Read Hadiyya Xiqqi Kitaaba 11 Bible Online

Xiqqi Kitaaba 11 - Hadiyya bible

Xiqqi Kitaaba 11

¹Minaadabim afu hawwi bikkina Waa'anne qunquunimma asheetto'o; Waa'im eekka macceesaa lobakata quuqu bikkina ixxuwwi lambe'enne itoo giira asse'ukko; oo giirim ixxuwwi wiiddanta'a yo'i beyyi tochchika hofqaxam itukko.

²Minaadabim Muse'e kolli laatto'o; Muse'em Waa'a uunxukko; giirim xoo'ukko.

³Waa'ik giir ixxuwwi lambe'enne aphphu bikkina ee beyyik summi «Taabi'eera»[1] yamamukko.

⁴Isra'ee'l oosinne maqirem dooyyitam hee'llo'i mulli minaadab maara itteena lobakata hassa'a hee'llo'o; Isra'ee'l oosim «Intoommi maara niina ayyi uwwookko?

⁵Gibxanne hee'nnummi ammane maham minqoo'n hansummisa intam hee'nnummi qurxumme'e tiillummo; eekke'enne hee'nnummi ammane intam hee'nnummok dabaqula, habaaba, kurata, shunkuruttaa tumaa hee'ukko.

⁶Ihukkaarem kaba ni orachchi gogaa ni malaayyi hoogaakko; balli hundam moo'nnoommok ka maanna'a bagaan mulli luwwi bee'e» yitu'uuyyi wi'llimma asheetto'o.

⁷Maanna'im leeyya laboo baar hagar ihaa wordimaa'm mishi'nnoo'i goottokkichcha'i hee'ukko.

⁸Minaadabim do'ukkuuyyi feeraa liitimmanne liitaa te'im mooyye'enne tumaa lasage qure'enne hufaa'aa saram hee'ukko; oohim wee'l zaytinne cukkakka'a sarakko'i qorosho'isa xee'oohan hee'ukko.

⁹Hiimonne qiibat wiiddananne dilloo ammane maanna'im dillam hee'ukko.

¹⁰Minaadab hundim ixxuwwi gaqqi Dukkaa'n gooccanne abaroosinne abaroosinnem uullita'a wi'llitu'uuyyi Muse'e macceesukko. Waa'im ixxuwwanne lobakata quuqaa hee'u bikkina Muse'e u'nnamukko.

¹¹Muse'em Waa'ina «Eesenne ki awwaadaanchonne kiddo'i kee'mmaalli hawwo mahina eebbitto? Eesennem liirantibee'ek mahinatte? Ka minaadaphpheka hundikam iyyo mahina i hanenne iyyiissitto?

¹²Gaassi anno'ina uwwiteena sagara aaggitti uulla aageebe'i afeebe'e ka minaadabina hundinam awwonsaanchi issita'a ciilluwwa ‹Li'issamaantesa qaaphphe› yitoottok mahinatte? Hanqinam an ka manna hundam i goosanne uumaatennihe? Te'im qaraatennihe?

¹³‹Intoommi maara niina uwwe!› yitu'uuyyi i beyyo waatta'a wi'llitamuulli ihu bikkina ka manninna hundinam ihoo maara an hanniinsi eebbonatte?

¹⁴Iina lobakata kee'mmaakkoo bikkina an kaa'n minaadaba hundam mullam awwonseena xanoommoyyo.

¹⁵Ka'isa issitoohaanniinsi ki illagenne nuura siidaammoohaa'lleensi eesenne afoo hawwo moo'oo'n he'i eese shihe» yukko.

¹⁶Waa'im Muse'ena «Isra'ee'l minaadabiinsi awwonsimminne la'anto'oo lamarayyi lommanna doo'lle; ixxuwwam wixxa'llaa Keesammi Dukkaa'n beyyo wottaa ki gadanonne uullitonna.

¹⁷Anim eekkeen dillaa kiinninne atooraroommo; kiina uwwummi Ayyaaniinsim massaa ixxuwwanne issoommo; ee lasage ka minaadaba awwonsimminne at mulla hawwitoobee'isa ixxuwwi kiina hara'mmitamo.

¹⁸Odim minaadabina ‹Intoommi maara niina ayyi uwwokko? Gibxanne hee'nnummi amman niina e'llam hee'ukko› yitakku'uuyyi wi'llitakko'oka Waa'i macceesu bikkina soodina ki'nnuwwi gaga muccussehe. Waa'i ki'nnuwwina maara uwwoo bikkina ittakkamo.

