Read Hadiyya Hoose'i Kitaaba 8 Bible Online

Hoose'i Kitaaba 8 - Hadiyya bible

Hoose'i Kitaaba 8

¹Waa'i «I hidi'l sagaraa Seeraa gindito'i bikkinaa i minenne diina'i goolluunsichchisa do'u bikkinaa qoxxishshi xurumba fuggehe» yoolla.

²Ixxuwwim «Moollanna, neese ki minaadab keese lanqoommo» yitu'uuyyi i kolli laattamo.

³Ihukkaarem Isra'ee'l minaadab er luwwa sabbo'i bikkina diina'i hollookko.

⁴Ixxuwwi i doo'l bee'ekam adilluwwa doo'llito'ookko; eese xa'mmitoo'nnim daannuwwa doo'llita'a daannooma uwwito'ookko. Kin birinnee worqinnee ixxuwwi gaqqi bichchina ihoo qophpha'n waa'uwwa baxxo'o.

⁵Samaare'i minaadaba, addichchi misilanne baxamu ki'nnuwwi qophpha'n waa'a an sabaammo. I quunqi ixxuwwanne gii'llisa aphphookko. Ixxuwwi jolliinsi muccuttambee'ek hinki balli afeebe'e?

⁶Oohim Isra'eelanne ihukkane; angi lachchi manni baxukkok Waa'ayyo. Ee bikkina addichchi hagaranne baxamu Samaare'i uulli waa'i iiqamaa ubookko.

⁷Ixxuwwi hafachcha wixaa hambu'llama muroohaannisa ikkamo. Shog bee'i agad hurbaat iheena xanooyyo. Mish hee'uta'nnimii itoo keen allaggi ihookko.

⁸Isra'ee'l minaadab hanqo'i Waa'a laqqambee'i manni lambe'enne xuuxamaa gataakko. Awwaad bee'i mu'uxxisam ihaakko.

⁹Mullam karkaadoo udma'i uulli hallichchisa Aasoo'l uulla matto'o; ixxuwwa egettonam bito miqqa'a adilluwwa qooxxaqqito'o.

¹⁰Adilluwwa qooxxaqqiteena bito miqqota'nnimii an mat issaa wixxaa'oommo. Adilluwwii daannuwwii ixxuwwa wor amaddam bikkina ciittu'uuyyi mattamo.

¹¹Isra'ee'l minaadab lobakat kiti'm beyyuwwa baaxiilo haafixxi bikkina yita'a baxxo'ookko. Ihukkaarem oo kiti'm beyyuwwi baaxiilo baxakkam beyyuwwi ihaakko.

¹²An ixxuwwina Seeriinsi lobakata kitaabaa uwwummo. Ihukkaarem ixxuwwi eekka haareechchi luwwisa xiggo'o.

¹³Ixxuwwi iina doo'llamaakkoo kitima hincaa'llo'aaree kiti'm maara itto'ta'nnimii an Waa'i eekka aa'oommoyyo. An kaba ixxuwwika hawwojja sawwaa ixxuwwi baaxiilinne ixxuwwam guzumo'oommo. Gibxi uullam daba'llitamo.

¹⁴Isra'ee'l minaadab ixxuwwi gagina geejji geejji adilla'n minneewwa baxxo'ookko. Ihukkaarem eese ixxuwwi qooccaancho xaddo'ookko. Yihuxxi minaadabim girbamaakkoo lobakat beero'uwwa baxxo'ookko. Ee bikkina ixxuwwika beero'uwwaa girbuwwaa shokkiisoo giira an asse'oommo» yoolla.