Read Hadiyya Hoose'i Kitaaba 5 Bible Online

Hoose'i Kitaaba 5 - Hadiyya bible

Hoose'i Kitaaba 5

¹Waa'i «Qeessuwwa, kaka macceessehe! Ki'nnuwwi Isra'ee'l minaadabim qoossehe; adi'l mi'n abaroosim kaka macceessehe. Oono'o, oogat ki'nnuwwanne waaraakko; ki'nnuwwi Misiphphanne qaashisa Taaboorannem biddiqu shikkisa ikkakko'ookko.

²Boqquwwi keen manna shimma lonsitamuulla; ee bikkina an hundam guzumo'oommo.

³«An kiikka Isra'ee'lleka duuha'a la'oommo; at iinniinsi daphphiteena xantooyyo. Qophpha'n waa'ina otossitaa saa'imminne haashaarantaatto» yukko.

⁴Saa'immi mixan Isra'ee'l oos lambe'enne yoo bikkinaa Waa'am laqqambee'i bikkinaa Waa'i kollonne daba'llitona ixxuwwi bax uwwooyyo.

⁵Ixxuwwi bolxoom ixxuwwannem naqqasookko. Ixxuwwi baaxiilim ixxuwwina qolat ihaa ubbuusookko. Yihuxxi minaadabim ixxuwwinne maqire qolanta'a ubbamo.

⁶Kitima hincaa'lleena gereebbaa laroo ushe'lla'a Waa'a hasseena mattamo. Ihukkaarem Waa'i ixxuwwiinsi annanni ihu bikkina siiddamoyyo.

⁷Ixxuwwi gagoomim qophpha'n waa'uwwina otossitaman ihu bikkina Waa'ina amma'nnanto'oo keen hee'llo'oyyo. Ixxuwwi oosim qophpha'n waa'uwwi oos ikko'ookko. Ee bikkina ka aga'n aagganne ixxuwwi uullinne maqirem bi'llamo.

⁸Minaadab orina firona Gaba'oonanne buuxxi xurumba Iraama'annem xaa'l xurumba fuggehe. Beeti'aawe'ennem «Biiniyaam sullo, neese kiinninnette» yitakku'uuyyi laallehe.

⁹Guzumo'amanchi balla Isra'eel udma'i ihookko; oo gindanchim Isra'ee'l sulli hundannem afoo'isna hanqoomam an qoodaammoohane.

¹⁰Waa'i «Yihuxxi awwonsaan Isra'ee'lleka gabala gindoo mannisa ikko'ookko. Ee bikkina an i quunqa ixxuwwanne daadoo dirisisa fatakoommo.

¹¹Isra'eel awwaad bee'i luwwa awwonu bikkina wor amadanchii hanqa hoogimmii afukko.

¹²Ee bikkina an Efireemina buutumbuutisa, Yihudinam wonatisa ihaammo.

¹³Isra'eel jabbukkisa Yihudim madukkisa la'u ammanenne Isra'eel ixxi ille Aasoo'l kolli dabarukko. Hara'mmatinam lob adi'l beyyo maanna asse'ukko. Ihukkaarem ixxi gatiseena te'im ixxuwwi mada fayyiiseena xanukkoyyo.

¹⁴Eehanniinsi ki'aa Isra'eela hobbichchisa, Yihudam hobbichchi geexisa ihaa iiqansaa maroommo; malaayyinnem massoommo; ayyim i angiinsi gatiseena xanooyyo.

¹⁵Ixxuwwanne hawwi lophphoo ammane eese hassamo. Ee bikkina baxxo'i baaxiilo qoossita'a i kollonne daba'lliteebe'e an ixxuwwiinsi qee'lloommo» yukko.