Read Hadiyya Daani'eel Kitaaba 3 Bible Online

Daani'eel Kitaaba 3 - Hadiyya bible

Daani'eel Kitaaba 3

¹Adil Nabukadanaxoor uullichcha lohayyi anga dufaachcham lohayyi anga ihoo misila worqinne baxisukko; Baabiloonanne Duuraa yakkam biir beyyonnem uullisukko.

²Ee misi'l maassi ugudina gassaano, suu'm manna, woshaabbuwwa, lommanna, mu'uxxi mi'n gassaano, daannuwwa, ixxi sogaanoo goo'n gassaanoo weeshisukko.

³Oo keen hundim maassi ugudina wixxita'a ee misi'l illagenne uullito'o.

⁴Ee lasage mat alallaataanchi sagara iimaa'aa «Ki'nnuwwi annanni annanni giichchi, minaadabii annanni annanni suume woccakkam keenii hundim,

⁵xurumbullika, maasinqo'ika, kiraa'lleka, diitta'ika, gambaabiyyikaa kajji mu'uxxekaa sagara macceessakkam ammane uullanne aad heeshitakka'a adil Nabukadanaxoor uullisu worqi misilina otossi'llehe.

⁶Uullannem aad heeshaa otossoobee'i manchi hee'ulas ee ammanem aphphoo giiranne uunjamookko» yukko.

⁷Ee bikkina annanni annanni giichchiinsi, minaadabiinsii annanni annanni suume wocakkam uulliinsii waatto'i manni hundim buuxxi xurumbika, maasinqo'ika, kiraa'lleka, diitta'ikaa kajji mu'uxxekaa sagara macceessa'a uullanne heeshta'a adil Nabukadanaxoor uullisu worqi misilina otossito'o.

⁸Ee ammanem Baabiloo'n uulli qoolluwwi hincita'a Yihuxxi uulli manna kasasso'o.

⁹Adil Nabukadanaxoorinam «Adila, at heer heerina adil ihe.

¹⁰Adila, at xurumbullika, maasinqo'ika, kiraa'lleka, diitta'ika, gambaabiyyikaa kajji mu'uxxekaa hundikam sagara macceesoo ammane ayyim uullanne aad heeshaa worqi misilina otossinona.

¹¹Heeshaa otossoobee'i ayyim aphphoo giiranne uunjamona ijaajjaatto.

¹²Baabiloo'n awuraajjuwwanne at gassaan issitti Sidiraaqa, Misaaqaa Abdinaagoo yakkam Yihuxxi manni yo'o; adila, oo keen ki ijaajo sabbo'ookko; ki waa'uwwa awwaaddamoyyo; at uullissitti misilinam otossimma sabbo'ookko» yito'o.

¹³Nabukadanaxoorim ee woshsha macceesu ammanenne lobakata nadadaa Sidiraaqa, Miisaaqaa Abdinaagoo ixxi beyyo worakkona ijaajukko; ixxuwwim waatta'a adi'l illagenne uullito'o.

¹⁴Adilim ixxuwwina «Sidiraaqa, Miisaaqaa Abdinaago! I waa'uwwina awwaadimmaa an uullisummi worqi misilinam otossimmaa sabbakko'is hanqamennihe?

¹⁵Kabadem xurumbika, maasinqo'ika, kiraa'lleka, diitta'ika, gambaabiyyikaa kajji mu'uxxekaa hundikam sagara macceessakkam ammane an uullisummi misilina uullanne heeshtakka'a otossitakko'aare e'llookko. Ihukkaarem otossitakkobeelas ee ammanem aphphoo giiranne darabantakkamo; i angiinsi ki'nnuwwa gatisoo waa'i hinkane?» yukko.

¹⁶Sidiraaq, Miisaaqii Abdinaagii adilina «Adila, ni gaga gatixxineena ka woshshina dabachcha uwwimmi niina hasisoohaneyyo.

