Read Hadiyya Iyyoo'eel Kitaaba 2 Bible Online

Iyyoo'eel Kitaaba 2 - Hadiyya bible

Iyyoo'eel Kitaaba 2

¹Keesammi Waa'i duunanne Xiyoonanne ikkakka'a xurumba fuggehe; laachchi sagaram macceesissehe. Moollanni balli hincu bikkina Yihuxxi minaadab hundim huxe'ona.

²Oo balli tuunsi ballaa witriichchi ballaa; gambabbi tuunsi ballaa duubaam ballaa. Xigo lobakataa malaayyaamoo ihaakkoo qawwaawwi gogot duunnuwwa ifiisoo tuunsisa ihaa waaraakko. Eehido'i luwwi illaggee'n doollenne hee'ukkoyyo; waaroo doollennem od hee'ooyyo.

³Ee gogoxxi illaginne gii'llisa aphphookko; lasim laba'nnisa shokkiisookko. Ixxuwwi illagenne yoo uulli Eden gannattisa. Ihukkaarem ixxuwwi las udma'i uullisa; ixxuwwiinsi gatoo luwwi mahim hee'ooyyo.

⁴Ixxuwwi hagar faraxxi haga'llisa; geellichchim o'l faraxxisa.

⁵Duunnuwwi ludonne xophxophukkuuyyi faraxxi gaare'isa gugookko. Bura'a itoo gii'llisa hundi luwwam shokkiisookko; orina gudu malaayyaam gogoxxisa marookko.

⁶Ixxuwwi illagenne manni hundim huxe'ookko. Illi hundim heemachchookko.

⁷Geedduwwisa dangissa'a qassamo; gaadaa'nnisa oottuwwa caallitamo. Annannichchim ixxi googo amadaa marookko; ekkidii kidii daba'llamooyyo.

⁸Mat mullaanninne gafe'amooyyo; annannichchim googo amadaa marookko; diina'i ora iiqaa higookko; ihukkaarem ixxuwwa mahim hawwodooyyo.

⁹Beero'i lambe'enne geerantamo; oottuwwa caallitamo. Minneewwanne fittamo; gamaa'nnisa maskoottuwwinne aaggamo.

¹⁰Ixxuwwi illagenne uulli huxe'ookko; Iimannuwwi shafshafookko. Eelliinchii aganii tuunsookko; Boollaanki caakkim bi'ookko.

¹¹Waa'i baddisoo sagarinne ixxi gogota ijaajookko; ixxena ijaajantam gogoxxek xig lobakataa malaayyaammuwwaa. Waa'i balli hanqinam lob ballaa baddisoohanee! Ee balla ayyi qoxxaa uulleena xanookko?

¹²Ee bikkina Waa'i «Kabadem soommanimminne, wi'llimminnee kichchechchinnee ki'nnuwwi wo'm wodaninne i kollonne daba'llehe.

¹³Ki'nnuwwi wo'm wodaninne i kollonne daba'llehe bagaan eddechcha dereettakkotte» yoolla. Ki'nnuwwi Moollanni Waa'i kolli daba'llehe; ixxi biijaallaa haafoohanee; Iittim heer heerinattee quunqinam gaaggaaboobee'annee; ixxi iyyaqqoohane bagaan jor luwwa isseena gaaggaaboobee'ane.

¹⁴Ayla'ukko quunqiinsi daba'llaa Moollan Waa'i lobakat maasso ki'nnuwwina uwweena xanookko; ee ammane hurbaaxxekkaa woyi'n diqaasikaa kitima ixxena hincaa'llakkammo.

¹⁵Xiyoo'n duunanne xurumba fuggehe; soommanina alallaattehe; minaadaba keesammi dummichchina weeshshehe.

¹⁶Minaadaba wixxaa'llehe; dummichcham keessehe; lommannam weeshshehe; anuuna iicoo oos gatoo'n ciilluwwa hundam wixxaa'llehe; idaayyuwwim dumiinsi firona.

