Read Hadiyya Daani'eel Kitaaba 12 Bible Online

Daani'eel Kitaaba 12 - Hadiyya bible

Daani'eel Kitaaba 12

¹«Ee doollenne ki minaadaphphi bikkina uullixxamoo lob awwonsaanchi ihu Mika'eel ki'ookko; manni shumo'i qooccamukkaanniinsi ki'isaa moo'akka'a la'akkobee'i kee'mmaalli hawwi doolli ihookko. Ihukkaarem ee ammane summi Kitaabanne kitaabamu ki minaadab hundim gattamo.

²Lehaa waammamu keeniinsim dut ki'ookko; ee keeniinsi kolli heer heeraxxi heechchina, kolli odim sholle'nninaa heer heeraxxi hawwinaa ki'ookko.

³Qoolluwwi iima'n laaqqisa dut keeno muccuroo'm googonne dabattam keenim iima'n boollaankisa heer heerina belelitamo.

⁴«Ihukkaarem Daani'eela, doolli beeddichchi afeebe'e ka woshsha maaxe; kitaabam koobe. Manni ekkidii kidii geeramookko; lachchim lophphookko» yukko.

⁵Ee lasage mulli lam manchi daajji eeqidinnee ka'idinnee uullito'oo moo'ummo.

⁶Ee keeniinsim mat haarrinne baxamaakkoo eddechcha edde'aa daajji wo'iinsi hanaan yoohaannina «Ka maalalsiisoo luwwik lasaanchi hinka'i ammane?» yaa xa'mmukko.

⁷Haarrinne baxamaakkoo eddechcha edde'aa daajji wo'iinsi hanaan uullaa hee'u manchi ixxeka makki angaa qeddi angaa lamom iimaa'aa «Sas hiinchinaa kollinatte; Keesammi minaadaphphi hawwi beeddoo ammane ku hundim wo'mmookko» yaa heer heerina hee'oohaanninne hide'ukkuuyyi macceesummo.

⁸An macceesummo; ihukkaarem qoossummoyyo. Ee bikkina «I moollanna, ka hundikim lasaanchi maha?» yaa xa'mmummo.

⁹Ixxim iina dabaraa «Daani'eela, doolli beeddichchi afeebe'e ku woshshi maaxammaa koobammaa ihu bikkina mare.

¹⁰Dut keen keenantamo, muccuttamoo miiqakkam luwwi bee'i keenoo ikkamo; ihukkaarem boqquwwi keen boqqooma lonsito'uuyyi mattamo. Boqquwwi maham qoossitamoyyo; ihukkaarem qoolluwwi qoossitamo.

¹¹«Hundi ammanem hincoo kitim gatukkaanniinsii bichchina mashka'i ihoo haashaarammi luwwim uullukkaanniinsii ki'isaa mat kumaa lam xibbee honsayyi ballaa ihookko.

¹²Mat kumaa sas xibbee sadee onti ballaa afeebe'e iyyaqqoohim maasse'amaakkoohane.

¹³«Ihukkaarem at lasaanchi afeebe'e mare; at usheexxitootto; doolli lasaanchonnem kiina qoodamu sharada a'lliteena ki'llootto» yukko.