Read Hadiyya Amoox Kitaaba 1 Bible Online

Amoox Kitaaba 1 - Hadiyya bible

Amoox Kitaaba 1

¹Ooziy Yihudanne, Yoo'aas beet Yoorbi'aamim Isra'eelanne adilluwwi ikka'a hee'llo'i doollenne Taqo'anne hee'llam allaaraaniinsi mat hee'u Amoox uulli huxe'eena lam hiinchi hee'ukkuuyyi Isra'ee'l bikkina wocu hiraaqqi sagar

²«Waa'i Xiyoo'n duunanne ihaa hobbichchisa baddisoo sagara macceesisoolla; Yerusaaleemanne ihaatim gugoolla. Allaachchi beyyi hix gogookko; Qarmeeloos duu'n ludonne yoo lat hundim gogookko» yukko.

³Waa'i «Damaasqo'i beero'i minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwi Gala'aaxxi minaadaba xaa'l shafe'inne barche'e issito'ookko.

⁴Adil Hazaaheel adilla'n minenne giira xanqisoommo; oo giirim adil Benhadaad baxisu girbuwwa shokkiisookko.

⁵Damaasqo'i beero'i ooxxi gooccuwwa iiqoommo; Awee'n cebbanne hee'llam minaadabaa Beeti'eede'n gassaanchoo bi'isoommo; Sooriy minaadabim qeefadamaa Qiira maroo'isa issoommo» yoolla.

⁶Waa'i «Gaaza'i beero'i minaadab edaa edaa baxu baaxii'l bikkina hanqo'isam guzumo'oommo; mashka'oomim minaadaba hundam qeefadda'a Eedoo'm mannina higissa'a uwwito'ookko.

⁷Ee bikkina Gaaza'i beero'i qashanne giira xanqisoommo; oo giirim ee beero'i girbuwwa shokkiisookko.

⁸Ashdooxxi minaadabaa Asqaloo'n gassaanchoo bi'isoommo; Eeqiroo'n beero'i minaadaba guzumo'oommo; gatto'i Filisxee'm minaadabim letamo» yoolla.

⁹Waa'i «Xiiroos beero'i minaadab edaa edaa baxu baaxii'l bikkina hanqo'isam guzumo'oommo; mashka'oomim aaggo'i abbaayyoo'm hidi'l sagara gindita'a qeefaddo'i minaadaba Eedoo'm mannina higissa'a uwwito'ookko.

¹⁰Ee bikkina Xiiroos beero'i qashanne giira xanqisoommo; oo giirim ee beero'i girbuwwa shokkiisookko» yoolla.

¹¹Waa'i «Eedoo'm minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwina abbaayyuwwi ikko'i Isra'ee'l ooso amadda'a lasagem qishixxito'oyyo; bisa'innem hollito'ookko; ixxuwwi quunqim billeena xanukkoyyo.

¹²Ee bikkina Teemaa'n beero'onne giira xanqisoommo; oo giirim Booxir beero'i girbuwwa shokkiisookko» yoolla.

¹³Waa'i «Amoo'n minaadab edaa edaa baxu baaxii'l bikkina hanqo'isam guzumo'oommo; ixxuwwi uullika gasso haraassiteena Gala'aaxxi uulli lamfoor meentika godabo dereetto'ookko.

¹⁴Ee bikkina Raaba'i beero'i qashika goocaa girbuwwaa giirinne shokkiisoommo; ee lasage or ihoo balla laachchii dambaqii ihookko; orim hambu'llam hafachchisa ihookko.

¹⁵Ixxuwwi adilii ixxi suu'm mannii qeefadantamo» yoolla.