Read Hadiyya Yoonaas Kitaaba 4 Bible Online

Yoonaas Kitaaba 4 - Hadiyya bible

Yoonaas Kitaaba 4

¹Yoonaas ee woshshanne liiramubee'i bikkina gancarukko.

²Ixxim «Waa'a! At kaka issitoo'isa i uullanne hee'ummuuyyim wocaa hee'ummoyyonnihe? Ki illagiinsi gibaa Tarseesa mareena sawwummokim ee bikkinatte. At biijaallaa haafitoohanee, iyyaqqaa qishixxitoohane, heer heerina hee'oo ki iittinnem wo'mmitaattoohanee ki quunqiinsi daba'llitaa haafitoo Waa'aa ikkittisa la'oommi bikkinatte hee'ukko.

³Kabadem Moollanna, he'i eese shihe; hee'immiinsi iina lehimmi e'llookko» yaa uunxukko.

⁴Waa'im «Kaa'nna gancatteena kiina laboohonnihe?» yukko.

⁵Ee ammane Yoonaasim beero'i woriinsi firaa beero'iinsi eelliinchi firoo kollinne daasa baxaa hafanne afuuraa hee'ukko; eekke'ennem ihaa Naanaawe'enne ihoo luwwa egeraa hee'ukko.

⁶Yoonaasina haf ihaa eelliinchi iibbiinsi gatisona Moollanni Waa'i mat qoomcho mutisaa buyyoom Yoonaas horooriinsi hanaan ihoo'isa issukko; Yoonaasim ee hafa siixxu bikkina lobakata liiramukko.

⁷Ihukkaarem la'm balli daram ee qoomcho qasaa gokkisoo'isina Waa'i daquuchcho gudisukko. Oo daquuchchim ee qoomcho itukko; oo qoomchim gogukko.

⁸Eelliinchi firaa lasage shokkiisoo hafachcha eelliinchi firoo kolliinsi Waa'i asse'ukko; eelliinchikim iibbi Yoonaas horoore shokkiisu bikkina lobakata hoogaa «Ka heechchiinsi leh erane» yaa mixukko.

⁹Ihukkaarem Waa'i Yoonaasina «At ka qoomchi bikkina gancarimmi hasisoohonnihe?» yukko. Yoonaasim dabaraa «Gancarimmiinsim lehoomqaxa gancarimmi hasisookko» yukko.

¹⁰Waa'im «Mat ballanne mutaa mat ballanne gogu at kaassibee'aanninaa li'issibee'i qoomchinaa kaa'nna kichche'llaatto.

¹¹Eehaara'i an joraa erokaa annanni issita'a laqqambee'i xibbiinsii lamiyyi kumiinsii hanaan ikkam mannii lobakat fooraam diinatii yoo lob Naanaawe'i beero'ina qishixximmi hasisooyyonnihe?» yukko.