Read Hadiyya Hoose'i Kitaaba 7 Bible Online

Hoose'i Kitaaba 7 - Hadiyya bible

Hoose'i Kitaaba 7

¹«I minaadaba Isra'eela fayyiiseenaa odim daba'llita'a amaxxinne godditamisa isseenaa hasummi ammanenne i minaadaphphi hawwojjii Samaare'i manni boqqoomii caakkaa la'amookko. Ixxuwwina'i ixxuwwim qophphano woccamo; mine iiqqu'uuyyi game'llamo. Gaalchi ikka'atim goog hundannem boggamo.

²Ihukkaarem an ka ixxuwwi jolle hundam la'oomman ihukkisa hore'em qoossitamoyyo. Eehanniinsi ki'aa ixxuwwi gaqqi baaxiilinnem kibbanto'ookko. Ixxuwwik jor bax hundim iinniinsi daphphaakkoohaneyyo» yoolla.

³Waa'i «Ixxuwwi adilaa ixxuwwi jollinne, daannuwwaa qophphaninne liiransitamuulla.

⁴Ixxuwwi hundim saa'aano. Ixxuwwi buko'i hufeebe'e daabbo'o saroo manchi giira giirimmi hasisoobee'i iibbu midachchisa.

⁵Gassaan ixxuwwi adi'l uguxxi ballanne lobakat woyi'n diqaasa agga'a dimbita'a xissito'o. Saroo manchim[9] ixxenne naacantam mannina mare'e uwweena ixxi anga biddiqaa'ukko.

⁶Ixxuwwik wodan dollottimmina midachchisa iibbaakkoohane. Ixxuwwi quunqi hiimooma hundam wiriirukkuuyyi garookko; ihukkaarem soodoohaare aphphoo gii'llisa bubbookko.

⁷Ixxuwwi hundim quunqinne midachchisa iibbita'a gassaano bi'isso'o; adilluwwam korinne korinne guullito'o. Ku hundim ihukkuuyyi ixxuwwiinsi matim iinniinsi hara'mmito xa'mmukkok bee'e» yoolla.

⁸Waa'i «Isra'ee'l minaadab mulli minaadabinne hamaaranto'o. Ee bikkina ixxuwwi dabaramubee'i qorosho'isa awwaad bee'i keen ikko'ookko.

⁹Allaggi manni ixxuwwi malaayye guullito'o; ihukkaarem ixxuwwi qoossito'oyyo. Abo'i bexbexximma asheeraakko; ihukkaarem ixxuwwi qoossito'oyyo.

¹⁰Isra'ee'l minaadaphphi bolxoom ixxuwwi gagannem naqqasoolla. Oo hundim ihaa ixxuwwina Moollanni ihummi i kollonne daba'llito'oyyo; eesem hore'em hasso'oyyo.

¹¹Isra'ee'l minaadab handarekkichchisa maashaallaa horoor bee'i minaadabaa ikko'ookko. Ee bikkina agaagina mataa'lle Gibxi kolli laattamo; mataa'lle odim Aasoo'l kolli barattamo.

¹²Ixxuwwi daba'llantam beyyi hundannem an i shikka qaashaa cii'isa amadoommo; baxxo'i jollisinnem ixxuwwa guzumo'oommo.

¹³Iinniinsi qee'llita'a matto'oo bikkina ixxuwwina aayye! Eesenne boqqito'i bikkina ixxuwwanne bichchi waarona. An ixxuwwa gatiseena hasaa hee'ummo; ihukkaarem ixxuwwi i hanenne qophphano woccamuulla.

¹⁴Ara'anne dufamaa laaramookko bagaan wodaninne eese uunxamooyyo. Itamoo hurbaataa woyi'n diqaasaa siidameena orachcho dereeransamookko; eesennem ki'amookko.

¹⁵Ixxuwwa losisummokii malaayyi qoxxoo'isa issummokii anette. Ihukkaarem ixxuwwi i hanenne dollottamo.

¹⁶Iinniinsi qee'llita'a qophpha'n waa'ina otossiteena matto'o. Elela huushu boqqi xiyyisa ikko'ookko. Ixxuwwi gassaanim jor woshsha woccamaanniinsi ki'aa bisa'inne letamo. Gibxi uulli manni illagennem naacanchina ikkamo» yoolla.