanaa'n qa'l adil waaraa girbamaakkoo beero'o kibbaa amadookko; woroo'n qa'l googotim ixxenne uullixxameena xanooyyo; ee gogotiinsi doo'llanto'oo keenim ixxenne uullixxanteena xantam malaayyi hee'ooyyo.

¹⁶Oo weeraraa waaroohim ixxi tii'lleka issookko; ayyim ixxenne uullixxameena xanooyyo; mishisoo uullam malaayyinne ixxi anganne issookko.

¹⁷«Ixxi adilla'n malaayyinne hundinnem gaadeena qoodookko; adillano bi'iseena ixxi landichcho ladiisimminne woroo'n qa'l adilinne iittamookko. Ihukkaarem ixxi sawwixxek wo'mmooyyo te'im oo sawwit ixxena hara'mmooyyo.

¹⁸Ee lasage dambalaq gammalanne hee'oo uulluwwanne weeraraa lobakata amadookko; ihukkaarem mat gogoxxi awwonsaanchi kaa'oo bikkina ixxi bolxoomina lasaanchi ihookko. Bolxoominne wocu game'llat hundim ixxonnem ihookko.

¹⁹Ee lasage oo adil ixxi gaqqi uullanne yoo girbuwwi kollim daba'llookko; ihukkaarem qolamaa ubookko; od siidamooyyo.

²⁰«Ixxo beyyonne adil ihookkokim ixxi adilla'n lombe egessiiseena gibissiisookkoka asse'ookko; ihukkaarem hofqax ammanenne quunqinne te'im orinnetti ihoo'n ka'isam lehookko.

²¹«Ixxi beyyonnem mat gadamaakkoo manchi ki'ookko; ihukkaarem adilla'n lomba siidooyyo. Qaphphaa waaraa adillano qawwiishinne amadookko.

²²Ixxim dirisi'nnoo'i gogotaa hidi'l saga'l ijaajaanchoo bi'isookko.

²³Beshoommano qooccimminne mulli keeno qawwiisookko; hofqax minaadabinnetti ihukkaarem malaayyukkuuyyi marookko.

²⁴Amaxxinne la'amaakkoo xumminne hee'oo uulluwwa dangonne amadookko; ixxi anno'i te'im lob anno'i baxubee'i baxo baxookko. Oranne bogukkoka, qeefadu luwwaa amaxxaa hundam ixxi gogotina baxxansookko; girbuwwam bi'iseena sawwookko; ihukkaarem hofqax ammaninatte.

²⁵«Lobakat gogotinne woroo'n qa'l adilanne malaayyinne ki'ookko; woroo'n qa'l adilim malaayyaamoo xigo dutaa ihu ixxi gogota amadaa oramookko. Ihukkaarem ixxonne dollotakkam bikkina uullixxameena xanooyyo.

²⁶Ixxenne maqire ittam ixxi beshim ixxo bi'issamo; ixxi gogotim beeddookko; dut keenim oranne beedditamo.

²⁷Ku lamem adilluwwim wodanonne jolle amaddo'isam matem leemaatiinsim itteena afuuttamo; ixxuwwina'i ixxuwwim qophphano woccamo; ihukkaarem qoodamu amman afubee'i bikkina ixxuwwi sawwixxek wo'mmooyyo.

²⁸Hanaa'n qa'l adil lobakat amaxxinne ixxi uullam daba'llookko; ihukkaarem ixxi sawwitenne keesammi hidi'l sagarinne uullixxamookko; ixxi doo'llikam issookko; ixxi gaqqi uullam daba'llookko.

²⁹«Qoodamaakkoo ammanenne woroo'n qara daba'llaa waarookko; ihukkaarem lasaqqek luxxaannisa ihooyyo.

³⁰Kiitii'm uulli manni markabinne waatta'a uullixxantam bikkina muggaa laso daba'llookko; keesammi hidi'l sagarannem quuqookko; ixxi doo'llikam issookko. Laso daba'llaahim keesammi hidi'l sagara laggo'i keenina beshichchi ihookko.

³¹«Ixxi gogotim Keesammi Minee girbaa haashaassookko; hundi ammane hincoo kitimim gatoo'isa issookko; ee beyyonnem bichchina mashka'i ihoo haashaarammi luwwa uullisookko.

³²Adilim hidi'l sagara gindito'i keeno qawwiisaa huushisookko; ihukkaarem Waa'a hanqo'isinne la'oo minaadab qoxxookko; ixxi woshsham sabookko.

³³«Minaadaphphi lambe'enne yo'i qoolluwwi dut keenina losano uwwitamo; ihukkaarem giirinne, bisa'inne, qeefadanchinnee boganchinnee hofqax ammaninam hawwitamo.

³⁴Oo hawwi afu ammane hofqax hara'mmatom siiddamo; dut keenim labishshinne ixxuwwinne mateeyyooma qooccitamo.

³⁵Ee qoolluwwiinsi mat mat qolantamo; oohim lasaanchi doolli afeebe'e keenantona, muccuttonaa miiqakkam luwwi bee'i keen ikkonatte. Oohim qoodamu amman afeeqaxinatte.

³⁶«Oo adil ixxena mishisu luwwi hundam issookko; ixxi gagam iimiimaa'ookko; waa'uwwiinsi hundiinsim ixxi gaga lonsookko. Hundam xanoo Waa'annem bolxoominne wocookko; Waa'ik quunqi amman afeebe'em ixxi sawwixxek wo'mmookko; oohim qoodamukkok ihimmi hasisoo bikkinatte.

³⁷Oo adil gaassi ixxi anno'i waa'uwwa te'im meenti iittoo waa'uwwa gadookko; ayyi waa'am gadoo bikkina ixxi gaga ee keeniinsi lonsaa iimiimaa'ookko.

³⁸Ee kee'n bikkenne girbuwwi waa'a lonsookko; gaassi ixxi anno'i laqqambee'i waa'a worqinne, birinne, inqu'innee bito xee'aal luwwinnee lonsookko.

³⁹Qoxxaalli girbuwwa allaggichchi waa'i hara'mmatinne gindookko; ixxena ijaajantam keenom lonsaa iimiimaa'ookko; minaadaphphi awwonsaanom issookko; baxxo'i baxikam anga dabareena uulla baxxansookko.

⁴⁰«Lasaanchi doollenne woroo'n qa'l adil hanaa'n qa'l adilinne oramookko; ihukkaarem hanaa'n qa'l adil faradaaninne, faraxxi gaare'innee dut markabinnee hambu'llamisa ihaa waarookko. Lobakat uullannem weerarookko; dirisisam aanshukkuuyyi ee uulluwwinne higookko.

⁴¹Mishisoo neeyyaxxi uullannem weerarookko; lobakat uulli minaadabim ixxi anganne ubookko. Ihukkaarem Edoo'mmek, Moo'aaphphekii Amoo'n minaadabii ixxi angiinsi gattamo.

⁴²Ixxi angam lobakat uulluwwanne biddiqaa'ookko; Gibximuullim xorooyyo.

⁴³Gibxika worqa, biraa bito xee'aalli luwwaa hundam bogookko; Liibi'ikii Tophphe'i minaadabii ixxena ijaajantamo.

⁴⁴Ihukkaarem eelliinchi firinnee hanaa'n qarinnee waaroo woshshi muggisookko; kee'mmaalli quunqinnem dut minaadaba guullaa bi'iseena ki'ookko.

⁴⁵Adilla'n dukkaanam dambalaqinaa mishisoo keesammi duuninaa lambe'enne kaasookko; ihukkaarem ixxena lasaanchi ihookko; hara'mmoohim hee'ooyyo.