Read Hadiyya Yoonaas Kitaaba 1 Bible Online

Yoonaas Kitaaba 1 - Hadiyya bible

Yoonaas Kitaaba 1

¹Waa'i Amiitaay beet Yoonaasina

²«Qaqqissaa lob beero'o Naanaawe'e mare; mattaa an ee beero'ika jolla moo'ummi bikkina kiina kuroommi sagara alallaate» yukko.

³Ihukkaarem Yoonaas Waa'i illagiinsi gibeena sawwaa Tarseesa mareena ki'ukko; Iyyoophe'em dillaa eekke'iinsi Tarseesa maroo markaba siidukko; mareenam bito miqaa markabanne aagukko; ixxekim sawwit Waa'iinsi gibimmi hee'ukko.

⁴Ihukkaarem Waa'i dambalaqanne kee'mmaalli hambu'llam ki'isukko; dambalaqannem ki'u hambu'llam malaayyaam ihu bikkina markaboom iiqameena ihukko.

⁵Markaphphi woronne hee'llo'i mannim lobakata baa'llo'i bikkina annannichchim ixxi waa'i kollonne laarukko. Markaphphi woronne kee'mmu luwwa sholliisseena sawwita'a woronne yoo mu'uta fissita'a dambalaqanne uunjito'o. Ihukkaarem Yoonaas markaphphaannonne woroo'n baxxanchanne dillaa lobakata diriiraa hee'ukko.

⁶Ee markaphphi awwonsaanchi Yoonaas beyyo maraa «Mahina diriittaate? Ki'llaa ki waa'a uunxe; ayyi la'ukko qishixxaa ni foore gatiseena xanookko» yukko.

⁷Markaphphi woronne hee'llo'i manni hundim ixxuwwina'i ixxuwwim «Ku u'nnisoo hawwi ayyi mashka'inne waaruda'e lanqoommisina waallehe saamo issaqqammona» yito'o. Saamo issaqqanto'aarem saam Yoonaasina firukko.

⁸Ee bikkina ixxuwwi Yoonaasina «Hino'o kure! Ku u'nnisoo hawwi neesenne afukkok ayyi mashka'innette? Ki bax maruchcho? Waattittok hanniinsette? Ki uulli hanno? At ayyi mancho?» yita'a xa'mmito'o.

⁹Yoonaasim ixxuwwina «An uullaa dambalaqaa qooccu iima'n Waa'ina otossoommi Ibrokkichcho» yaa dabarukko.

¹⁰Yoonaasim Waa'iinsi maaxameena gibukkisa ixxuwwina gaassaatim kuraa hee'u bikkina lobakata baddita'a «Kido'i luchcho mahina issitto?» yito'o.

¹¹Ixxuwwim hambu'llam lophphukkuuyyi maru bikkina baa'lla'a «Ku hambu'llam uroo'isina neese keese ma'issino?» yita'a Yoonaasa xa'mmito'o.

¹²Yoonaasim ixxuwwina «Ku malaayyaam hambu'llam ki'ukkok i mashka'innette ihukkisa an la'aammo; ee bikkina eese dambalaqanne darabbakko'aare ku hambu'llam urookko» yukko.

¹³Ihukkaarem ixxuwwi markabooma tochcho afisseena lobakata yakito'o; ihona bagaan hambu'llam lobakata malaayyukkuuyyi maru bikkina xanto'oyyo.

¹⁴Ee bikkina ixxuwwi «Moollanni Waa'a! Ka manchi foo'l mashka'inne neese bi'issitte; ka muccur manchik xiig neesenne ihoone. Waa'a, at doo'llittoka issitaatto» yita'a Waa'a uunxito'o.

¹⁵Ee lasage Yoonaasa ki'issa'a dambalaqanne darabbo'aare oo hambu'llam ki'isu dambalaq wo'i moor urukko.

¹⁶Ee bikkina oo manni Waa'a lobakata baddita'a Waa'ina kitima hincaa'llo'o; uga'am uwwiteena sagara aaggo'o.

¹⁷Waa'i mat geejji qurxummekkichcho Yoonaasa liqicoo'isina gudisukko; qurxummekkichchim Yoonaasa liqicukko; Yoonaasim sas ballaa sas hiimoo qurxummekkichchi godabonne hee'ukko.