Read Hadiyya Amoox Kitaaba 3 Bible Online

Amoox Kitaaba 3 - Hadiyya bible

Amoox Kitaaba 3

¹Isra'ee'l minaadaba, Gibxiinsi fissu Waa'i minaadab hundinam

²«Heer uulli minaadab hundiinsim xale'i ki'nnuwwa doo'llummo; ee bikkina ki'nnuwwi baaxiilina hundinam ki'nnuwwa guzumo'oommo» yoolla.

³Hanqinam lam manchi shiinnaatantoo'n maqire taakke'lleena xantamonnihe?

⁴Hobbichchi itoo luwwa siidoo'n doo'm woronne muunoohonnihe? Hobbichchi geexdu ma'lluwwa amadoo'n yoo beyyonne muunoohonnihe?

⁵Cii'ichchi qaashakkobee'i kiyyo'onne amadamoohonnihe? Kiyyodu mat luwwa amadoo'nnim chokaatoohonnihe?

⁶Orina xurumbi beero'onne fugamoo ammane baa'oobee'i manni hee'oohonnihe? Waa'i bi'isoo'n beero'i bi'oohonnihe?

⁷Hanqinam Moollanni Waa'i issoo luwwa ixxi awwaadaan ikko'i hiraagaanina caakkisoo'n maaxaa maham issooyyo.

⁸Hobbichchi muunoohaare baddoobee'i manchi ayyette? Moollanni Waa'i wocoohaare hiraago wocoobee'ek ayyette?

⁹Ashdoodannee Gibxannee yoo girbuwwanne hee'oo keenina hundinam «Samaare'i duunnuwwanne wixxitakka'a ee beero'i woronne yoo damigoo hambalaachchanchaa moo'llehe» yitakka'a alallaattehe.

¹⁰Waa'i «Ku minaadab er baxo baximma la'ukkoyyo; malaayyinnee damiginnee wixxaa'u amaxxa minenne wonshaakko.

¹¹Ee bikkina diina'i ixxuwwi uulla kibbookko; girbuwwam gindaa minneewwa bogookko» yoolla.

¹²Waa'i «Samaare'i uullanne hee'oo Isra'ee'l minaadab iiqamu ara'ik lokkii hoffi iiqammi ara'i kollii xale'i gatoo'isa ihookko; oohim allaaraanchi hobbichchi suumiinsi lam lokki shuku'llaa macci ludoo xale'e ubbuusisoohaannisa» yoolla.

¹³Gogoxxi Moollanni Waa'i «Oono'o, kaka macceessehe; Yaaqoob shumo'inam naqqassehe.

¹⁴Isra'ee'l minaadaba ixxuwwi baaxii'l bikkina guzumo'oommi balla Beeteelanne yoo kiti'm beyyuwwa gindansoommo; kiti'm beyyi buudduwwim iiqamaa uullanne ubookko.

¹⁵Hagayyee billee afuutta'a higissam minneewwa hundam gindoommo; daane'i inqinne wereeggisakka'a baxakko'i minneewwi hundim gindamookko; lob minneewwim gindamookko» yoolla.