Read Hadiyya Hoose'i Kitaaba 14 Bible Online

Hoose'i Kitaaba 14 - Hadiyya bible

Hoose'i Kitaaba 14

¹Isra'ee'l minaadaba, baaxii'l mashka'inne qolantakko'oo bikkina ki'nnuwwi Moollanni Waa'i kolli daba'llehe.

²Baaxiilo biiraa yimmi sagara amaddakka'a Waa'i kolli daba'llitakka'a «Ni hawwojja hundam ‹Uraammo› yihe. Uttaahim neese aa'e. Neesem ni suu'm er mish ihu galata kiina hincaa'nnoommo.

³Aasoor neese gatisooyyo; o'l faradonnem amma'nnammoommoyyo. Kanniinsi eehid ni anginne banxummi qophpha'n waa'uwwa hundam ‹Ni Waa'a› yinaa weenshoommoyyo. Moollanna! Anno'i lehu oosim kiinniinsi qishixxato siixxitamo» yi'llehe.

⁴Waa'i «I minaadaphphi amma'nnanchi hoonge fayyiisaa i kolli dabaroommo. I quunqi ixxuwwiinsi daba'llu bikkina an i gaqqi doo'lliinsi ki'isaa ixxuwwa iittoommo.

⁵Isra'eelina aad dilloo hadaddisa ihoommo. Ixxuwwi fiitisa fiittamo; Liibaanoos uulli haqqisam xapha asse'llamo.

⁶Ixxuwwik caaf li'ookko. Wee'l haqqisam mishissamo; Liibaanoos uulli doo'm haqqisam er enja enje'llamo.

⁷Daba'llita'ahim i hafanne ikkamo. Mut hurbaaxxisam lattamo; woyi'n haqqisam fiittamo. Enjim Liibaanoos uulli woyi'n diqaasisa la'amaakkoohan ihookko.

⁸Isra'ee'l minaadaba! Qophpha'n waa'uwwinne iina mah edanchi hee'aate? Ki'nnuwwi uunxatina dabachcha uwwoommokii ki'nnuwwa abooyyoommokii anette. An hundi ammanem lataa hee'oo hoo'm haqqisa; mishaam ikkakkamokim iinninnette» yoolla.

⁹Qooroom yoo keen ka woshsha qoossitamo; qoossitam keenim laqqamo. Waa'i goog hanqo'i googo; muccur keen ixxenne mattamo. Ihukkaarem baaxiilaan keen qo'llita'a ubbamo.