Read Hadiyya Amoox Kitaaba 2 Bible Online

Amoox Kitaaba 2 - Hadiyya bible

Amoox Kitaaba 2

¹Waa'i «Moo'aaphphi minaadab edaa edaa baxu baaxii'l bikkina hanqo'isam guzumo'oommo; ixxuwwi Eedoo'm uulli adi'lleka miqe gii'lbuchchi iheebe'e shokkiisso'ookko.

²Ee bikkina Moo'aaphphi uullanne giira xanqisoommo; Qiiriyoot girbuwwam shokkiisookko; gaadaa'n sha'llanchiinsi, shuuriinsii xurumbulli sagariinsii ki'ukkok Moo'aaphphi manni beedtamo.

³Moo'aaphphi uulli gassaano adilinne maqirem shoommo» yoolla.

⁴Waa'i «Yihuxxi minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwi i seera gindito'ookko; i ijaajom egetto'oyyo; ixxuwwi anno'i otossitam hee'llo'i qophpha'n waa'uwwanne ixxuwwim huushanto'ookko.

⁵Ee bikkina Yihuxxi uullanne giira xanqisoommo; oo giirim Yerusaalee'm beero'i girbuwwam shokkiisookko» yoolla.

⁶Waa'i «Isra'ee'l minaadab edaa edaa baxu baaxii'l bikkina hanqo'isam guzumo'oommo; mashka'oomim ixxuwwi muccur keeno birina, buxa kobe'ina biteesso'ookko.

⁷Buxika horoore buchchanne edda'a hance'llamuulla; hoogaa'nneka hanqa bi'issamuulla; annii beetii mat meentichchonne iinse'llamuulla; ee'isinne keesamaakkoo i summa haashaassitamuulla.

⁸Badano miqqa'a xantobee'i manniinsi dabba'a amaddo'i eddechchanne kitima hincaa'akkam beyyi hundannem iinse'llamuulla; bada'n manniinsi dabba'a massito'i woyi'n diqaasa ixxuwwi waa'uwwi minenne aggamuulla.

⁹«Ihukkaarem an uullichchi Liibaanoos digiphphisa, malaayyim wee'l haqqisa qoxxaakkoo Amoore'i manna luguminnem xoqolaa bi'isaammo.

¹⁰Amoore'i manni uulla ki'nnuwwina uwweena Gibxi uulliinsi ki'nnuwwa fissummo; uulli udma'annem sor hiincho awwonsummo.

¹¹Ki'nnuwwi goo'n oosiinsi hiraagaano, harde'uwwiinsim Naaziraawe'e[1] ki'isummo; Isra'ee'l minaadaba, kuk hanqayyonnihe? An Waa'i kaka wocaammo.

¹²Ihukkaarem ki'nnuwwi Naaziraawe'uwwina woyi'n diqaasa agissakka'a huushissakko'o; hiraagaanom hiraago woccambee'isa hoottakko'o.

¹³Ee bikkina kee'mmaalli hurbaata iyyiisakko'i faraxxi gaare'i hance'u luwwa iiqansoohaannisa ki'nnuwwam iiqansoommo.

¹⁴Erisa geettam keenim gibba'a xottamoyyo; malaayyaam kee'nnekim wod hoogookko; gaadaanim ixxuwwi gaga gatixxiteena xantamoyyo.

¹⁵Xiyya darabbam keenim beyyonne qoxxita'a uulliteena xantamoyyo; erisa geettam mannim gibba'a xotteena xantamoyyo; faradaanim ixxuwwi gaga gatixxiteena xantamoyyo.

¹⁶Ee balla qoxar gaadaan o'l mu'uta ubbussu'uuyyi gibbamo» yoolla. Kaka wocukkok Waa'a.