Read Hadiyya Hoose'i Kitaaba 6 Bible Online

Hoose'i Kitaaba 6 - Hadiyya bible

Hoose'i Kitaaba 6

¹Minaadab «Waallehe, ni Waa'i kollonne daba'llinona. Ixxi neese iiqaakko; ihukkaarem fayyiisookko. Ixxi madisaakko; ihukkaarem ni mada fayyiisookko.

²Ixxi illagenne foorinne hee'nnona lam balli lasage neese areesookko; saxxi ballannem ki'isookko.

³Waallehe; ni Waa'a lanqona; lonsinaa lanqeenam hansona. Ixxi soodaraa'l caakkisaa uulla aashisoo qaraaxonne ga'nnoo xee'nnisaa hanqo'isam ni kolli waarookko» yoolla.

⁴Waa'i «Isra'eelaa Yihuxxi minaadabaa! An ki'nnuwwa maha isso? Ki'nnuwwi eese iittitakkam iitti soodaraa'l umbu'llisaa da'l qiibaxxisaa qaqqisaa bi'ookko.

⁵I hiraagaaninnette ihaa bi'isoommisaa i sagarinnem shoomman ihukkisaa qoxxisaa kuraammo. Ee bikkina i oogat soodaraa'l caakkisa caakkisookko.

⁶An kitimiinsi lophphaa daba'llamoobee'i iitto iittoommo. Shokkiisakka'a hincaa'akkam kitimiinsim eese la'imma doo'lloommo.

⁷«Ixxuwwi Addaam yakkam uulla aaggo'i ammane iinninne aaggo'i hidi'l sagara gindito'ookko. Iina amma'nnantambee'an ikko'isam la'isso'ookko.

⁸Gala'aad boqqi mannii manna shoo mannii wo'mmaakkoo beero'i ihaakko.

⁹Gafanni manna shiteena duggamisa qeessuwwim ee'isa issitamuulla. Seekeema marakkam googonne duggu'uuyyi manna shitamuulla; tuussiisoo damigom issitamuulla.

¹⁰Lobakata hiriraa'oo luwwa Isra'ee'l minaadabanne moo'aammo. Oohim minaadab qophpha'n waa'ina otossimminne haashaatto'ookko.

¹¹«Yihuxxi minaadaba, ki'nnuwwanne an oogaxxi balla qoodaammo.