Read Hadiyya Daani'eel Kitaaba 5 Bible Online

Daani'eel Kitaaba 5 - Hadiyya bible

Daani'eel Kitaaba 5

¹Mat balla adil Belshaazar kuma ihoo suu'm mannana lobakat maadda gudisukko; ixxuwwinne maqirem woyi'n diqaasa agam hee'ukko.

²Woyi'n diqaasa aggu'uuyyim adil Belshaazar ixxi anni Nabukadanaxoor Yerusaaleemanne hee'u keesammi miniinsi eebu worqinnee kin birinnee baxamu mu'uttuwwa eebbona awwaadaano ijaajukko. Eebisu mashka'im ixxii suu'm mannii, ixxi meentii bakki meentii ee worqi mu'utanne agimminatte.

³Awwaadaanim Yerusaaleemanne hee'u keesammi miniinsi waaru worqikaa kin bi'llekaa mu'uta ee ammanem eebbo'o; adilii suu'm mannii ixxi meentii bakki meentii ee mu'uttuwwanne woyi'n diqaasa aggo'o.

⁴Woyi'n diqaasa aggu'uuyyim worqinne, birinne, naasinne, xaarinne, haqqinnee kininnee baxamu qophpha'n waa'uwwa galaxxito'o.

⁵Ee ammanem angi maxxaalluwwi dangonnem moo'amaa caakka dissakkam mu'uxxi illagenne yoo danaamisa nannamaakkoo adilla'n mi'n gortannanne kitaabukko; adilim ee kitaaboo anga moo'ukko.

⁶Ee ammanem adi'llek illi heemachchukko; lobakatam muggukko; ixxek angii lokkim hoogukko; mogole'im huxe'ukko.

⁷Adilim gennaano, kiiraanoo qoolluwwi keenoo ixxi beyyo worakkona sagara iimaa'a ijaajukko; weeshanta'a waatto'isam adil ixxuwwina «Ka gortannanne kitaabamukkoka qananaa'aa tiratooma iina kureena xanoo manchi adilla'nneka kashar eddechcha edde'ookko; worqi coram gaanjenne issaqqookko; i adillanonnem saxxi beyyi gassaanchi ihookko» yukko.

⁸Ee lasage oo qoolluwwi hundim adi'l beyyo hincito'o; ihukkaarem kitaabamukkoka qananaa'eenaa tiratooma adilina kureenaa xanukkok ayyim hee'ukkoyyo.

⁹Adil Belshaazarim lobakata baddukko; illim illagee'nnaanniinsi loboka heemachchukko; ixxi suu'm mannim mal bi'aa muggito'o.

¹⁰Illageen adilatte hee'llo'i adi'l ama adi'llekaa adi'l suu'm mannikaa corochcha macceessa'a maadda itakkam mine aagga'a adilina «Adila, at heer heerina adil ihe; ka woshshanne u'nnantitte; illim heemachchoone.

¹¹Keesammi waa'uwwik ayyaan yoo mat manchi ki adilla'n woronne yookko; kiyyanni adilla'n doollennem waa'uwwisa ixxonne qooroom, lachchii qoossimmii wo'mmaakkoohan ihaa siidamaakko; kiyyanni Nabukadanaxoorim kiiraanina, gennaanina, qoolluwwinaa falaaninaa hundinam daanni issaa hee'ukko.

¹²Adil summa Bilxaasoora yu oo Daani'eel er tiir, qooroomii qoossimmii yoohan ihaa haqaawwo tirimma, daphphu luwwa caakkisimmaa guddamu luwwa tirimmaa xanoo manchi hee'ukko. Ee bikkina Daani'eela weeshise; ixxi kiina tirato kurookko» yito'o.

¹³Ee lasage Daani'eel adi'l illagenne hincukko; adilim «Iyyanni adil Nabukadanaxoor Yihuxxi uulliinsi qeefadaa woru keeniinsette ikkitti Daani'eel atettennihe?

