Read Hadiyya Xiqqi Kitaaba 14 Bible Online

Xiqqi Kitaaba 14 - Hadiyya bible

Xiqqi Kitaaba 14

¹Minaadabim ee hiimo hundoomam sagara iimaa'aa laarukkuuyyii wi'llukkuuyyii garukko.

²Muse'ennee Aaroonannee ki'lla'a «Gibxanne hee'nnummi ammane te'im ka udma'i uullanne lenaammoota'n niina eran hee'ukko!

³Waa'i ee uulla massoollak mahinatte? Oranne bisa'inne beeddinonannihe? Ni meentii oosim qeefadamookko; Gibxa daba'llinummaare e'llooyyonnihe?» yitu'uuyyi quunquunto'o.

⁴Ixxuwwina'i ixxuwwim «Waallehe! Neese awwonsoo mancho do'llinaa Gibxa daba'llinona» yaqqanto'o.

⁵Ee bikkina Muse'ee Aaroonii hundem Isra'ee'l minaadaphphi dummichchi illagenne uullanne aad heeshito'o.

⁶Ee uullam shaashshitona asse'anto'i manniinsi lam Naawe'i beet Iyyaasii Yaafun beet Kaaleebii kichche'lla'a ixxuwwi eddechcha dereetto'o.

⁷Isra'ee'l oosinam «Neese do'nnaa moo'nnummi uulli lobakata danaam uulla.

⁸Waa'i neesenne liiramaakkoohan ihulas neese ee uulla massookko. Adii marabii wo'mmaakkoo ee harish uulla niina uwwookko.

⁹Ihukkaarem Waa'anne boqqitakkotte; ee uulli manna badditakkotte. Injee'llisa issinaa ulloommo; ixxuwwik haf ki'aakko; ni Waa'i niinninnetti ihu bikkina hore'em badditakkotte» yito'o.

¹⁰Ihukkaarem minaadab ixxuwwa kinninne aphphissa'a shiteena a'llanto'o. Ee ammanenne Waa'i lombi Isra'ee'l oosina hundinam Keesammi DukkaaDukkaa'n hanenne caakkaa moo'amukko.

¹¹Waa'i Muse'ena «Ku minaadab eese gadookkok hinkiballi afeebe'e? Dut mare'e ixxuwwi illagenne issummaarem eese amma'nnoobee'ek hinkiballi afeebe'e?

¹²Oono'o, an ixxuwwa boobaninne aphphisoommo; Keesem Ixxuwwiinsi lophphoo malaayyaam minaadabina anni issoommo» yukko.

¹³Ihukkaarem Muse'e Waa'ina «Ka minaadaba Gibxi uulliinsi ki malaayyinne at fissitaatto; eehidimdu ixxuwwanne issitoohan ihulas Gibxi uulli manni macceessamo.

¹⁴Ee hundam ka uulli mannina kuttamo; ka uulli manni at Waa'i niinninnetti ikkittisaa ki duub niina haf ihu ammane at caakkitaa moo'antittisaa, balla uttuphphisa uullaakkoo duubinne hiimo odim gii'l utubinne ni illaginne mattittuuyyi awwonsittisaa gaassita'ahim macceesso'ookko.

¹⁵Kaba ka ki minaadaba hundam guullittaare kiikka sado macceesso'i mulli minaadab hundim

¹⁶‹Uwweena sagar aagu uulla afiseena xanubee'i bikkina guullukko› yitamo.

¹⁷Ee bikkina Moollanna, ki malaayye niina moo'issona uunxoommo. Odim at

¹⁸‹Waa'i iyyaqqa, uratii iittii lobakata; baaxiiloo boqqoomaa haafoohane. Ihukkaarem anno'i baaxii'l bikkina sas qaranchiinsi soor qaranchi afeebe'e oosoo oos oosoo guzumo'oommo› yitaa woccitti neeyyaxxi sagara wonshe.

¹⁹Kabadem Moollanna, lobakataa dabassamoobee'anee ihu ki iitinne ka minaadaba Gibxiinsi fissittaanniinsi ki'isaa kaballi afeebe'e haafittisam kabadem ka minaadaphpheka baaxiilo haafitona uunxoommo» yukko.

²⁰Waa'im «At xa'mmittisinnem haafaammo.

²¹Ihukkaarem an hee'oommanee i lombim uulli hundannem wo'mmaakkoohanee ihukkisam

²²Gibxannee udma'i uullannee ixxuwwina moo'isummi i lombaa agannaa moo'lla'a minaadaphphek matim lombaa moo'isummi maalalsiisoo agannaa hundam moo'lla'a lasage eese tommi kore keenta'a iina ijaajancha sabbo'i ka manniinsi matim ee uulla aageena foorinne hee'ooyyo.