¹⁷Neese otossinoommi ni Waa'i ka aphphoo giiriinsi gatiseena xanookko; ki angiinsem gatisookko.

¹⁸Ihukkaarem adila, ni Waa'i gatisoobeeta'nnim ki waa'uwwina awwaandoombee'an ihukkisaa at uullissitti worqi misilinam otossinoombee'an ihukkisaa la'e» yito'o.

¹⁹Ee ammane Nabukadanaxoor Sidiraaqanne, Miisaaqannee Abdinaagonnee lobakata nadadukko; ixxi illim heemachchukko. Ixxim Aphpham hee'u giir illagee'nnaanniinsi lamar suume eexxaa aphphoo'isa issakkona ijaajukko.

²⁰Sidiraaqa, Misaaqaa Abdinaagaa katta'a aphphoo giiranne darabbona ixxi gogotiinsi malaayyaammuwwa ijaajukko.

²¹Ee bikkina qambiisa, sure'e, horoo'l shaashshaa mulli eddechchaa edde'llo'isam katta'a aphphoo giiranne darabbo'o.

²²Adi'l ijaajim lobakata u'nnansoohan hee'u bikkina giir lobakatisa aphpham hee'ukko. Ee bikkina Sidiraaqa, Misaaqaa Abdinaagaa giiranne darabbo'i manna gii'llek laban shukko.

²³Ihukkaarem sasem mannim qooxxaallisa karanto'isam giiranne darabanto'o.

²⁴Ee lasage adil Nabukadanaxoor maalalukkuuyyi afuuru beyyiinsi qaqqisaa shoottukko. Ixxi sogaaninam «Kallaa giiranne darambummok xale'i sas manchoyyonnihe?» yukko. Ixxuwwim «Adila, hanqame» yito'o.

²⁵Adilim «Oono'o, tiranta'a gii'l lambe'enne daba'llantam soor mancho moo'oommuulla; giirim maham hawwodukkoyyo; soo'llaannikim hagar Waa'i beeto laboohane» yukko.

²⁶Ee ammanem Nabukadanaxoor aphphoo gii'l nafanne hincaa «Hundam xanoo Waa'ina awwaadaan ikkakko'i Sidiraaqa, Misaaqaa Abdinaagoo, gii'l woriinsi fittakka'a keyyaallehe!» yukko. Ixxuwwim gii'l woriinsi fitto'o.

²⁷Ee lasage gassaan, lommanni, ijaajaanii adi'l sogaanii hundim ee kee'n kululleetanne wixxita'a giir ee mannika orachcho hawwodubee'isa, horoo'l saraatim shokkubee'isa, edde'llo'i eddechchamgiir nakkubee'isaa mullek gataa gii'l fooshshim ixxuwwa nakkubee'isaa moo'llo.

²⁸Nabukadanaxoorim dabaraa «Ixxi asse'amaancho asse'aa ixxi awwaadaano gatisu Sidiraaqik, Misaaqikii Abdinaagikii Waa'i galaxxamaakkoohan ihona. Ixxonne amma'nnanta'a adi'l ijaajo sabimminne ixxuwwi otossitam Waa'iinsi bagaan mulli waa'ina awwaadimmaa otossimmaa sabba'a ixxuwwika foore higissa'a uwwita'a hee'llo'o.

²⁹«Ee bikkina ka'isa gatisoo Waa'i mullek bee'e; Sidiraaqaannonne, Misaaqaannonnee Abdinaag Waa'annee game'llaxxi sagara wocoo giichchi, minaadabii annanni annanni suume wocoo mannii hundim muramona. Ixxuwwi minneewwim gindamaa hacca uunjakkam beyyi ihona yaa ijaajaammo» yukko.

³⁰Ee lasage Sidiraaqa, Misaaqaa Abdinaagoo adil Baabiloo'n uullanne daannuwwi issukko.