Read Hadiyya Amoox Kitaaba 5 Bible Online

Amoox Kitaaba 5 - Hadiyya bible

Amoox Kitaaba 5

¹Isra'ee'l minaadaba, ki'nnuwwina soroommisa macceessehe;

²Oono'o, baajaamotte hee'llo'i Isra'eela ubbo'o; la'mmaagge ki'lleena xantamoyyo; hara'mmaa ki'isoo hoogga'a is gaqqi uullannem uunjanto'ookkotan ikko'o.

³Moollanni Waa'i «Mat Isra'ee'l beero'iinsi mat kum gaadaan orina marookko. Ihukkaarem xale'i mat xibbi gaadaan gatookko; mat xibbi gaadaan gaadina firukkaanniinsim xale'i tommi daba'llookko» yukko.

⁴Waa'i «Isra'ee'l minaadaba, i kollonne daba'llehe; foorinne hee'llakkamo.

⁵Otossitakkeena Bersaabe'e mattakkotte; Beeteelam hassakkotte; Gelgelam mattakkotte; mashka'oomim Beeteel gindamaa bi'ookko; Gelgelanne hee'oo minaadabim qeefadamaa marookko» yukko.

⁶Isra'ee'l minaadaba, Waa'i kollonne daba'llehe; foorinnem hee'llakkamo; eebeelas Waa'i ki'nnuwwa gii'llisa ihaa shokkiisookko; Beetee'l mannam giir itookko; ee giiram xoo'isookkok hee'ooyyo.

⁷Oogato boqqissakkam keeninaa minaadaphpheka hanqa bi'issakkam keeninaa aayye!

⁸«Philiyaadiisa» yakkam lamarem boollaankaa «Ooriyoona» yakkam mat beyyonne wixxaakkoo boollaankaa qooccukkok hiimo ballanne, ballam hiimonne dabarookkok dambalaq wo'om iimane fissaa dabaraa uullanne ga'nnisookkok malaayyaammuwwaa ixxuwwi girbuwwaa bi'isookkok ixxotte. Ixxi summim Waa'a!

¹⁰Oogaxxi beyyonne axeeroo mancho sabbakkamo; hanqa wocoo manchom shigigitakkamo.

¹¹Buxa wor amaddakk'aahii ixxuwwi wixxo'i hurbaatam boggakk'aahii cabbaramaa axisamaakkoo kininne mine baxxakko'aarem ee minenne hee'llakkamoyyo; er beyyonne woyina kaassakko'aarem woyi'nneka diqaasa aggakkamoyyo.

¹²Ki'nnuwwik boqqoom hinkaa'nna lophphaakkooda'e, baaxiilim hinkaa'n kee'mmaalli ihuda'e an la'oommo; muccur manna hawwissakko'ookko; maqanxa aa'llakku'uuyyim buxika hanqa oogaxxi beyyi hundannem bi'issakko'ookko.

¹³Eehanniinsi ki'ukkok doolli joraakko; ee bikkina tiiraam manchi sa'ookko.

¹⁴Foorinne hee'llakkeena er baxo baxxehe bagaan jor baxo baxxakkotte; eehamdu issitakkolas ki'nnuwwi yitakko'isam gogoxxi Moollanni Waa'i ki'nnuwwinne maqir ihookko.

¹⁵Jor luwwa sabbehe; er luwwam iittehe; oogaxxi minenne hanqi boqqoobee'isa issehe; ayyi la'ukko gogoxxi Moollanni Waa'i gatto'i Isra'ee'l minaadabina qishixxeena xanookko.

¹⁶Ee bikkina gogoxxi Moollanni Waa'i «Goog hundannee wixxixxi beyyuwwannee aayyee yimmii wi'llii macceesamookko; abuullaanim weeshanta'a sottam keeninne maqirem wi'llitamo.

¹⁷Woyi'n kaashshi beyyi hundannem wi'l ihookko; mashka'oomim an ki'nnuwwa guzumo'eena ki'nnuwwi lambe'inne higoommi bikkinatte» yoolla. Kaka wocukkok Waa'a.

¹⁸Waa'ik balli waaroo'isa egettakkam keenina aayye! Oo balli tuunsi balla bagaan caakki balli ihubee'i bikkina mahina ee balla egettakkamuulla?

¹⁹Oo balli mat manchi hobbichchiinsi gibaa tibbekkichchinne gambayoohaannisa; tibbekkichchiinsim gibaa mine aagaa lasonne anga gortannanne bakkiisu beyyonne hamashshichchi qasu manchisa ihookko.

²⁰Waa'i oogatoo balla ki'nnuwwina tuunsookko bagaan caakkooyyo; oo balli matem caakkim moo'amoobee'i gambabbi tuunsi balli ihookko.

²¹Waa'i «Ki'nnuwwika hiinchi ugudduwwa sabaammo; shigigaammome; otossitakkeena wixxitakkam wixxittuwwim eese liiransukkoyyo.

²²Shokkiisakka'a hincaa'akkam kitimaa hurbaaxxi kitimaa hincaa'llakkota'nnim aa'oommoyyo; galaxxi kitimina hincaa'llakkam di'ir diinaxxi kitimam aa'oommoyyo.

²³Zammattakkam mazmuu'lleka corochcha iinniinsi qeessehe; diitta'i sagaram an macceeseena hasoommoyyo.

²⁴Ee bikkenne hanqo'i oogat daajjisa muccuroomim xoo'oobee'i bu'isa daadona.

²⁵«Isra'ee'l minaadaba, hanqinam sor hiincho hundam udma'i uullanne ki'nnuwwa awwonsummuuyyi iina uwwakkam annanni annanni luwwaa kitimaa hincaa'llakko'i amman yoohonnihe?

²⁶Ihukkaarem ki'nnuwwi gagina baxxakko'i ‹Adila› yitakkam Saakuutaa ‹Keewaana› yitakkam boollaanki waa'aa iyyitakkamo.

²⁷Ee bikkina ki'nnuwwi Damaasqo'i beero'iinsi eeqido qeefadantakka'a mattakkamisa issoommo» yoolla. Kaka wocukkok gogoxxi Moollanni Waa'a.