Read Hadiyya Amoox Kitaaba 9 Bible Online

Amoox Kitaaba 9 - Hadiyya bible

Amoox Kitaaba 9

¹Waa'i kitima hincaa'akkam beyyi gadanonne uullaakkoo moo'ummo. Ixxim «I mi'nnek shooho'i heekke'eebe'i afeebe'e utubbuwwa aphphise; iiqansitaatim manni hanenne uboo'isa isse; eehanniinsi gatu keeno an bisa'inne guulloommo; gibukkok xorooyyo; xorukkokim gatooyyo.

²Si'oolanne dillitota'nnim eekke'iinsi i angi fissookko; iimane fittota'nnim eekke'iinsim dilliisoommo.

³Qarmeeloos duunanne fitta'a maaxantota'nnim eekke'iinsi hasaa fissoommo; xilli dambalaq woronne iinniinsi maaxanteena yakitota'nnim eekke'ennem ixxuwwa qasona dambalaq wo'l xara'a ijaajoommo.

⁴Diina'i anganne qeefadanta'a mattota'nnim eekke'em bisa'inne shakkamisa issoommo; ee'isenne an ixxuwwina hara'mmeenatti ihoo'n bi'iseena qoodaammo» yaa ijaajukko.

⁵Gogoxxi Moollanni Waa'i uulla nakkoohaare bukkamookko; uullanne hee'oo luwwi hundim wi'llookko. Abbaayyi daajjim aqqaa humburuqqe'oo'isa uulli shafshafookko.

⁶Ixxi heechchi beyyo iimanenne issukkaannik, iima'n lugumom uullanne kaasukkaannik, dambalaq wo'om uullanne daadoo'isa issukkaannik summi Waa'a.

⁷Waa'i «Isra'ee'l minaadaba, ki'nnuwwi iina Tophphe'i minaadaphphisayyonnihe? Ki'nnuwwa Gibxiinsi fissummisam Filisxee'm minaadaba Qarxeesiinsi, Sooriy minaadabam Qiiriinsi fissummoyyonnihe?

⁸An Moollanni Waa'i boqquwwi ikko'i Isra'ee'l gassaano moo'oommuulla; ixxuwwam uulliinsi bi'isoommo; ihukkaarem Yaaqoob shumo'o guullaa bi'isoommoyyo. Kaka wocummok an Waa'a.

⁹«Isra'ee'l minaadab illaanchonne hurbaata illaansakkamaannisa mulli minaadaphphi lambe'enne binnitamisa issoommo; ihukkaarem bura'iinsi bagaan hurbaatiinsi matim ubooyyo.

¹⁰‹Matem jollim afooyyo te'im neese siidooyyo› yitu'uuyyi i minaadaphphi lambe'enne hee'llam baaxiilaan keen hundim oranne beedditamo» yoolla.

¹¹Waa'i «Gindamaa ubu mini'nnoo'i Daawiit adillano dabaraa uullisoommo; tigu ootam qoxxisoommo; gindamukkokam areesoommo; odim dabaraa illagee'nnisam baxoommo.

¹²Ee'isinne Isra'ee'l minaadab Eedoo'm uulliinsi gatto'i qaxaa mulli uulliinsi i summinne weeshanto'i minaadabaa hundam lago aa'llamo» yoolla kaka issoo Waa'i.

¹³Waa'i «Oono'o, hurbaata muroo manchi muraa guulloo'nnim abuulli agan afookko; woyi'n misha ciinsoo manchi ciinsaa guulloo'nnim woyina kaasakkam amman afookko; eehido'i amman waarookko. Ee ammane duunnuwwiinsi xee'oo woyi'n diqaas firookko; hoffi duunnuwwiinsim woyi'n diqaas daadookko.

¹⁴I minaadab Isra'eela ixxuwwi gaqqi uulla dabaraa woroommo; gindamu beero'uwwam dabatta'a baxxa'a eekke'enne hee'llamo; woyi'n kaashsha kaassa'atim diqaasa aggamo. Annanni annanni duubbi kaashsha kaassa'atim mishsha ittamo.

¹⁵I minaadab Isra'eela ixxuwwina uwwummi uullanne hee'llamisa issoommo; ee uulla od fatakita'a mattamoyyo» yoolla. Kaka wocukkok ki'nnuwwina Moollanni Waa'a.