Read Hadiyya Amoox Kitaaba 6 Bible Online

Amoox Kitaaba 6 - Hadiyya bible

Amoox Kitaaba 6

¹Isra'ee'l minaadab hara'mmatina ixxuwwi awwonsaa'n beyyo waattamo; ihukkaarem ixxuwwi Xiyoonanne makkixxita'a afuuttam bikkinaa Samaare'ennem baachchi bee'e hee'llam bikkinaa ee la'anto'oo awwonsaanina aayye!

²Hino'o, Kaalne'i beero'o mattakka'a moo'llehe; eeheenim lob Haamaat beero'oo Filisxee'm Gaataa mallehe; ixxuwwi ki'nnuwwiinsi lophphitamonnihe? Ee kee'n uuldu ki'nnuwwi uulliinsi lophphoohonnihe?

³Ki'nnuwwi «Bichchi balli gundanne ihooyyo» yitakka'a sawwimminne ki'nnuwwi gassonne damiga gaaggaabissakkamuulla.

⁴Daane'i inqinne baxamaakkoo ara'uwwanne iinse'llakkamo; gereebbi geexxuwwaa lariinsi wo'llaa ittakku'uuyyi gundi ara'uwwanne daabaayyitakkamo.

⁵Maasinqo'inne coro'llakkam keenina, Daawiitisam mazmuu'l mu'uta gudissakkam keenina,

⁶woyi'n diqaasa harachchinne aggakkam keenina, bito xee'aalli shitto'o laphphitakkam keeninaa ihukkaarem Yooseef hawwi bikkina kichche'llakkambee'i keeninaa aayye!

⁷Ee bikkina ki'nnuwwi luxxaaggennem qeefadantakka'a mattakkamo; ki'nnuwwikim faare'llakko'isa hee'llakkam liiranchi bi'ookko.

⁸Gogoxxi Moollanni Waa'i «Isra'ee'l minaadaphpheka bolxooma sabaammo; wereeggissa'a baxxo'i adilla'n minneewwam shigigaammo. Ee bikkina ixxuwwi beero'oo beero'onne hee'oo luwwaa hundam diina'ina higisaa uwwoommo» yaa ixxi gaganne hide'aakko.

⁹Tommi manchi mat minenne gatuta'nnim lehookko.

¹⁰Leto'i keeno ee miniinsi fissaa waammeena waaru qarmanchi ee minenne gatu manchina ‹Kiinninne maqire mulli manni yoohonnihe?› yaa xa'mmookko. Ixxim «Bee'e» yookko. Ee lasage «Sa'ihe, Waa'i summa weeshimmi hasisooyyo»[2] yookko.

¹¹Waa'i ijaajoohaare lob minneewwii hoffi minneewwii hundim gindamookko.

¹²Farad kinanne firiixoohonnihe? Dambalaqdu mirgo'inne abuullakkamonnihe? Ihukkaarem ki'nnuwwi oogatto'o shoo qaraa'llisa hanqam geneeno'isa qaraaraalli issitakko'o.

¹³Loodaabaar[3] beero'o kaa'llakko'i bikkina liirantakko'ookko. Qaarinaayim[4] beero'om ni malaayyinne amandaammo yitakka'a birantakkamuulla.

¹⁴Gogoxxi Moollanni Waa'i «Isra'ee'l minaadaba, ki'nnuwwanne mulli minaadaba ki'isoommo; oo minaadabim hanaa'n qarinne Haamaata aagakkam goociinsi ki'isaa woroo'n qarinne Araba'i cebbi afeebe'e afaa u'nnisookko» yoolla.