Read Hadiyya Xiqqi Kitaaba 12 Bible Online

Xiqqi Kitaaba 12 - Hadiyya bible

Xiqqi Kitaaba 12

¹Muse'e Tophphe'i uulliinsi meento eebaa hee'u bikkina is mashka'inne Maaraamee Aaroonii Muse'ena

²«Waa'i wocukkok xale'i Muse'enattennihe? Niindu wocukkoyyonnihe?» yamukko. Waa'im ixxuwwi wocamu luwwi hundam macceesukko.

³Muse'em uullanne hee'oo manni hundiinsim lophphaa maashaalli manchi hee'ukko.

⁴Dangonnem Waa'i Muse'e, Aaroonaa Maaraamee «Ki'nnuwwi sasim Keesammi Dukkaa'n beyyo waallehe» yukko. Ixxuwwim matto'o.

⁵Waa'im utuphphisa uullaakkoo duubinne dillaa Dukkaa'n goocanne uullukko. Aaroonaa Maaraamem weeshukko. Ixxuwwim ixxi illagenne hincito'o.

⁶Waa'im ixxuwwina «I sagara macceessehe! Ki'nnuwwi lambe'enne hiraagaanchi hee'ulas An Waa'i ixxena kaaltinne caakkaa moo'amoommo; haqaawwinnem atoorassoommo.

⁷Ihukkaarem i agishshi Muse'e ee'isayyo; ixxi i minenne hundannem amma'nnamaakkoohane.

⁸An ixxena illagenne moo'amaa i sagarinne wocoommo bagaan maaxaqqanne wocoommoyyo; ixxi iikka Waa'ika hagara moo'ookko. Eehannah ki'nnuwwi i agishshi Muse'enne ullixxantakkeena mahina iggitakko'o?» yukko.

⁹Waa'im ixxuwwanne quuqaa ee beyyiinsi marukko.

¹⁰Duubim Dukkaa'n hanniinsi ki'ukko. Maaraamem oddomachchonne firoo baddisoo jabbi amadukko; is orachchim baraxxisa qadaallukko. Aaroonim ise ee jabbinne amadanto'isa moo'ukko.

¹¹Aaroonim Muse'ena «I moollanna, ni huushanchinne banxummi baaxii'l bikkina ku kee'mmaalli guzumo'i neesenne ihoo'isa issititte.

¹²Isem am godabonne hee'ukkisam lehaa kolli orachchi shamaa lasage qaramu kara labbamisa issititte» yukko.

¹³Muse'em «I Moollanna, he'i ise fayyiise!» yaa Waa'i kolli laarukko.

¹⁴Waa'im Muse'ena «Is anni is illenne anja tuhuta'n tuullinne lamar balli afeebe'e affam hee'llo'oyyonnihe? Kabadem wiidda'n beyyiinsi biiranne lamar balli afeebe'e mullam afuuttona. Ee lasage wiidda'n beyyo daba'lliteena xantamo» yaa dabarukko.

¹⁵Maaraamem lamar ballina wiidda'n beyyiinsi biiranne annanni ikka'a affutto'o. Isem daba'llita'a waatteebe'e minaadab wiidda'n beyyiinsi marukkoyyo.

¹⁶Ee lasage odim minaadab Haxeerootiinsi ki'aa maraa Faaraa'n udma'i uullanne wiiddanukko.