Read Hadiyya Hoose'i Kitaaba 13 Bible Online

Hoose'i Kitaaba 13 - Hadiyya bible

Hoose'i Kitaaba 13

¹Efireem sulli Isra'ee'l minaadabiinsi hanaan ihaa hee'u doollenne wocukkuuyyi macceesoo keen hundim huxe'am hee'ukko. Ihukkaarem lasonne Ba'aala yakkam qophpha'n waa'ina otossaa baaxiilo baxu bikkina lehinne guzumo'amukko.

²Kabadem qooroominne bukkamaa baxamaakkoo misilaa kin birinne baxamaakkoo qophpha'n waa'uwwaa baximminne baaxiilonne baaxiilo eddamuulla. Oo keen hundim manni angi baxo. Ee keenina «Kitima hincaa'llehe» yitamo. Mannim addichchi hagaranne baxamu qophpha'n waa'uwwa suunqitamuulla.

³Ee mashka'inne soodaraa'l unbu'llisa ikka'a bi'llamo; da'l qiibaxxisam giggittamo. Oodo'iinsi hafachchinne fii'amaa maroo luunqisaa te'im afo'inne firaa beeddoo wirii'llisaa ikkamo.

⁴Waa'i «Gibxi uulliinsi fissummi Moollanni Waa'i anette. Ki'nnuwwina iinniinsi bagaan mulli Waa'i bee'e. Gatisaanchim xale'i anette.

⁵Udma'anne lobakata gogaalli i uullanne ki'nnuwwa abooyyummok anette.

⁶Ihukkaarem er uulla aaggakka'a godditakkeebe'e ittakka'a lasage lobakata bolxitakko'o; eesem xaddakko'o.

⁷Ee bikkina an hobbichchisaa dugaa egeroo kabeechchisaa ihoommo.

⁸Wotalli game'amu tibbekkichchisa anim ixxuwwa daafoommo; dereeransoommome; itoo hobbichchisam ihoommo; dereeransoo mogaalli moochchisa muransoommo.

⁹«Isra'ee'l minaadaba, ki'nnuwwina hara'mmoommi eesenne ki'llakko'i bikkina an ki'nnuwwa bi'isoommo.

¹⁰Ki'nnuwwi adilaa awwonsaanoo ki'nnuwwina uwwamona xa'mmitakka'a hee'ukko. Eehannah kaba ki'nnuwwa gatisoo adilii awwonsaanii hannonne yoo?

¹¹An quunqinne adilluwwa ki'nnuwwina uwwaa hee'ummo; ihukkaarem kee'mmaalli quunqinne bi'isummo.

¹²«Isra'ee'llek hawwojji tuubamaakko; baaxiilim doonanne kitaabamaakko.

¹³Isra'eela xuuchchi amadoo meentichchosa u'n amadookko; qaramoo amman afaa am goosiinsi fireena hasoobee'i ciilisa qawwi ihaakko.

¹⁴Si'oo'l malaayyiinsi an ixxuwwa gatisoommonnihe? Lehiidu gatisoommonnihe? Leho, kiikki booban hannonnennette? Si'oola, ki bi'ishshidu hannonnette? An ixxuwwina qishixxoommoyyo.

¹⁵Abbaayyuwwi lambe'enne ixxi mishaam ihuta'nnim Waa'i quunqi ihu eelliinchi firoo kolli hafachchi udma'i uulliinsi ki'aa waarookko. Bu'i xoo'ookko; daajjim gogookko; oo hafachchim bito xee'aalli mu'uta hundam sheelataa massookko.

¹⁶Samaare'i iina boqqito'i bikkina baxxo'i bax mashka'inne xa'mmantamo. Minaadabim orinne beedditamo; ciilluwwi uullanne xaantamo; lamfoor meentikim godab dereeramookko» yoolla.