Read Hadiyya Hoose'i Kitaaba 4 Bible Online

Hoose'i Kitaaba 4 - Hadiyya bible

Hoose'i Kitaaba 4

¹Ka uullanne hee'oo manni hundam Waa'i acceeqasoo luwwi yookko. Ee bikkina Isra'ee'l minaadaba! Ixxi «Uullanne amma'nnanchi, iittii Waa'a la'immii bee'e.

²Hide'lla'a aaggo'i sagara gindita'a qophphantamo; shitamo; game'llamo; saa'llamo; barche'e issimmii shimmii lophphukkuuyyi maraakko.

³Ee mashka'inne uullanne billi lophphookko; uullanne hee'oo luwwi hundim hoogookko. Bii'l moochchi, cii'ii wo'i wo'l qurxumme'ii hundim beeddookko» yookkoka macceessehe.

⁴Waa'i «An acceeqasoommok qeessuwwi ikkakko'i ki'nnuwwi ihu bikkina minaadaba kasasoo te'im acceeqasoo hee'oone.

⁵Qeessuwwa, ki'nnuwwi balli caakkanne bobattakkamo; hiraagaanim hii'm tuunsonne ki'nnuwwinnem bobattamo. Ee bikkina an ki'nnuwwi ama bi'isoommo.

⁶I minaadab eese erisa la'imma hoogimmiinsi ki'aa bi'aakko. Ki'nnuwwi eese laqqakkeena hassakkobee'i bikkina anim iina qeessuwwi ikkakka'a awwaaddakkona hasoommoyyo. I Seeram sholliissakko'i bikkinaa xaddakko'i bikkinaa ki'nnuwwi oosim i illagenne xadamaakkoohan ihookko.

⁷«Qeessuwwa, ki'nnuwwik xig lophphukkuuyyi maru qaxanne ki'nnuwwik baaxiil i illagenne lophphukkuuyyi maraakko. Ee bikkina an ki'nnuwwika lomba sholliisoommo.

⁸I minaadaphphek baaxiil amaxxinne ki'nnuwwi li'llakkeena mashka'i ihu bikkina minaadab baaxiilo lonsaa baxona hassakkamo.

⁹Qeessuwwa, ki'nnuwwi minaadaphphisam ikkakko'ookko. Ee bikkina minaadab guzumo'amoo'isam ki'nnuwwim guzumo'antakkamo. Ki'nnuwwi baxisam miqoommo.

¹⁰I minaadab eese Waa'a utto'i bikkina ixxuwwi ittamo; ihukkaarem godditamoyyo. Hanqo'i Waa'a laqqambee'i minaadab otossitam beyyuwwanne saa'llamo; ihukkaarem ooso qattamoyyo» yukko.

¹¹Waa'i «Saa'immii haareechchoo eraa'l woyi'n diqaasa agimmii i minaadaphpheka tiiro bi'isaakko.

¹²Ee bikkina haqqinne baxamaakkoo qophpha'n waa'a sogitano xa'mmitamo; kiittam biccim ixxuwwi xa'mmichchina dabachcha uwwookkoka labissamo. Ixxuwwi tiirim saa'mminne wo'mmaakkoo bikkina iinniinsi ixxuwwi Moollanniinsi qee'llito'ookko.

¹³Duunnuwwi hundanne kitima hincaa'llamo. Hoffi duunnuwwanne, qeeraa'l caaf yoo qilxo'onne, oda'aannonnee hoo'm hafannee aduruusa wiriissitamo. Ee mashka'inne ki'nnuwwi landi saa'aan ihookko; oos meentim saa'ookko.

¹⁴Ki'nnuwwik landi saa'oohaare oos meentim saa'aan ihoohaare guzumo'oommoyyo. Mashka'oomim goon ki'nnuwwi gagim otossakkam minneewwanne saa'oo meento awwontakka'a qophpha'n waa'ina otossitakkamuulla. Ee bikkina qoossoobee'i minaadab bi'ookko.

¹⁵Isra'ee'l minaadaba, ki'nnuwwi saa'aan ikkakko'aarem Yihuxxi minaadab baaxiilaan ikkamisa issitakkotte. Gelgela te'im Beeti'aawe'e [8] mattakkotte. ‹Hee'oo Waa'i la'ona› yitakka'a hide'llakkotte.

¹⁶Isra'ee'l minaadab bobaru addichchisa fiikkaakko. Eehannah Waa'i ixxuwwa gereebbi geexxuwwisa er beyyonne hinkid allaarookko?

¹⁷Isra'ee'l minaadab qophpha'n waa'inne losanto'oo bikkina hasso'oka issitona cawwitaa ure.

¹⁸Lobakat woyi'n diqaasa agga'a lasage saa'llamo; ixxuwwi awwonsaanim tuussiisoo luwwa issimma lonsita'a iittitamo.

¹⁹Ixxuwwim hafachchi fii'aa massoo luwwi qaxa qee'llita'a mattamo; qophpha'n waa'ina kitima hincaa'llo'i bikkinam tuuttamo» yukko.