Read Hadiyya Xiqqi Kitaaba 10 Bible Online

Xiqqi Kitaaba 10 - Hadiyya bible

Xiqqi Kitaaba 10

¹Waa'i Muse'ena

²«Isra'ee'l minaadaba wixxaa'lleenaa wiiddanto'i beyyiinsim dooyyitona kutteenaa lam xurumba tumamaakkoo kin birinne baxe.

³Lamem xurumbim fugamoo ammane minaadab hundim Keesammi Dukkaa'n gooccanne ki gadanonne wixxitona.

⁴Ihukkaarem xurumbik mat fugamoo ammane Isra'ee'l sulli awwonsaan xale'i ki gadanonne wixxitona.

⁵Xurumbi shiqaakkoo sagarinne fugamoo ammane eelliinchi firinne wiiddanto'i sulli dooyyitona.

⁶Xurumbi la'mmaagge shiqaakkoo sagarinne fugamoo ammane odim woroo'n qaranne wiiddanto'i sulli dooyyitona. Xurumbi shiqqeen sagarinne fuganchi dooyya asheerimmina mare'i ihookko.

⁷Minaadaba wixxaa'immina xurumbi hoffi sagarinne fugamona.

⁸Ee xurumbuwwa fuggamok qeessuwwi ikko'i Aaroon ooso. Oohim ki'nnuwwi oos oosonne afeebe'e heer heerina hee'oo seera.

⁹Ki'nnuwwi uullanne ki'nnuwwinne uullixxamoo diina'inne orantakkeena fittakkam ammane sagara iimaa'llakka'a ee xurumbuwwa fuggehe; ee ammane an ki'nnuwwi Moollanni Waa'i ki'nnuwwa sawwoommo; ki'nnuwwi diina'iinsim gatisoommo.

¹⁰Ee'isam ki'nnuwwi liirantakkam aga'n aaggi ugudanne, qoodamaakkoo annanni annanni ugudduwwannee ee'isam shokkiisakka'a hincaa'akkam kitimaa mateeyyoo'm kitimaa hincaa'llakkam ammanee ee xurumbuwwa fuggehe. Oo xurumbuwwim ki'nnuwwa iina tiissiissoohan ihookko. An Waa'i ki'nnuwwina Moollanna» yukko.

¹¹Isra'ee'l oos Gibxiinsi fitto'i la'm hiinchonne, la'm agan aagu lammiyyi ballanne Keesammi Dukkaa'n haniinsi duub ki'ukko.

¹²Isra'ee'l oosim moolli moollisinne Siina'i udma'i uulliinsi ki'lla'a matto'o; duubim Faaraa'n udma'i uullanne uullukko.

¹³Isra'ee'l oos Waa'i Muse'ena uwwu ijaaccisinne luxxi ammi'n dooyya asheetto'o.

¹⁴Yihuxxi sulli baxxanchi ixxuwwi mare'isanne gaassaa dooyyukko; ixxuwwi awwonsaanchim Aminaadaab beet Na'aasoonatte hee'ukko.

¹⁵Yisaakoor sulli awwonsaanchi Xu'aar beet Naatinaa'eelatti hee'ukko

¹⁶Zaabiloon sulli awwonsaanchi Heeloon beet Eeli'aabatti hee'ukko.

¹⁷Ee lasage Dukkaanim ki'ukko; ee Dukkaanam Gershoonikii Meeraar moollii iyyita'a dooyyito'o.

¹⁸Roobeel sulli baxxanchi ixxuwwi mare'isanne awwonta'a dooyyito'o; ixxuwwi awwonsaanchim Sadiyoor beet Eelxuuratti hee'ukko.

¹⁹Simi'oon sulli awwonsaanchi Xurishaadaay beet Shalumi'eelatti hee'ukko.

²⁰Gaad sulli awwonsaanchi Raagu'eel beet Eeliyaasaafatti hee'ukko.

²¹Ee lasage Leewi'i sulli ihu Qa'aat moolli keesammi mu'uta iyyaa dooyyukko; ixxuwwi affeebe'em Dukkaan kaasamaa hee'ukko.

²²Ee lasage Efireem sulli ixxuwwi mare'isanne awwonaa dooyyukko; ixxuwwi awwonsaanchim Amhuud beet Eelshaama'atti hee'ukko.

²³Minaas sulli gogoxxi awwonsaanchi Phedaaxuur beet Gamaali'eeletti hee'ukko.

²⁴Biiniyaam sulli awwonsaanchi Giidi'oon beet Abiidaanatti hee'ukko.

²⁵Lasaanchonnem Daan sulli ixxuwwi mare'isinnee hundem baxxanchinam afare egeraanni ihimminnee lasaanchonne dooyyukko; ixxuwwi awwonsaanchim Amiishaadaay beet Ahi'eezeratti hee'ukko.

²⁶Aseer sulli awwonsaanchi Okiraan beet Faagi'ii'eelatti hee'ukko.

²⁷Niftaaleem sulli awwonsaanchi Eenaan beet Ahii'ira'atti hee'ukko.

²⁸Isra'ee'l oos wiiddanto'i beyyiinsi ixxuwwi baxxanchisinne awwo'nnanta'a dooyyitamok ee'isinnetti hee'ukko.

²⁹Muse'e ixxena balli hee'u Miidiyaa'm uulli Raagu'eel beet Hoobaabina «Oono'o, Waa'i niina uwweena sagara aagu uulla malleena ki'nnaammo; Waa'i Isra'eelina er neeyyaxxi sagara aagu bikkina at niinninne maqire masse; neesem kiina er luwwa hundam issinoommo» yukko.

³⁰Hoobaabim dabaraa «An qaramummi uullaa i moolli beyyoo daba'llaa maroommo bagaan ihooyyo» yukko.

³¹Muse'em «He'i neese uttaa mattitte; niina udma'i uullanne hinke'enne wiiddanim hasisooda'e laqqootto; googom awwonsitootto.

³²At niinninne maqire mattittaare Waa'i niina issoo danaam luwwiinsi hundiinsim neesem kiina issinnommo» yukko.

³³Minaadabim Waa'i duun yoo Siina'i udma'i uulliinsi ki'lla'a sas balli googo matto'o; Waa'ik Hidi'l Saga'l Saaxin wiiddantam beyyo moo'iseena ee sasem ballam ixxuwwa higaa illaginne maram hee'ukko.

³⁴Wiiddanto'i beyyi hundiinsim ki'llam ammane Waa'ik duub balli balla haf iham hee'ukko.

³⁵Hidi'l Saga'l Saaxin mareena mikmikoo amman hundam Muse'e «Waa'a, ki'e; ki diina'i binnihona. Keese saboo keenim ki illagiinsi gibona» yam hee'ukko.

³⁶Hidi'l Saga'l Saaxinim uulloo ammane «Waa'a! Lobakat kumaa kaakumaa ihoo Isra'ee'l kolli daba'lle» yam hee'ukko.