¹⁴Waa'uuwwik ayyaan keesenne yoo'isa, lachchi, qoossimmii annanni qooroomii kiina yoo'isa an macceesaammo.

¹⁵Ka kitaabamukkoka qananaa'lla'a tiratooma iina kutteena qoolluwwi keenii gennaanii i illagenne hincita'a hee'llo'o. Ihukkaarem eehanni tirato kutteena xanto'oyyo.

¹⁶Ihukkaarem at tirato kutteenaa hawwisoo luwwam titteenaa xantoo'isa macceesaammo; kabadem ka kitaabamukkoka qananaa'lleenaa tiratom kutteenaa xantilas adilla'nneka kashar eddechcha edde'llootto; worqi coram gaanjenne issaqqitootto; i adillanonnem saxxi beyyi gassaanchi ikkootto» yukko.

¹⁷Daani'eelim adilina «Uwwitoo luwwi kiinam gatona; irifo'om mulli mannina uwwe. Ihukkaarem kitaabamukkoka adilina qananaa'oommo; eehanni tiratom kiina kuroommo.

¹⁸«Adila, hundam xanoo Waa'i kiyyannina Nabukadanaxoorina adillano, malaayye, lombaa hibbaa uwwukko.

¹⁹Ee malaayyiinsi ki'aa annanni annanni giichchi, minaadabii annanni annanni suume wocoo keenii hundim ixxo baddaa huxe'am hee'ukko. Ixxi hasukkoka sheena hasukkokam gatiseena, hasukkokam li'iseena hasukkokam sholliiseena xanam hee'ukko.

²⁰Ihukkaarem ixxi amaadoohanee wodan duudaakkoohanee ihu bikkina adillaniinsi dillukko; lombim ixxeensi sheelatamukko.

²¹Hundam xanoo Waa'i manni adillan hundinam daanni ihukkisaa ee adillanom ixxi hasukkaannina uwwoo'isaa la'eebe'e manniinsi annanni ihaa tiir dabassamaa mochchaannisa ihukko; ixxi heechchi beyyim udma'i uulli hallinnette ihukko; mirgo'isam hixe itukko; orachchim iima'n hadaddinne aashukko.

²²«Belshaazara, at ixxi beet ikkaa ka hundam laqqittuuyyim iima'n Moollannanne bolxitto bagaan ki gaga heeshaa'llittoyyo.

²³Keesammi Miniinsi bogamu mu'utam ki beyyo eebissaa at, ki mokaaninti, ki meentii bakki meentii woyi'n diqaasa aggakko'o; birinne, worqinne, naasinne, xaarinne, haqqinnee kininnee baxamu moo'eena, macceeseenaa la'eenaa xanoobee'i waa'uwwa galaxxitto. Ihukkaarem ki fooree ki googoo ixxi anganne amadu Waa'a lonsittoyyo.

²⁴Ee bikkina ku angi maxxaalluwwi ixxi beyyiinsi asse'amaa ka gortannanne yookkok kitaabaakko.

²⁵«Kitaabamu luwwim ‹Maanee, Maanee, Teeqeel, Faariis› yoohane.

²⁶«Tiratim ‹Maanee yimmi Waa'i ki adilla'n doolle xigaa beeddoo'isa issukko› yimma.

²⁷«Teeqeel yimmi ‹Keennaanchonne keenantaa sholle'llaatto› yimma.

²⁸«Faariis yimmi ‹Ki adillan baxxansamaa Meedoo'nnaanninaa Faarees uulli minaadabinaa uwwamukko› yimma» yukko.

²⁹Ee ammanem Belshaazar Daani'eelina adilla'n kashar eddechcha eddeesakkonaa worqi coram gaanjenne issakkonaa ijaajukko; ixxi adillanonnem saxxi beyyi gassaanchi ihona alallaatisukko.

³⁰Ee hiimom Baabiloo'n adil Belshaazar shakko'o.

³¹Meedoo'n uulli Daariyoosim adillano aa'ukko; ixxekim umur lohayyee lam hiinchoo hee'ukko.