Read Hadiyya Hoose'i Kitaaba 9 Bible Online

Hoose'i Kitaaba 9 - Hadiyya bible

Hoose'i Kitaaba 9

¹Isra'ee'l minaadaba! Oodo'i hundannem hee'oo saa'immika bito Ba'aal uwwoo maasso labissakka'a iittitakkamo. Ki'nnuwwim eekka issimminne ki'nnuwwi Moollannina amma'nnanchi bee'i keen ikkakko'ookko. Ee bikkina ki'nnuwwim mulli minaadabisam liiramimmaa lobakata liiramimmaa ullehe.

²Ee bikkina kanniinsi eehid ki'nnuwwi oodo'iinsi hurbaata, ciinsakkam beyyiinsim woyi'n diqaasa hore'em siiddakkamoyyo. Haareechchi woyi'n diqaasim hee'ooyyo.

³Isra'ee'l minaadab Waa'i ixxuwwina uwwu uullanne hee'llamoyyo. Ihukkaarem giddinne odim Gibxa daba'llita'a mattamo; Aasoo'l uullam matta'a see'llisinne muccurubee'i hurbaata ittamo.

⁴Waa'inam eekke'enne woyi'n diqaasa kitim issita'a hincaa'lleena xantamoyyo. Hincaa'llam kitimim Waa'a liiransoobee'ane. Ixxuwwik hurbaat sibaattam ammane ittamane bagaan Waa'i mi'n kitim ihaa hincoohaneyyo. Ee bikkina ixxuwwina see'l waasisa ihookko; itookkok hundim haashaaramookko.

⁵Eehannah Waa'i ugudduwwannee ki'nnuwwi hiinchi ugudduwwannee maha issitakkamo?

⁶Oono'o, bichchiinsi xotteena gibbam ammane Gibxi wixxaa'ookko. Meemfoosim waammookko; wixxaa'llo'i kin bi'l amaxxanne doobbi mutookko; ixxuwwi dukkaanneewwannem utti mutookko.

⁷Bichchi balli afaakko; Isra'ee'l oosim baado miqisimmi balli afukkisa laqqona; ki'nnuwwi hawwojjinnee wocanchi mashka'innee hiraagaancho qawwisa, Waa'i Ayyaan yoo manchom machchaaraanchisa xiggakkamo.

⁸Waa'i Isra'ee'l minaadabina hiraagaanchi egeraanchi ihoo'isa issaakko. Ihukkaarem goog hundannem qaash qaashamaakko; ixxi Keesammi Minennem wocanchi egeraakko.

⁹Isra'ee'l minaadab Gaba'oon doollenne hee'llo'i mannisam lobakata haashaatto'ookko. Waa'im ixxuwwika hawwojja sawwaa baaxii'l bikkina guzumo'ookko.

¹⁰Waa'i «Isra'eela siidummi ammane woyi'n misha udma'i uullanne siidummaannis hee'ukko. Ki'nnuwwi gaassi anno'o moo'ummi ammane odakkichchika mishiraachchi misha moo'ummaannis hee'ukko. Ihukkaarem ixxuwwi Ba'aal Phee'oora affa'a lasage ixxuwwi gaga ee tuussiisoo qophpha'n waa'ina annanni issita'a hincaa'llo'o. Ixxuwwi gagim ee iittitam qophpha'n waa'isam haashaaranto'oo keen ikko'o.

¹¹Isra'ee'l minaadaphphi lobaannoom cii'isa bararaa bi'ookko. Kanniinsi eehid ixxuwwina lamfoor ihimmii qarimmii hee'ooyyo.

¹²Ooso qatta'a li'issota'nnim ixxuwwa hundam shoommi bikkina oos bee'an ikkamo. An ixxuwwiinsi qee'lloommi ammane ixxuwwina aayye» yoolla.

¹³Isra'eela harish uullanne kaasamu dimbaaphphi haqqisa ihaa moo'ummo. Ihukkaarem ixxuwwi ixxuwwi ooso durina hincaa'llo'o.

¹⁴Moollanna, ka minaadabina qachchi umuu'mmoobee'i goosaa gogaalli anuunaa uwwe!

¹⁵Waa'i «Gelgelanne hee'llu'uuyyim baxxo'i jor bax mashka'inne an eekke'ennem ixxuwwa sabummo. Baxxo'i jor bax bikkinam i miniinsi fissoommo. Kanniinsi eehid ixxuwwina i iitto moo'isoommoyyo. Ixxuwwi awwonsaan hundim boqquwwi ikko'ookko.

¹⁶Isra'ee'l minaadab hafachchi aphphisukkaannisa, xaph gogukkaannisaa misha mishoobee'i haqqichchisaa kora'am gattamo. Ooso qattota'nnim lobakata iittitam ixxuwwi ooso an shoommo» yoolla.

¹⁷Ixxena ijaajantobee'i bikkina i Moollanni ixxuwwa uunjookko. Ixxuwwi mulli minaadaphphi lambe'enne karkaaddu'uuyyi hee'llamo.