¹⁷Waa'i illagenne awwaaddam qeessuwwi kiti'm beyyinaa Keesammi Mine aagakkam goocinaa lambe'enne ikka'a wi'llitu'uuyyi uunxitona. Ixxuwwim «Moollanna, ki minaadabina qishixxe. Keese laqqambee'i minaadab ‹Ki'nnuwwi Waa'i hannonnette?› yitu'uuyyi neesenne naacantamisaa osattamisaa issititte» yitona.

¹⁸Waa'i ixxi uullina to'achchu bikkina ixxi minaadabina qishixxukko.

¹⁹Ee bikkina «Oono'o, hurbaata, woyi'n diqaasaa wee'l zaytaa godditakkeebe'e uwwoommo. Kanniinsi eehid eese la'obee'i minaadab gadoo'isa issoommoyyo.

²⁰Hanaa'n qarinne waaroo qawwaawwi gogota ki'nnuwwiinsi qeessoommo; udma'i uullanne aad qaala'anne holloommo. Illaqqi kollo Sooqixxi Dambalaq kolli lasaqqi kollo odim Meedeteraaniyaa'n dambalaq kolli holloommo; eekke'enne ixxuwwik leesh boboo'isa issoommo. Ixxuwwi ki'nnuwwanne kee'mmaalli hawwo afisso'i bikkina ixxuwwa guullaa bi'isoommo» yukko.

²¹«Uullanne hee'llakkam minaadaba, badditakkotte; Waa'i kee'mmaalli luwwa issu bikkina liirammehe; lobakata liirammehe.

²²Uullanne hee'llakkam fooraam luwwi hundim baa'llakkotte. Ki'nnuwwi allaa'llittakkam beyyuwwi hixaakko; haqquwwim mishaakko; oda'ii woyinii erisa mishaakko.

²³«Xiyoo'n minaadaba, ki'nnuwwi Moollanni Waa'anne liirammehe; lobakatam liirammehe. Ixxi illagee'n xeena muccuroominne ga'nnisaakko; gaassisam illagee'nnekaa lasaanchikaa xeena goddisaa ga'nnisaakko.

²⁴Oodo'uwwi hurbaaxxi atootinne wo'mmookko; woyi'n diqaasii wee'l zaytii ciinsakkam beyyonne wo'mmaa daadookko».

²⁵An illagee'n doollenne ki'nnuwwanne asse'ummaare o'l gogoti'nnoo'i hishshoo qawwaawwi, dut qawwaawwii daquurii itaa bi'isu luwwi hundam ki'nnuwwina dabaroommo.

²⁶Godditakkeebe'e ittakkam lobakat hurbaata uwwoommo; lobakata maalalsiisoo luwwa ki'nnuwwina issummi eese ki'nnuwwi Moollanni Waa'a galaxxitakkamo; ka lasage i minaadabanne sholle'n afooyyo.

²⁷Isra'eela, an ki'nnuwwi lambe'enne yoommisa, ki'nnuwwinam Moollanni ihummisaa iinniinsi bagaan mulli Waa'i bee'an ihukkisaa laqqakkamo; ka lasage i minaadabanne sholle'n afooyyo.

²⁸Waa'i «Ee lasage iikka Keesammi Ayyaana mannanne hundannem ga'nnisoommo; ki'nnuwwik goo'n oosii landii hiraago wocookko; lommannim haqaawwo haqaawwe'ookko; woraadim kaalta mo'ookko.

²⁹Odim ee doollenne iina awwaaddam goo'n oosonnee landannee Keesammi Ayyaana ga'nnisoommo.

³⁰«Maalalsiisoo aganni iimanennee uullannee ihoo'isa issoommo; xiigii giirii, utuphphisa uullaakkoo wiriirii ihookko.

³¹Lob baddisoo Waa'ik balli waaroo'n gaassaa eelliinchi tuunsookko; aganchim xiiganne daba'llookko.

³² Waa'ika summa weeshookkok hundim gatookko; Waa'i wocukkisannem Xiyoo'n duunannee Yerusaaleemannee qaraar siidamookko; cuungi kee'n lambe'ennem Waa'i weeshu keen hee'llamo» yoolla.