Read Hadiyya Daani'eel Kitaaba 2 Bible Online

Daani'eel Kitaaba 2 - Hadiyya bible

Daani'eel Kitaaba 2

¹Nabukadanaxoor adil ihu la'm hiinchonne haqaawwe'ukko; tiironnem lobakata u'nnamu bikkina diriireena xanukkoyyo.

²Ee bikkina haqaawwe'u haqaawwo kuttamisina kiiraano, falaano, gennaanoo qoolluwwi keenoo weeshakkamisina ijaajukko; weeshanto'i keenim waatta'a adi'l illagenne uullito'o.

³Adilim «An haqaawwo haqaawwe'aammo; haqaawwooma la'eembee'e i tiironne lobakata u'nnamaammo» yukko.

⁴Oo qoolluwwi keenim adilina Sooriy uullisinne «Adila, heer heerina adil ihe; ki haqaawwo niina ki awwaadaanina kure; neesem eehannika tirato kiina kulloommo» yita'a dabatto'o.

⁵Adilim dabaraa «Haqaawwoo haqaawwi tiratoo iina kuttakkobeelas an ki'nnuwwa muransoommo; ki'nnuwwi minneewwim gindamaa hacca uunjakkam beyyi ihookko.

⁶Ihukkaarem haqaawwoo tiratoo kuttakkolas irifo'o, an uwwoommi luwwaa lobakat lombaa a'llitakkamo; ee bikkina haqaawwoo tiratoo kullehe» yukko.

⁷Ixxuwwi odim dabatta'a «Adila, niina ki awwaadaanina at haqaawwe'llitti haqaawwo kure; tiratooma neese kulloommo» yito'o.

⁸Adilim dabaraa «An qoodummi qoodo'o laqqakko'i bikkina ammane higissakkeena hassakko'isa la'aammo.

⁹Haqaawwo kuttakkeena xantakkoobeelas hundim guzumo'antakkamo; i qoodo'i gatoo labissakka'a qophpha'nnekaa hantaa'l sagaraa gudissakko'ookko; ee bikkina haqaawwooma kullehe; tiratom kuttakkeena xantakkamisa la'oommo» yukko.

¹⁰Oo qoolluwwim «Adila, ka at xa'mmitoo luchcho kiina kureena xanoo manchi ka uullanne hore'em hee'ooyyo; mat adil hore'em la'amaakkoohanee malaayyaamoo ihuta'nnim kido'i woshsha haqaawwo tiraano, kiiraanoo gennaanoo xa'mmu balli bee'e.

¹¹Adi'l xa'mmichchi kee'mmaalli ihu bikkina manni lambe'enne hee'oobee'i waa'uwwiinsi bagaan adi'lleka kido'i xa'mmichcha dabareena xanookkok ayyim bee'e» yito'o.

¹²Ee bikkina adil lobakata quuqaa Baabiloonanne yo'i qoolluwwi keeno hundam shakkona ijaajukko.

¹³Ee bikkina lachchi manna shimmina ijaaj firukko; Daani'eelaa ixxi besham shakkeena hasakko'o.

¹⁴Ee ammane Daani'eel Baabiloo'n qoolluwwa sheena firu adi'l waardiyyuwwi ijaajaanchi ihu Ariyooka qooroominne qaphphaa atoorassukko.

¹⁵Ixxom «Adil kido'i kee'mmaalli ijaajo fissukkok mahinatte?» yaa xa'mmukko. Ariyookim Daani'eelina ee woshshooma caakkisaa kurukko.

¹⁶Daani'eelim adi'l illagenne hincaa haqaawwika tirato kuroo'isina amman uwwamona adila uunxukko.

¹⁷Ee ammanem Daani'eel ixxi mine maraa ee woshsha ixxi beshina Hanaaniyina, Misaa'eelinaa Azaariyinaa kurukko.

¹⁸Ixxuwwam Baabiloo'n uulli qoolluwwinne maqirem shakkambee'isa iima'n Waa'i qishixxoo'isinaa eehanni tiratom caakkisoo'isinaa uunxitona kurukko.

¹⁹Ee hiimom eehanni tirat Daani'eelina kaaltanne caakkukko; ee bikkina Daani'eel

²⁰«Qooroomii malaayyii ixxan ihu bikkina heer heerinam Waa'i summi galaxxamona.

²¹Doollee maaragee dabaransookko; adilluwwa adilla'n barcumanne afuussookko; odim adilla'n barcumiinsem dilliisookko; lachchi yoo keenina lachcha uwwookkok qoolluwwinam qoorooma uwwookkok ixxotte.

²²Waa'i xillanne maaxamu luwwa caakkisookko; ixxi beyyonne caakki hundi ammanem yoo bikkina tuunsonne yoo luwwam la'ookko.

²³Gaassi niyyanno'ina Waa'a, an keese galaxxoommo; lonsoommome. At qooroomaa malaayyee iina uwwitaatto; ni uunxatom macceessaa adi'lleka haqaawwo niina caakkissaatto» yaa iima'n Waa'a galaxxukko.

²⁴Ee lasage Daani'eel Baabiloo'n qoolluwwa shihona adil ijaajaa hee'u Ariyook beyyo maraa «Baabiloo'n qoolluwwa shititte; eese adi'l illagenne hincaa'e; anim ixxi haqaawwika tirato kuroommo» yukko.

²⁵Ee ammanem Ariyook Daani'eela adi'l beyyo massaa «Adila, ki haqaawwika tirato kiina kureena xanoo mat mancho Yihuxxi minaadabiinsi qeefadanto'i keeniinsi siidaammo» yukko.

²⁶Adilim Bilxaasoora yamamu Daani'eelena «An moo'ummi haqaawwo tiratinnem iina kutteena xantoohonnihe?» yaa xa'mmukko.

