Read Hadiyya Hoose'i Kitaaba 1 Bible Online

Hoose'i Kitaaba 1 - Hadiyya bible

Hoose'i Kitaaba 1

¹Ooziy, Iyyo'aataam, Akaazii Hizqiyaasii Yihuxxi uullanne awwonanta'a adilluwwi ikko'i doolluwwannee ee'isam Yoo'aas beet Yoorbi'aam Isra'eelanne adil ihaa hee'u doollennee Waa'i Bi'eer beetina Hoose'ena caakkisaa moo'isu hiraaqqi sagar kane.

²Waa'i Hoose'ennette ihaa Isra'ee'l minaadabina ixxi sagara higisimma asheerukkuuyyi Hoose'ena «I minaadab iinniinsi annanni ihaa shigigaa'oo'isa saa'l bikkina atim mattaa buubbeesaanchi meentichcho eebe; iseensim saa'aan ooso qare» yukko.

³Ee bikkina Hoose'i maraa Diiblaayim landichcho Gomeera eebukko. Isem lamfoorette ikka'a goonchi beeto ixxena qatto'o.

⁴Ee lasage Waa'i Hoose'ena «Iyyu'uu ixxi shumo'ii Yizra'eelanne shito'i manni mashka'inne Iyyu'i abaroosa guzumo'oommi amman qee'lloyyo. Isra'ee'l adillanim lasaanchoo'isa issoommo.

⁵Ee ammane Yizra'ee'l cebbanne Isra'ee'l gogota guulloommo. Ee bikkina ki beetika summa ‹Yizra'eela›[1] yitaa weeshe» yukko.

⁶Gomeera odim lamfoorette ikka'a landichcho qatto'o. Waa'im Hoose'ena «Kanniinsi eehid Isra'ee'l minaadabina i iitto moo'isoommoyyo; uratom issoommoyyo. Ee bikkina ki landichchoka summa ‹Looruhaama›[2] yitaa weeshe.

⁷Ihukkaarem Yihuxxi minaadabina an i iitto moo'isoommo. An ixxuwwina Moollanni ihummi Waa'i ixxuwwa gatisoommo; gatisoommokim bisa'inne, xiyyinnee orinneyyo te'im faradinnee faradaaninneyyo» yukko.

⁸Gomeera Looruhaamina anuuna hootta'a lasage odim goonchi beeto qatto'o.

⁹Waa'im Hoose'ena «Kanniinsi eehid Isra'ee'l minaadab i minaadab ihubee'i bikkinaa anim ixxuwwina Waa'i ihumbee'i bikkinaa ki beetika summa ‹Loo'aamii›[3] yitaa weeshe» yukko.

¹⁰Isra'ee'l minaadab xigakkeena te'im keenakkeena xanakkambee'i dambalaq shashsha'llisa ihookko. Kaba Waa'i ixxuwwina «I minaadabayyo» yuta'nnimii mat balla ka beyyonnem «Hee'oo Waa'ina ooso» yakkam balli waarookko.

¹¹Ee ammane Yihuxxekii Isra'ee'llekii minaadab mat ikkamo. Lamem minaadabam gassoo mat awwonsaancho doo'llitamo. Odim daba'llita'a ixxuwwi gaqqi uullanne makkixxita'ahii goddita'atii[4] hee'llamo. Yizra'ee'l ballim lob balli ihookko.