Read Hadiyya Daani'eel Kitaaba 8 Bible Online

Daani'eel Kitaaba 8 - Hadiyya bible

Daani'eel Kitaaba 8

¹Belshaazar adil ihu saxxi hiinchina an Daani'eel illageen moo'ummaanniinsi mulli kaalta odim moo'ummo.

²Eelaa'm goonanne kininne ootamaakkoo Suusa'i beero'onne ihaa kaaltanne i gaga moo'ummo; ee ammane Uubaal daajji gadanonne uullaa hee'ummo.

³Ee daajji gammalannem lam qeeraa'l buudduwwi yoo mat gereechchi ambul uullaa hee'ukko; lamem buudduwwiinsim matoom lasonne mutaakkoohan ihukkaarem luxxaanniinsi higaa qeeraa'l hee'ukko.

⁴Oo ambulim eelliinchi aagganne, hanaa'n qarannee woroo'n qarannee daba'llamukkuuyyi qasoo moo'ummo; ayyi moochchim ixxenne uullixxameena xanukkoyyo. Ixxi angiinsi gatiseena xanoohim hee'ukkoyyo; doo'llukkoka hundam issam hee'ukko; ixxi gagam iimiimaa'ukko.

⁵Ee kaalta dabaransaa sawwihonam lamem illi lambe'ennem mat geejji buud yoo fellakkichchi ambul lokkinne uulla nakkoo'nnim eelliinchi aagginne uulli hundam higaa dangonne waarukko.

⁶Ixxim daajji gadanonne uullaakkoohaannonne moo'ummi lam buud yoo gereechchi ambu'l beyyo malaayyaam quunqinne weeraraa waaroo moo'ummo.

⁷An moo'onam fellakkichchi ambul gereechchi ambula hawwodukko; mogaallisa qasimmiinsi ki'ukkok lamem buudim iiqamukko; gereechchi ambulinam kaa'oo malaayyi hee'ukkoyyo; ee bikkina fellakkichchi ambul uullanne ubbuusaa hance'ukko; ixxi malaayyiinsim ee gereechchi ambula gatisookkok hee'ukkoyyo.

⁸Fellakkichchi ambul ixxi gaga iimiimaa'ukko; ixxi malaayyim lobakata wodukkuuyyi maru ammanenne lob buud iiqamukko. Ee iiqamukkaanni lugumonnem soorem qaram moo'oo kollinne mulli soor buudduwwi mutukko.

⁹Ee soorem buudduwwiinsim matiinsi mat hoffi buud mutukko; ee hoffi buuxxekim malaayyi woroo'n qaranne, eelliinchi firannee mishisoo uulli kollonnee haraarukko.

¹⁰Iima'n gogotanne afeebe'em iimiimaa malaayyaam ihukko; iima'n gogotiinsii boollaankiinsim lobakata uullanne ubbuusaa hance'amukko.

¹¹Iima'n gogoxxi awwonsaanchinnem ixxi gaga gudiseebe'e iimiimukko; hundam xanoohannina amman hundam hincoo kitimim gatoo'isa issukko; Keesammi Minem haashaassukko.

¹²Baaxii'l mashka'inne keesammi gogot ballina ballina hincoo kitiminne maqirem ixxi anganne ubukko; hanqam uullanne ubbuusukko; issoo luwwi hundim ixxena taaphanukko.

¹³Ee lasage keesammuwwiinsi mat wocukkuuyyi macceesummo; mulli keesammim dabaraa «Ballina ballina hincoo kiti'm bikkina, bichchina mashkooi ihu boqqoo'm bikkinaa Keesammi Minii gogotii lokkinne hancaacanchi bikkinaa moo'amu kaalti wo'mmookkok hinki balla?» yukko.

¹⁴Ixxim «Lam kumaa sas xibbi hiimoo daraa afeebe'e; ee lasage Keesammi Min muccurookko» yaa dabarukko.

¹⁵An Daani'eel ee kaaltika tiratooma la'eena dabaransaa sawwihonam manchi beeto labookkok dangonne i illagenne uullukko.

¹⁶Uubaal daajji eeqidinne «Gabureela, ka kaalti tirato ku manchi la'oo'isa isse» yoo manchi sagara macceesummo.

¹⁷Gabureelim an uullummi beyyo hincukkuuyyi waaru ammanenne baddaa uullanne ubummo. Ixxim «Manchi beeto, kaaltoom moo'isookkok lasaanchi doolli bikkinatte ihukkisa qoossitaa la'e» yukko.

¹⁸Ixxi wocukkuuyyam tuude'aa uullanne illillaachcha ubummo; ihukkaarem ixxi eese amadaa i lokkinne uullisukko.

¹⁹Iinam «Ku kaalti moo'isookkok qoodamaakkoo lasaanchi doolli bikkinatti ihu bikkina Waa'i quuqoo doollenne mah ihooda'e kiina kuroommo.

²⁰«Moo'llitti gereechchci ambulanne yoo lamem buudim Meedoo'nnekaa Faariis adilluwwaa moo'isoohane.

²¹Fellakkichchi ambul moo'isookkok Giriik adila; lamem illi lambe'ennem yoo lob buud odim luxxi amma'n Giriik adila moo'isookko.

²²Oo buud iiqamaa lasonne mutu soorem buudim Giriik adillan soor beyyonne baxxansamoo'isa moo'isoohane; ihukkaarem oo keen illagee'n adilinne malaayyenne akeekantamoyyo.

²³«Ixxuwwi adilla'n lasaanchonne boqquwwi hore'em boqqitu'uuyyi mattam ammane illi kolli baddisoo qawwiisoo adil ki'ookko.

²⁴Oo adil hore'em malaayyaam ihookko; ihukkaarem ixxi gaginneyyo; hiriraa'oo bichchi ihoo'isa issookko; baxoo bax hundim taapanookko. Malaayyaammuwwaa Waa'i minaadabaa bi'isookko.

²⁵Lobakata qawwiisimminne goddaanchi ihookko; ixxi gagam hundiinsi hanaan ihukkaannisa xigookko; hundi luwwim xumma yaa afuuru kee'nneka duta bi'isookko. Hundam xanoo Waa'inne uullixxamookko; lasaanchonnem bi'ookko; ihukkaarem manni anginneyyo.

²⁶At moo'llitti hii'mmekii da'llekii kaalti hanqo'ane; ihukkaarem lobakat doolliinsi lasonne ihoohan ihu bikkina xufe» yukko.

²⁷An Daani'eel hoogaahii xissaahii lobakat balla iinse'ummo; ee lasage ki'aa adi'l baxo baxeena marummo; ee kaaltoo'm bikkinam u'nnamummo; ihukkaarem qoosseena xanummoyyo.