²⁷Daani'eelim adilina «Adila, at xa'mmitti maaxammi woshsha qoolluwwi, kiiraan, gennaanii falaanii kiina kutteena xantamoyyo.

²⁸Ihukkaarem maaxammi woshsha hundam caakkisoo Waa'i iimanenne yookko; ixxi hanenne waaroo doollenne ihoo luwwi hundam kiina Nabukadanaxoorina la'isaakko. At ki ara'anne iinse'llaa moo'llitti haqaawwii ki kaaltii kane.

²⁹«Adila, at ki ara'anne iinse'llaa waaroo doollenne ihoo luwwi bikkina dabaransitaa sawwitam hee'llitto; ee bikkina maaxamu luwwa caakkisoo Waa'i ka lasage ihoo luwwa kiina la'isaakko.

³⁰Ihukkaarem ku maaxamu luwwi iina caakkukkok tiratoom adilina la'amoo'isinattee ki tiironnem dabaransitaa sawwitam hee'llittoka laqqoo'isinattee bagaan an ka uullanne yo'i qoolluwwi keeniinsi qooroomanne lophphummi bikkinayyo.

³¹«Adila, at lobakata belecce'oo moo'akkeena baddisoo geejji misila ki illagenne uullaakkoo moo'llitto.

³²Ee misi'llek horoor muccur worqa; biqii angii kin bira; godabii gubeedii naasa;

³³xumxuummi xaara; moqontiinsi aad yoo lokkik kolli xaara kolli odim buchchi hee'ukko.

³⁴Eekka moo'llittuuyyim angi nakkoo'nnim mat kin duuniinsi toroshamaa ee misi'lleka xaaraa buchchaa ihu lokko aphphisaa xaansukkuuyyi moo'llitto.

³⁵Ee ammanem xaarii buchchii, naas, kin birii worqii mateeyyam xaamukko; hurbaata ganakkam agana oodo'onne yoo luunqisam ihukko; hafachchim massukko; afu beyyim la'amukkoyyo. Ihukkaarem misilooma aphphisu kin lob duun ihukko; uulli hundannem wo'mmukko.

³⁶«Haqaawwoom eehan hee'ukko; kabadem ee haqaawwika tirato adilina kulloommo.

³⁷Adila, kiina iima'n Waa'i adillano, malaayye, wodaa lombaa uwwaakkoo adilluwwina adil atette.

³⁸Uullanne hundannem yoo manna, diinatee cii'aa gassitoo'isina ki anganne higisaa uwwaakko; keese hundi luwwannem gassaanchi issaakko; ee bikkina horoo'l worqi atette.

³⁹Kiinniinsi lasonne ki adillaniinsi hoffe'oo mulli adillan waarookko; eehanniinsi lasonne uulli hundam gassoo naasinne kobi'llamoo saxxi adillan waarookko.

⁴⁰Ee kee'n lasaanchonne hundem luwwam iiqansaa xaansoo xaari'nnooi qoxxaalli soo'l adillan waarookko; xaar hundem luwwam iiqansaa xaansoo'isa oo adillan odim ixxeensi illageen hee'u adillano hundam iiqansaa xaansookko.

⁴¹Lokkikii maxxaalluwwikii kolli buchcha kolli odim xaar ihaa moo'llittisam ee'isam baxxamamaakkoo adillan ihookko; xaar buchchinne hamaaramaakkoo moo'llittisam ee adilla'nnek kolloom xaa'llisa qoxxaakkoohan ihookko.

⁴²Lokkikii maxxaalluwwikii kollii xaara kollii buchcha ihukkisam ee'isam ee adilla'nnek kollii qooxxaalla kollii qacaalli ihookko.

⁴³Xaar buchchinne hamaaramaa moo'llittisam ee'isam lamem adillanim hamaaramookko; ihukkaarem xaar buchchinne mat ihoobee'isam ixxuwwim mat ikkamoyyo.

⁴⁴Ee adilluwwi doollenne iima'n Waa'i heer heerina gindamoobee'i adillano ki'isookko; oo adillanim mulli minaadabina uwwamoobee'an ihookko. Oo adillanim mulli adillano hundam liitaa guullaa bi'isookko; ihukkaarem oo adillan heer heerinam qoxxaa hee'ookko.

⁴⁵Kin angi nakkoo'n duuniinsi toroshamaa xaara, naasa, buchcha, kin biraa worqaa xaansukkuuyyi moo'llittisam hanenne waaroo doollenne ihoo luwwa hundiinsi lob Waa'i kiina adilina moo'isaakko. Haqaawwoom hanqo'ane; tiratim amma'nnamaakkoohane» yukko.

⁴⁶Ee ammanenne adil Nabukadanaxoore Daani'eelina uullanne heeshaa otossukko; hurbaaxxi kitimaa aduruusam hincaa'akkona ijaajukko.

⁴⁷Adilim Daani'eelina «Ki'nnuwwik Waa'i mulli waa'uwwiinsi hundiinsim lobane, adilluwwina hundinam Moollannaa maaxamu luwwi hundam caakkiseena xanoohanee; ee bikkina ka maaxammi luwwa at caakkisseena xantaatto» yukko.

⁴⁸Ee lasage Daani'eela adil iimiimaa'ukko; lobakat irifo'om uwwukko. Baabiloo'n uullanne hundannem daannooma uwwukko; ee uulli qoolluwwi keen hundinam ijaajaanchi issukko.

⁴⁹Daani'eel tiissiisukkaare adil Sidiraaqa, Miisaaqaa Abdinaagoo Baabiloo'n uullanne hundannem gassaan issukko; ihukkaarem Daani'eel adilla'n minenne hee'ukko.