Read Hadiyya Amoox Kitaaba 7 Bible Online

Amoox Kitaaba 7 - Hadiyya bible

Amoox Kitaaba 7

¹Moollanni Waa'i ka kaalta iina moo'isukko; adi'l hurbaata murakka'a wixxaa'akka'a lasonne gobbe'i ihaa mutu hurbaatanne qawwaawwi haga'oo'isa Waa'i issukko.

²Oo qawwaawwim uullanne latu luwwi hundam itaa guullukkisa moo'aa «I Moollanni Waa'a! Ki minaadaphphi baaxiilo haafihe; ki minaadab ihu Isra'ee'llek malaayyi hoffan ihu bikkina hinkid ihaa hee'eena xanookko?» yaa uunxummo.

³Waa'im ixxuwwina qishixxaa «Ku moo'llitti luwwi ihooyyo» yukko.

⁴Moollanni Waa'i moo'isu mulli kaalti kane; Moollanni Waa'i ixxi minaadaba giirinne guzumo'eena gudukkisa moo'ummo; giiroomim xillaalli dambalaqa itaa odim uullam itukko.

⁵Ee ammanenne an «Moollanni Waa'a! Ku giir xoo'oo'isa isse; ki minaadab ihu Isra'ee'llek malaayyi hoffan ihu bikkina hinkid ihaa hee'eena xanookko?» yaa uunxummo.

⁶Waa'im ixxuwwina qishixxaa «Ku moo'llitti luwwim ihooyyo» yukko.

⁷Waa'i mulli kaaltam moo'isukko; ixxim tumbe'inne keenakka'a baxakko'oo ooxxi gadanonne tumbe'e amadaa uullaakkoo moo'ummo.

⁸Waa'im «Amooxa, ku moo'lloo luwwi maha?» yaa xa'mmukko. Anim «Tumbe'e» yummo. Waa'im iina «I minaadab ikko'i Isra'eel tumbe'inne keenakka'a baxakkobee'i ooxxisa boqqito'i bikkina ku tumbe'i ixxuwwi boqqooma moo'isoohane; ee bikkina ixxuwwa guzumo'oo'n uroommoyyo.

⁹Yisaaq shumo'i otossitam duunnuwwanne yoo beyyuwwi gindamookko; Isra'ee'l minaadaphphekim keesamaakkoo beyyuwwi gindamaa diihookko; Yoorbi'aam adillanom guullaa bi'isoommo» yukko.

¹⁰Ee lasage Beetee'l qeessichchi Ameesiyaas Isra'ee'l adil Yoorbi'aamina «Oono'o, Amoox Isra'ee'l minaadaba keesenne dollotisoolla; ixxi wocoo woshsha ku uullim iyyaa xanooyyo.

¹¹Ixxim ‹Yoorbi'aam oranne lehookko; Isra'ee'l minaadabim ixxuwwi uulliinsi qeefadanta'a mattamo› yoolla» yaa asse'ukko.

¹²Ameesiyaasim Amooxina «Kaalta moo'lloohaanno, Yihuxxi uulla daba'llitaa mare; ee uullannem hiraago woccittuuyyi ki heechchina ihoo hurbaata uwwakkamaare ite.

¹³Ihukkaarem Beeteel adil otossoohanee minaadabinam keesamaakkoo beyyoo ihu bikkina ka beyyonne la'mmeka hiraago woccoobee'isa» yukko.

¹⁴Amooxim «An gereebba allaaroommanee oda'i misha fee'lloommanee bagaan hiraagaancho te'im hiraagaanchi beetoyyo.

¹⁵Ihukkaarem Waa'i gereebba allaaroommi beyyiinsi weeshaa ‹Mare, i minaadab ikko'i Isra'eelina hiraago woce› yaa ixxi gagoomim ijaajukko.

¹⁶Kabadem Waa'ika sagara macceese; at ‹Isra'eelina hiraago woccitte; Yisaaq shumo'inam alallaattitte› yitaa hoottaatto.

¹⁷Ee bikkina Ameesiyaasa, Waa'i kiina ‹Ki meentichcho ka beero'onne saa'aanchotte ikkamo; kiikki goo'n oosii landii oranne lehookko; ki uullam usinne keenaa allaggi baxxamookko; atim mulli minaadaphphi uullanne letootto; Isra'ee'l minaadabim ixxuwwi uulliinsi qeefadanta'a mulli uulla mattamo› yoolla» yaa dabarukko.