Read Hadiyya Iyyoo'eel Kitaaba 1 Bible Online

Iyyoo'eel Kitaaba 1 - Hadiyya bible

Iyyoo'eel Kitaaba 1

¹Baatu'eel beet Iyyoo'eel beyyo waaru Waa'i sagar kane.

²Lommanni kaka macceessehe; Yihuxxi uullanne hee'llakkam keen hundim qoossehe. Ayyi la'ukko ki'nnuwwi doollenne te'im ki'nnuwwi anno'i doollenne kuk ihaa la'oohonnihe?

³Ka woshsha ki'nnuwwi oosina kullehe. Ki'nnuwwi oosim ixxuwwi oosina kuttona ixxuwwim ixxuwwi lasaqqi qaranchina kuttona.

⁴Daquuriinsi gatu wix hurbaata hishshoo qawwaawwi itukko; daquuriinsi gatu wix hurbaata wiisho'isa dilloo qawwaawwi itukko. Eehanniinsi gatukkoka odim guullaa bi'isoo qawwaawwi itukko.

⁵Kanniinsi eehid haareechchi woyi'n diqaasa ki'nnuwwi suumenne nakkitakkambee'i bikkina dimbaano, baqitakka'a wi'llehe; woyi'n diqaasa aggakkam keen hundim aayye yi'llehe.

⁶Xigakka'a xanakkambee'i malaayyaam manni ni uullanne firaakko. Inqim hobbi inqi'nnoo'i qare'aalla. Gaangeerim meentichchi hobbichchi gaangee'llisa.

⁷Oo manni niikka woyi'n kaashsha hundam bi'isukko; oda'am muransukko; caaffuwwi qadaalleebe'i afeebe'em hobara coo'aa bi'isukko.

⁸Ee bikkina Woraadda'n amma'n beet lehu idaayyichchosa xiddi eddechcha edde'llakka'a wi'llehe.

⁹Keesammi Minenne kitim ihaa hincoo hurbaatii woyi'n diqaasii bee'u bikkina Waa'ina awwaadaan ikko'i qeessuwwi wi'llitamuulla.

¹⁰Abuulli uulli udma'i uullisa ihaakko; hurbaat bi'aakko; woyi'n kaashshim gogaakko; zaytim beeddaakko; ee bikkina uulli wi'lloolla.

¹¹Aras, so'ii mulli hurbaatii hundim bi'u bikkina abuullaan kichche'llehe; woyi'n kaashshi yoo keenim aayye, yi'llehe.

¹²Woyi'n kaashshi, oda'ii itakkam mulli haqqi mishii hundim gogaakko; liiranchim manni oosiinsi qee'llaakko.

¹³Ki'nnuwwi Waa'ina kitim issitakka'a hincaa'llakkam hurbaatii woyi'n diqaasii bee'i bikkina kiti'm beyyonne Waa'ina awwaaddakkam qeessuwwi xiddi eddechcha edde'llakka'a hiimooma hundam wi'llehe.

¹⁴Soommano alallaattehe; minaadaba dummichchina weeshshehe; lommannaa Yihuxxi uullanne hee'llam minaadab hundamii ki'nnuwwi Moollanni Waa'i mine weeshshehe; ixxi kollonnem laallehe.

¹⁵Moollan balli hincaakko; Hundam xanoo Waa'iinsi bichchi balli waarookko; ee balli bikkina aayye!

¹⁶Hurbaat ni illagiinsi bi'aakko; ni Waa'i miniinsim liiranchii ilillaatii bee'aakko.

¹⁷Wixamu hurbaat uullanne shamaa gataakko; atoot bee'i bikkinam sechchuwwi diihaakko; gootalluwwim gindamaakko.

¹⁸Allaa'lloo hixe hoogu bikkina diinat laaroolla; gereebbim sibaarinne u'nnamoolla.

¹⁹Waa'a, allaachchi uulli hixee doo'm haqqaa giir itaa bi'u bikkina an ki kollonne laaroommo.

²⁰Wo'ii hixii gogu bikkina moochchi hundim ki kollonne laaroolla.