Read Hadiyya Daani'eel Kitaaba 6 Bible Online

Daani'eel Kitaaba 6 - Hadiyya bible

Daani'eel Kitaaba 6

¹Daariyoos ixxi adilla'n uulli hundannem 120 gassaano doo'lleena hasukko.

²Odim oo gassaan adi'l diinate xa'issa'a adil hawwodamoobee'isa egettam sas mancho ijaajaan issaa doo'llukko. Ee sasiinsim mat Daani'eelatte hee'ukko.

³Daani'eel ee ijaajaaniinsii daannuwwiinsii lachchinne lophphaa siidamu bikkina adil ixxi adilla'n uulli hundannem gassaanchi isseena hasukko.

⁴Ee lasage oo gassaanii ijaajaanii Daani'eelannee ixxi baxoo adilla'n baxonnee hantaaro qoocciteena sawwitam hee'llo'o. Ihukkaarem Daani'eel amma'nnamaakkoohanee lobakata gaga ege'llaakkoohanee ihu bikkina huushancha te'im hawwojja siiddeena xanto'oyyo.

⁵Ee bikkina ixxuwwi «Ixxi Waa'i see'l quuxiinsi bagaan Daani'eela kasansoommi hawwojja maham siindeena xannummoyyo» yaqqanto'o.

⁶Ee bikkina oo gassaanii ijaajaanii wixxita'a adi'l beyyo matta'a «Adil Daariyoosa, heer heerina adil ihe.

⁷Adila, neese ki adilla'n gassaan, daannuwwi, woshaabbuwwi, sogaanii ijaajaanii hundim ayyim sad balli afeebe'e kiinniinsi bagaan manna te'im mulli waa'a uunxulas hobbi barenne darabamona at alallaatissonaa qoxxaalli ijaajo fissitonaa iittammaammo.

⁸Kabadem adila, Meedoo'nnaannisaa Faariis see'llisaa dabassamoobee'i ijaajo fisse; kitaabbaahim la'ise» yito'o.

⁹Adil Daariyoosim alallaat kitaabamaa firoo'isa issukko.

¹⁰Daani'eelim ijaajoom kitaabamaa firukkisa la'ukkaarem ixxi mine aagukko; ixxi mi'n fooqik maskoottuwwi Yerusaalee'm kollonne fooqaakkoohan hee'ukko; illageen issam hee'ukkisam ballanne sas kore guruphphaa ixxi Waa'a uunxukko; galaxxukkome.

¹¹Oo dollottam keenim wixxita'a matta'a Daani'eel ixxi Waa'i uunxukkuuyyii galaxxukkuuyyii moo'llo'o.

¹²Ee ixxuwwi adi'l illagennem hincita'a «Adila, kiinniinsi bagaan sad balli afeebe'e manni kolli te'im waa'i uunxoo ayyi manchim hobbi barenne darabamoo'isina alallaatissaa hee'llittoyyonnihe?» yito'o. Adilim dabaraa «Hanqame, Meedoo'nnisaa Faarees see'llisaa dabassamoobee'i qoxxaali ijaaj firaakko» yukko.

¹³Ixxuwwim dabatta'a «Adila Yihuxxi uulliinsi qeefadanta'a waatto'i manniinsi mat ihu Daani'eel ballanne sas kore ixxi Waa'a uunxoolla bagaan keesee kitaabbitti ijaajoo lonsukkoyyo» yito'o.

¹⁴Adilim eekka macceesaa lobakata kichche'ukko; Daani'eelam gatiseena murte'ukko; eelliinchi ageebe'e hundam Daani'eela gatisoo googo siideena yakukko.

¹⁵Ee lasage oo keen adi'l beyyo hincita'a «Adila, Meedoo'nnaannisannee Faariis see'llisannee mat adi'llek alallaat te'im ijaaj dabassamoobee'an ihukkisa la'e» yito'o.

¹⁶Ee bikkina Daani'eela amadakka'a hobbi barenne darabakkona adil ijaajukko. Daani'eelinam adil «Hundi ammanem otossitoo ki Waa'i keese gatisona» yukko.

¹⁷Hobbi ba'l suumennem kina eebakka'a ifiisakko'o; Daani'eelanne issakko'i luwwi dabassamoobee'isina adil ixxi koobo'innee ixxi sogaa'n koobo'uwwinnee koobukko.

¹⁸Adilim ixxi adilla'n mine elle'ukko; hurbaatam itukkoyyo; liiransoo luwwim ixxena hincoo'n diriiroo'n garukko.

¹⁹Adilim soodaraar daram ki'ukko; qaqqisaahim hobbi baryoo bexxo marukko.

²⁰Hobbi ba'l beyyo hincaatim kichchechchi sagarinne «Hee'oo Waa'ina awwaadaanchi ikkitti Daani'eela, hundi ammanem otossitoo ki Waa'i hobbiinsi keese gatisimma xanukkonnihe?» yaa weeshukko.

²¹Daani'eelim adilina «Adila, heer heerina adil ihe.

²²Waa'i illagenne muccur ihummi bikkinaa ki illagennem hawwodummi luwwi siidamubee'i bikkinaa i Waa'i ixxi asse'amaancho asse'aa hobbika suume ifiisukko; hobbim hawwodukkoyyo» yukko.

²³Adilim lobakata liiramukko; Daani'eelam hobbi bariinsi fissakkamisina ijaajukko; Daani'eelem hobbi bariinsi firukko; Waa'annem amma'nnamaakkoo bikkina maham hawwodamukkoyyo.

²⁴Ee lasage Daani'eela kasasso'i keen amadanta'a waattamisina adil ijaajukko; ixxuwwa, ixxuwwi oosoo ixxuwwi meentoo amadakka'a worakka'a hobbi barenne darabakkamisa issukko. Ixxuwwim ba'l lugumo afoo'nnim hobbi dereeransukko; miqqeewwam iiqansukko.

²⁵Ee ammanem adil Daariyoos uullanne hundannem hee'oo annanni annanni giichchina, minaadabinaa annanni annanni suume wocoo keeninaa «Xummi ki'nnuwwina ihona.

²⁶I adillanonne yoo minaadab hundim Daani'eel Waa'a lonsoo'isinaa baddoo'isinaa ka alallaato alallaataammo. «Ixxi heer heerina hee'oo Waa'a; ixxi adillanim bi'oobee'ane; ixxi gassinam tungi bee'ane.

²⁷Ixxi gatisookko; agaagookkome; ixxi uullannee iimanennee maalallatoo agannaa baxookko. Ixxi Daani'eela hobbi suumiinsi gatisaakko» yaa alallaato fissukko.

²⁸Daani'eelim Daariyoosaannonnee Faariis uulli Qiiroos adilla'n doollennee hundannem lombaam ihaa hee'ukko.