Read Hadiyya Hoose'i Kitaaba 2 Bible Online

Hoose'i Kitaaba 2 - Hadiyya bible

Hoose'i Kitaaba 2

¹Ee bikkina ki'nnuwwina abbaayyuwwi ikko'i Isra'ee'l ooso «Amii»[5] aayyuwwa «Ruhaamaa»[6] yitakka'a weeshshehe.

²Waa'i «I ooso, kanniinsi eehid ki'nnuwwi ama i meentichchotte ikkobee'i bikkinaa anim is manchi ihumbee'i bikkinaa saa'lleena mixxam mixanoo saa'immaa uttona ise acceeqassehe.

³Ihukkaarem isemdu daba'llitambee'an ihulas qaranto'i ballisa kallemaram gattamisa issoommo. Gogaakkoo mahim bee'i kora'i uullisam ikkamisa issoommo; wo'i xeebinnem shoommo.

⁴Saa'aanchi meentichchoonsi qaranto'oohan ihu bikkina an is oosina qishixxoommoyyo.

⁵Ixxuwwi ama saa'aanchotte ikko'i bikkina ixxuwwa qatto'ok tuussiisoo'isinnette. Isem eekka issito'ok ‹Iina wo'oo waasaa, suufinnee talbi fatirinnee baxamaakkoo eddechchaa, zaytaa agoommi luwwaa uwwamoo bikkina i iitti manna awwonaa maroommo› yita'atette.

⁶Ee bikkina an iseka googo uttinne ootoommo; fittam gooca siiddambee'isam kululleeta hundam kininne ootoommo.

⁷Isem is iitti manni lasonne geettu'uuyyi mattamo; ihukkaarem ixxuwwa affeena xantamoyyo. Hassamo; ihukkaarem siiddamoyyo. Ee lasage odim ‹Ka heechchiinsi eraa'llek e'llookko; ee bikkina gaassi i aro'i beyyo maroommo› yitamo.

⁸Isena hurbaata, woyi'n diqaasaa wee'l zaytaa uwwummok anette ihummisa hore'em laqqo'oyyo. Isena lonsaa uwwummi biraa worqaa Ba'aala yakkam qophpha'n waa'ina uwwito'o.

⁹An hurbaaxxekaa woyi'nnekaa atoota, wixxaa'akkam agananne iseensi hooroommo. Iseka orachcho ifiixxitam suufinnee talbi fatirinnee baxamu i eddechcham maxaroommo.

¹⁰Is iitti manni illagennem kallemaram gattamisa issoommo. Isem i angiinsi gatisookkok hee'ooyyo.

¹¹Ise liirantam ugudduwwaa Usheexxaxxi Balluwwaa hiinchonnee agananne aganannee lonsitam ugudduwwaa bi'isoommo. Ee'isam annanni annanni ugudduwwa lonsitambee'isa issoommo.

¹²Is iitti manniinsi siiddo'i woyi'n kaashshaa oda'aa xoqoloommo. Woyi'nnekaa misha mishoo haqqi beyyoo doo'm wor ihoo'isa issoommo. Ee keenom bii'l moochchi itookko.

¹³Ise «Ba'aala» yakkam qophpha'n waa'ina aduruusa wiriissiteenaa is gaga wereeggissa'a is iitti manna awwonteenaa eese utto'i bikkina an ise guzumo'oommo» yoolla.

¹⁴Odim Waa'i «Ee bikkina an kabadem ise udma'i uulla massoommo. Eehe'em iitti sagarinne qawwiisoommo.

¹⁵Gaassi woyi'n kaashshi beyyo isena dabaroommo; hawwi cebbam[7] neeyyaxxi gooc ihoo'isa issoommo. Eehe'em Gibxi uulliinsi fitto'i ammane woraadda'n doollenne hee'llo'i amma'nnisa liiranchinne zammattamo.

¹⁶Ee balla ise «Iina i aro'o» yitamo bagaan «Ba'aala» yakkam qophpha'n waa'a weeshshamisa «I moollanna» yita'a weeshshamoyyo.

¹⁷«Ba'aala» yakkam qophpha'n waa'uwwika summa iseensi bi'isoommo; ee summim od tiiramooyyo.

¹⁸Ee ammane an ki'nnuwwi bikkina moochchinne, iima'n cii'innee uullanne biqinne shuroo qooccanchi hundinnee hidi'l sagara aagoommo. Uulliinsim xiyya, bisa'aa oraa bi'isoommo. Ki'nnuwwim xumminne usheexxitakkamisa issoommo.

¹⁹Isra'eela! An keese heer heerinam i mi'n amasa issoommo; muccuroominne, hanqinne, heer heerina hee'oo iittinnee qishixxatinnee i arette ikkoo'isa issoommo.

²⁰I hidi'l sagara egerimminne an keese i arette issoommo. Atim an Waa'i ihummisa laqqootto.

²¹Ee balla dabachchi uwwamoo'isa issoommo; iimanina dabachcha uwwoommo; iimanim uullina dabachcha uwwookko.

²²Uullim hurbaata, woyi'n mishaa wee'l zaytaa uwwimminne Yizra'eelina dabachcha uwwookko.

²³I minaadaba dabaraa ixxuwwi uullanne hee'llamisa issoommo. Amaxxinne godditamisam issoommo. ‹Haafit ihooyyo› yamanto'i ixxuwwina an haafoommo; ‹i minaadabayyo› yamantakko'i keenina an ‹i minaadaba› yoommo. Ixxuwwim iina ‹At niina Moollanna› yitamo» yoolla.