Read Hadiyya Abdiy kitaaba 1 Bible Online

Abdiy kitaaba 1 - Hadiyya bible

Abdiy kitaaba 1

¹Moollanni Waa'i Eedoo'm bikkina Abdiyina moo'isu kaaltanne Waa'i Abdiya asse'aa «Eedoo'm uulla qassona minaadaphphi beyyo asse'amaancho asse'aammo» yoo asso macceensummo.

²Waa'i Edoom ina «Oono'o, an keese mulli minaadaphphi lambe'enne hoogaanchi issoommo; lobakata gadantaattoohanem ikkootto.

³Qoxxaalli kininne girbamaakkoo beero'onne hee'lloohaanno, ki heechchi beyyom duunnuwwanne issitaa ‹Ka beyyiinsi eese ayyi dilliiseena xanookko?› yitaa ki wodanonne bolxitaatto.

⁴Ihukkaarem gaaqichchisa iim barattittaare ki heechchi beyyom boollaanki lambe'enne issittaare an keese ee beyyiinsi dilliisoommo. Kaka wocummok an Waa'a.

⁵«Gamaan te'im bogaan hiimonne waaruta'n ixxuwwina ihoo qax xale'e massookko; woyi'n mishsha feeroo keenim hofqax misham gatisookko; ihukkaarem ki diina'i keese guullaa bi'isookko.

⁶Eesa'a hinkaa'nna bogamukko; maaxu amaxdu hinkaa'nna maxaramukko!

⁷Hidi'l sagara aaggo'i ki besh keese laggo'o; ki uulliinsim fissita'a hollito'o; ki kobim kiina diina'i ikko'o. Ki hurbaata maqire itto'i ki besh kiina shikka guddito'o; ihukkaarem oo hundim keesenne ihukkuuyyi at laqqittoyyo.

⁸«Ee balla Eedoomiinsi qoolluwwa Eesa'i duuniinsim qoorooma bi'isoommo.

⁹Eedoomanne hee'llam manni hundim letamo; Teemaa'n geedduwwim baachchinne huxe'llamo.

¹⁰«Yaaqoobina shumo'i hee'llo'i kiyyabbaayyuwwa barche'e issitaa shitti bikkina sholle'llootto; heer heerinam bi'llootto.

¹¹Ixxuwwi diina'i gooccuwwa iiqansita'a ixxuwwika amaxxa hundam boggo'i balla at haxonne uullitaa moo'llam hee'llitto. Yerusaaleema saamo issaqqanta'a baxxanto'i manniinsi mahinnem e'llitooyyo.

¹²Yihuxxi uullanne hee'llam kiyyabbaayyuwwanne afu hawwonne at liiramimmi hasisam hee'ukkoyyo; ixxuwwina bichchi ballanne liiranteenaa ixxuwwi u'n ballannem ixxuwwanne osatteenaa hasisam hee'ukkoyyo.

¹³Ixxuwwi hawwi ballanne i minaadaphphi beero'o aagimmi u'n ballannem ixxuwwi bichchanne liiramimmi bichchi ballannem ixxuwwi amaxxa bogimmi kiina hasisam hee'ukkoyyo.

¹⁴Giboo keeno shiteena lamejjanne duggaa egerimmi gatto'i qaxam ixxuwwi hawwi ballanne diina'ina higissaa uuwwimmi hasisam hee'ukkoyyo.

¹⁵«An Waa'i mulli minaadab hundannem oogatoommi balli afaakko; Eedooma! At baxxitti baxika bito siixxitootto; baxxoo jor bax keesennem daba'llaa ihookko.

¹⁶I minaadab Keesamaakkoo duunanne hawwi humbullo agaakko; ihukkaarem ee kululleetanne yo'i mulli minaadab hundim eehanniinsi lophphoo hawwi humbullo aggamo; aggo'i keen hundim bi'llamo.

¹⁷«Xiyoo'n duunanne bichchiinsi xotta'a gattam kee'nnek mat mat hee'llamo; Xiyoonim keesamaakkoohan ihookko; Yaaqoob shumo'im ixxuwwi gaqqi uulla lagaa'llamo.

¹⁸Yaaqoob shumo'i gii'llisa, Yooseef shumo'i laba'nnisa, Eesa'i shumo'i bura'isa ikkamo; giir bura'a itoo'isa Yaaqoob shumo'ii Yooseef shumo'ii Eesa'i shumo'o bi'issamo. Kaka wocummok an Waa'a.

¹⁹«Woroo'n qarinne yoo Yihuxxi minaadab Eedoo'm uulla lagaa'llamo; eelliinchi aagginne yoo duunnuwwi lugu'm qaala'i mannim Filisxee'm uulla, Efireem uullaa Samaare'i uullaa lagaa'llamo; Biiniyaam sullim Gala'aaxxi uulla lagaa'llamo.

²⁰Qeefadanta'a hee'llam hanaa'n qa'l Isra'eel Hoola yakkam uulliinsi daba'llita'a Kaani'aa'n uulla Saraphphitanne afeebe'e lagaa'llamo; Qeefadanta'a Safaaraadiimanne hee'llam Yerusaalee'm minaadabim woroo'n qarinne yoo beero'uwwa lagaa'llamo.

²¹Gatto'i Yerusaalee'm minaadab Xiyoo'n duunanne ikka'a Eedooma gassitamo; Adillanim Waa'an ihookko» yoolla.