Read Hadiyya Iyyoo'eel Kitaaba 3 Bible Online

Iyyoo'eel Kitaaba 3 - Hadiyya bible

Iyyoo'eel Kitaaba 3

¹Waa'i «Ee ammane Yihuxxekaa Yerusaalee'mmekaa qeefadanta'a hee'llam minaadaba dabaroommo.

²Eese laqqambee'i minaadab iina sharad ihu Isra'ee'l minaadaba mulli minaadaphphi lambe'enne binnaa'llo'ookko; i uullam baxxanto'ookko; ee bikkina ixxuwwa wixxaa'aa Yoosaafiix cebbanne dilliisoommo; eekke'em ixxuwwanne oogatoommo.

³I minaadabam baxxanteena saammo issaqqanto'ookko; goo'n ooso bushaallooma baxoo meentinne dabassito'ookko; landam woyi'n diqaasa aggeena agiddanina biteesso'ookko.

⁴ «Ki'nnuwwi Xiiroosanne, Siidoonannee Filisxee'm uullannee hee'llakkam minaadaba, ki'nnuwwinne maqire iina mah hee'aate? Baado miqissakkeena hanqoomam hassakka'ahinnihe? Eekka sawwitakko'oohan ihulas an ki'nnuwwa gaassaa issoommo.

⁵Iikka bira, worqaa bito xee'aalli mu'uttuwwaa ki'nnuwwi waa'uwwi minneewwanne massitakka'a dissitakko'ookko.

⁶Yihuxxekaa Yerusaalee'm minaadabaa ixxuwwi uulliinsi qeessitakkeena Giriik uulli mannina biteessakko'ookko.

⁷Oono'o, kaba an ixxuwwa biteessakko'i beyyi hundiinsim dabaroommo; ixxuwwanne issitakko'i barche'e hundam ki'nnuwwannem issoommo.

⁸Ki'nnuwwika goo'n oosoo landaa Yihuxxi minaadabina higisaa uwwoommo. Ixxuwwim qee'l uullanne hee'llam Saaba'i mannina biteessamo. Kaka wocummok an Waa'a.

⁹«Ka woshsha mulli minaadabina alallaattehe; orina guddehe; geedduwwam ki'isansehe; o'l manni wixxita'a orina fittona.

¹⁰Ki'nnuwwika maarasha bisa'i issitakka'a jajjaram bagad issitakka'a baxxehe; hoogaanchim ‹An qoxara› yihona.

¹¹Ki'nnuwwi ee kululleetanne yoontakke'i mulli minaadab hundim qaqqissakka'a fillehe; ee cebbannem wixxi'llehe. Waa'a, kiikka o'l gogota eekke'e asse'e.

¹²«Mulli minaadab hundim gudda'a Yoosaafiix cebba dillitona; an Waa'i ee kululleetanne hee'llam mulli minaadab hundannem oogateena ee beyyonne afuuroommo.

¹³Ixxuwwik jolli hore'em lophphaakko; ee bikkina hurbaata jajjarinne murakkamisa mullehe; woyina ciinsakkam beyyiinsi wo'mmoohaare hance'akkamisa hancaacammehe» yoolla.

¹⁴Moollannik balli oogato'i cebbanne ihoo balli afu bikkina lobakata dut minaadab ee beyyonne dummaakko.

¹⁵Ee balla eelliinchii aganchii tuunsookko; boollaanki caakkim hee'ooyyo.

¹⁶Waa'i Xiyoo'n duunanne ihaa gugookko; Yerusaaleemiinsim baddisoo sagara macceesisookko. Uullii iimanii heekke'ookko. Ihukkaarem Waa'i Isra'ee'l minaadabina girbi ihookko.

¹⁷Waa'i «Isra'eela, ee ammane an ki'nnuwwina Moollanni Waa'i ihummisaa keesamaakkoo Xiyoo'n duunanne hee'oommisaa laqqakkamo. Yerusaaleemim keesamaakkoo beero'i ihookko; kanniinsi eehid allaggi manni hancaacamooyyo.

¹⁸«Ee ammane duunnuwwi hundiinsim haareechchi woyi'n diqaas daadookko; hoffi duunnuwwiinsim ad daadookko. Yihuxxi uulli cebbuwwinne hundinnem wo'i daadookko; Keesammi miniinsim bu'i firookko; Shiixii'm cebbam aacisookko.

¹⁹«Gibxi uulli udma'i uulli ihookko; Edoomim manni hee'oobee'i uulli ihookko. Mashka'oomim Yihuxxi minaadaba barche'e issito'ookko; ixxuwwi uullannem muccur xiiga daassito'ookko.

²⁰Ee bikkina an kabee'e afeebe'e miqisumbee'i muccur kee'n xiiga miqisoommo. Yihuxxi uullii Yerusaaleemii heer heerina i minaadabina heechchi beyyi ihookko. An Waa'im Xiyoo'n duunanne hee'oommo» yoolla.