²³Ee bikkina ixxuwwi anno'ina uwwoommo yaa sagara aagummi uulla hore'em aaggamoyyo. Eese gadu keenniinsi matim ee uulla hore'em aagooyyo.

²⁴Ihukkaarem iina awwaadaanchi ihu Kaaleebanne annanni ayyaan yoo bikkinaa ixxim eese qoxxaallisa amma'nnoo bikkinaa ixxi maraa moo'u uulla an ixxena uwwoommo. Ixxi shumo'im ee uulla lago aa'ookko.

²⁵Kaba Amaaleeq mannii Kana'aa'n mannii cebbuwwanne yo'i bikkina soodo laso daba'llitakka'a Ertiira'i Dambalaq gammala massoo googinne udma'i uulla mallehe» yaa dabarukko.

²⁶Waa'i Muse'enaa Aarooninaa

²⁷«Ku boqqi minaadab eesenne qunquunookkok hinki balli afeebe'e? Isra'ee'l oos eesenne qunquunoo qunquunimma an macceesaammo.

²⁸Ee bikkina ixxuwwina ‹Ki'nnuwwi xa'mmitakko'isinnem ki'nnuwwanne issoomman ihukkisa hee'oo i summinne hide'oommo. An Waa'i kaka wocaammo.

²⁹Xigamu xiqqisanne ki'nnuwwi umur lamyi hiincho te'im eehanniinsi hanaan ihukkaannikii eesenne qunquunukkaanikii hundikim leesh ka udma'i uullanne ubookko.

³⁰Ee uulla aaggakka'a hee'llakkona an i anga biddiqaa'aa hide'ummi uulla Yaafun beet Kaaleebiinsii Naawe'i beet Iyyaasiinsii bagaan hanqoomam ki'nnuwwiinsi matichchim aagooyyo.

³¹Ki'nnuwwi ni oos qeefadanta'a gattamo yitakka'a woccakko'ookko. Ihukkaarem an ixxuwwa ki'nnuwwi gaddakko'i ee uulla aagga'a lago aa'llamisa issoommo.

³²Ihukkaarem ki'nnuwwi leesh ka udma'i uullanne ubaa gatookko.

³³Ki'nnuwwanne amma'nnat bee'immiinsi ki'ukkok ki'nnuwwiinsi lasaanchi manchi uulli udma'anne leheebe'i afeebe'e ki'nnuwwi oos sor hiinchi hundam kee'mmaalli hawwo aa'ukkuuyyi ka udma'i uullanne karkaadookko.

³⁴Ki'nnuwwi baaxii'l mashka'inne sor hiincho hundam hawwitakkamo. Oohim ee uulla shaashshitakko'i sorem ballim ki'nnuwwina mat balli mat hiinchisa ihookko. Ee ammane eesenne boqqimmi ki'nnuwwina hinkaa'n hawwo eebooda'e qoossitakkamo.

³⁵Eesenne mat ihaa ki'u ka boqqi minaadabanne eekka hundam an issoommo; ka udma'i uullanne hundichchim leta'a beedditamo. An Waa'i kaka wocaammo» yukko.

³⁶Muse'e uulla shaashshitona asse'ukkaare matta'a daba'llita'a waatto'i keeniinsi ee uulli bikkina jor woshsha kutta'a minaadab Muse'enne qunquunoo'isa issito'i keen

³⁷Waa'i illagenne boobaninne leto'o.

³⁸Ee uulla shaashshiteena matto'i manniinsi foorinne gatto'ok Naawe'i beet Iyyaasottee Yaafun beet Kaaleebattee hee'llo'o.

³⁹Waa'i yukkoka Isra'ee'l oosina hundinam Muse'e kuru ammanenne lobakata kichche'llo'o.

⁴⁰La'm balla daram duunaam uulla matteena ki'llo'o. Ixxuwwim «Neese hawwondaammo; Waa'i neeyyato aagu uullam malleena gundaammo» yito'o.

⁴¹Ihukkaarem Muse'e «Kabadem Waa'ina ijaajantakkambee'ek mahinatte? Ki'nnuwwi sawwitakko'isa ihooyyo.

⁴²Waa'i ki'nnuwwinne bee'i bikkina diina'i ki'nnuwwa aphphisoobee'isa mattakkotte.

⁴³Amaaleeqikii Kana'aa'n mannii ki'nnuwwi illagenne yo'i bikkina bisa'inne beedditakkamo. Mashka'oomam Waa'a awwonimma sabbakko'i bikkina ixxi ki'nnuwwinne maqire ihooyyo» yukko.

⁴⁴Ihukkaarem Waa'ik Hidi'l Saga'l Saaxinii Muse'ee wiidda'n beyyiinsi ki'lloo'nnim duunaam uulla matteena iggimminne ki'llo'o.

⁴⁵Ee duunam uullannem hee'llam Amaaleeqikii Kana'aa'n mannii dillita'a qasso'o. Hormaam afeebe'em hollito'o.