¹⁹Ittakkamokim mat ballina te'im lam ballina te'im onti ballina te'im tommi ballina te'im lamiyyi ballinayyo.

²⁰Ihukkaarem ki'nnuwwi lambe'enne yoo Waa'a gaddakka'a «Gibxiinsi mahina fillummo› yitakka'a ixxi illagenne wi'llitakko'i bikkina ki'nnuwwi saninne fireebe'ee ceentakkeebe'ee mat agan hundam ittakkammo› yoolla yitaa kure» yukko.

²¹Muse'em Waa'ina «Onno'o, an yoommok loh xibbi kum lokkaa'n lambe'ennette; atim mat agana hundam ittam maara uwwoommo yitaa sagara aaggaatto.

²²Eehannah hinkaa'n lar, gereebbii fella'ii duramukkaare ixxuwwa goddiseena xannookko? Te'im Dambalaq woronne yoo qurxumme'i hundim wixxuta'n iheena xanoohonnihe?» yukko.

²³Waa'im Muse'ena «Hanqoomam iikki Waa'ik angi gundannihe? An woccummi sagar wo'mmoo'isaa wo'mmoobee'isaa kaba moo'llootto!» yaa dabarukko.

²⁴Muse'em Firaa Waa'i yukkoka hundam minaadabina kurukko. Minaadaphphi awwonsaaniinsim lamarayyi mancho wiixxaa'aa Keesammi Dukkaa'n kululleetanne uullitamisa issukko.

²⁵Waa'im duubinne dillaa Muse'ena wocukko. Muse'enne hee'u Ayyaaniinsim massaa lamarayyem lommannannem dilliisukko. Oo Ayyaanim ixxuwwanne dillaa lasage sagara iimaa'lla'a hiraago wocco'o. Ihukkaarem ee lasage od eedda'a wocco'oyyo.

²⁶Doo'llanto'i lamarayyi Awwonsaaniinsi Eeldaadii Meedaadii lamim Dukkaa'n beyyo mattoo'nnim ambanne hossa'a hee'llo'o. Ixxuwwim ambanne hee'llo'isam ixxuwwannem Ayyaan dillukkaare ambanne hee'llo'isam hiraago wocco'o.

²⁷Mat woraadichchim Muse'e beyyo geerukkuuyyi maraa «Eeldaadii Meedaadii ambanne hiraago woccamuulla» yaa kurukko.

²⁸Woraadda'n doolliinsim ki'isaa Muse'ena hara'mmaanchi hee'u Naawe'i beet Iyyaas «I Moollanni Muse, wocceena hoore!» yukko.

²⁹Muse'em «At i bikkina to'achchitaatennihe? Waa'i minaadab hundim hiraagaan ihuta'nnii Waa'im ixxuwwanne ixxi Ayyaana dilliisuta'nnii iina liirancha!» yukko.

³⁰Ee lasage Muse'ee Isra'ee'l lamarayyem awwonsaanii wiidda'n beyyo daba'llita'a matto'o.

³¹Dangonnem Waa'i dambalaqiinsi wiidda'n beyyo heedoora laboo cii'a eeboo hafachcha asse'ukko. Oo heedoora laboo cii'im uulliinsi lam anga ihoo qaxa iim shiqaa bararukkuuyyi waarukko; ee wiidda'n kululleetanne heedoora laboo cii'i tuubamu beyyi mat balli gooqqi qax hee'ukko.

³²Minaadabim ee balla, ee hiimoo eehanniinsi la'm ballaa ki'lla'a heedoora laboo cii'a wixxaa'llo'o. Tommi sananniinsi hoffiisaa wixxaa'ukkok hee'ukkoyyo. Eeham gokkisimmina wiidda'n kululleetanne fitiissam hee'llo'o.

³³Ihukkaarem maar ixxuwwi inqenne hee'ukkisam iicca'a liqicitoo'nnim Waa'i quunqi ixxuwwi hanenne ihukko; malaayyaam boobaninnem lobakata aphphisukko.

³⁴Ee beyyik summi «Mixa'n waamma» yamammukko. Mashka'oomim maa'l mixa'n mashka'inne lobakat manna ee beyyonne waammita'a hee'llo'i bikkinatte.

³⁵Minaadabim ee beyyiinsi Haxeeroota Matta'a ee beyyonne wiiddanto'o.