Read Hadiyya Xiqqi Kitaaba 13 Bible Online

Xiqqi Kitaaba 13 - Hadiyya bible

Xiqqi Kitaaba 13

¹Waa'i Muse'ena

²«Tommiinsii lamem Isra'ee'l sulliinsim awwonsaa'nneka mat mato doo'llitaa an Isra'ee'l oosina uwwoommi Kana'aa'n uulla shaashshitona asse'e» yukko.

³Muse'em Waa'i ijaaccisinne Isra'ee'l awwonsaa'nneka tommoo lamoo Faaraa'n udma'iinsi asse'ukko.

⁴Ixxuwwim, Roobeel sulliinsi Zaakur beet Shaamu'atte.

⁵Simi'oon sulliinsi Hoor beet Shaafaaxatte.

⁶Yihuxxi sulliinsi Yaafun beet Kaaleebatte.

⁷Yisaakoor sulliinsi Yooseef beet Yigaalatte.

⁸Efireem sulliinsi Naawe'i beet Hooshe'atte.

⁹Biiniyaam sulliinsi Raafu'i beet Falixatte.

¹⁰Zaabiloon sulliinsi Soode'i beet Gaadu'eelatte.

¹¹Yooseef sulliinsi oohim Minaas sulliinsi Suusi'i beet Gaadi'atte.

¹²Daan sulliinsi Gamaali'i beet Ami'eelatte.

¹³Aseer sulliinsi Mikaa'eel beet Saturatte.

¹⁴Niftaaleem sulliinsi Waafisi'i beet Naahiibattee

¹⁵Gaad sulliinsi Maaki'i beet Ga'u'eelattee hee'llo'o.

¹⁶Uullooma saarayyita'a waattona Muse'e asse'u manni kakeen hee'llo'o. Naawe'i beet Hoshe'ekam «Iyyaasu» yaa summa dabassukko.

¹⁷Muse'em Kana'aana shaashshitona asse'u ammane Ixxuwwina «Woroo'n qarinne aa'llakka'a duunaam uullanne fillehe.

¹⁸Uulloom hinkido'anda'e, hinkaa'n manni hee'oohanda'e, ee uullanne hee'llam mannim malaayyaammuwwi te'im hoogaanda'e,

¹⁹ixxuwwi hee'llam uulli danaamda'e te'im jorda'e ihukkisaa minaadaboom hee'llamok matem oot bee'i hegeegguwwannetda'e te'im girbamaakkoo beero'uwwannetda'ee ihukkisa saarayyehe.

²⁰Uulli harishda'e te'im haqqi yoohanda'e bee'anda'e moo'llehe. Ee uullannem hee'oo haqqi mishiinsi ammaddakka'a waallehe; qoxxehe» yukko. Oo ammanim woyin mishimma asheeraakkoo amman hee'ukko.

²¹Ee bikkina oo manni hanaa'n qara matta'a woroo'n qarinne yoo Xiin udma'i uulliinsi ki'issa'a Haamaata daba'llamakkam beyyina abbis ihu Rahoob afeebe'e shaashshito'o.

²²Gaassita'a woroo'n qarinne yoo uulli kolli matta'a Keebiroona waatto'o; oo Keebiroonim «Anaaqiima» yakkam geejji manni shumo'i ikko'i Ahimaanik, Sheeshaayikii Taalmaay shumo'ii hee'llam beero'i hee'ukko. Keebiroon baxamukkok Gibxi uullanne «Xoo'aana» yakkam beero'i baxameena lamar hiinchiinsi gaassaatette.

²³Ee beyyo higga'a Eshkoo'l cebba affo'o. Ee beyyiinsim shogaam woyi'nneka mat caafa mutto'o. Oohim mat manchi mulla iyyeena xanoobee'i kee'mmaalli ihu bikkina lam manchi wonnanninne gudumonne iyyito'o. Ixxenne maqirem oroomaanikaa oda'ikaa misha edda'a amadda'a waatto'o.

²⁴Isra'ee'l oos ee beyyiinsi woyi'nneka shoga mutto'i bikkina ee beyyika summa «Eshkoo'l cebba» yito'o.

²⁵Oo mannim uullooma sor ayyaamo shaashshita'a lasage daba'llito'o.

²⁶Faaraa'n udma'i uullanne Qaadeesanne Muse'e, Aaroonii Isra'ee'l minaadabii hundim yo'i beyyo daba'llito'o. Ixxuwwim moo'llo'oka hundam ixxuwwinaa minaadabinaa kutto'o. Eebbo'i misham moo'isso'o.

²⁷Muse'enam «At asse'llitti uulla mallaa moo'nnaammo. Oo uullim adii marabii wo'mmaakkoohane; ee uulli mishim kido'ane.

²⁸Ihukkaarem ee uullanne hee'llam minaadab lobakata malaayyaammuwwa. Ixxuwwi beero'uwwim geejjuwwaa girbamaakkoo keenoo. Eehanniinsi hundiinsim lobakata baddissam Anaaq shumo'o moo'nnaammo.

²⁹Ee uullannem woroo'n qarinne Amaaleeq manni, duunaam uullannem Hiite'ik, Iyyaabuusikii Amoore'i mannii hee'llaman ihaa Kana'aa'n manni odim Yoordaanoos daajji gammalannee Meedeteraaniyaa'n dambalaq gammalanne hee'llamo» yita'a kutto'o.

³⁰Ihukkaarem Kaaleeb ee minaadaba Muse'e illagenne sa'itamisa issaa «Fillona! Ee uullam lago aa'nnona; mashka'oomim ixxuwwa kaa'nneena xannoommi malaayyi niina yookko» yukko.

³¹Ihukkaarem Kaaleebinne matta'a hee'llo'i manni «Neese ee minaadabinne uullixammeena hore'em xannoommoyyo. Mashka'oomim ixxuwwi niinniinsi malaayyaammuwwa» yito'o.

³²Odim shaashshita'a moo'llo'i uulli bikkina Isra'ee'l oosina wocco'i woshshi neeyyato mussiisoohan hee'ukko. Odim «Neese do'nnaa moo'nnummi uulli manna itoohane; eekke'em moo'nnummi manni hundim lobakata qeera'lluwwa.

³³Odim Neefiliim moolliinsetti ikko'i Anaaq shumo'o eekke'e moo'nnaammo. Neesem ixxuwwi illaggenne ni gaga moo'aqqinoommaare kochcha'nnisa hee'nnummo. Ixxuwwim neese ee'isinne moo'lloo'n uttamoyyo» yito'o.