Read Hadiyya Xiqqi Kitaaba 15 Bible Online

Xiqqi Kitaaba 15 - Hadiyya bible

Xiqqi Kitaaba 15

¹Waa'i Muse'ena

²«Isra'ee'l oosina ‹An ki'nnuwwina uwwoommi uulla aaggakkam ammane

³Shokkiisakka'a hincaa'akkam kitima te'im aagakko'i uga'ina hincaa'akkam kitima gaqqi doo'llinne hincaa'akkam kitima te'im losamaakkoo ugudduwwanne hincaa'akkam enji iina mishisoohan ihona lariinsi te'im gereebbiinsi iina hincaa'llehe.

⁴Eehido'i kitima hincaa'oo ayyim mat leetiro'i soo'l suum wee'l zaytinne cukkamaakkoo mat kiilo'i er qama hurbaaxxi kitim issaa hincaa'ona.

⁵Ee'isam shokkiisakka'a hincaa'akkam te'im mulli kitimina hincoo geex ambulluwwinne annannichchinnem aggi kitimina ihoo mat leetiro'i soo'l suum woyi'n diqaasa hincaa'llehe.

⁶Gereechchi ambul kitim ihaa hincoo ammane odim mat liitiro'oo kolloo ihoo wee'l zaytinne cukkamaakkoo lam kiilo'i er qama hincaa'llehe.

⁷Aggi kitimina ihoo mat liitiro'i saxxi suume ihoo woyi'n diqaasa hincaa'llehe; oohim eese liiransoo enje'oo enji ihaa hincihona.

⁸Uga'i bikkina, te'im mateeyyoo'm kiti'm bikkina mat labeena shokkiisakka'a hincaa'akkam kitimina

⁹liitiro'i kolli wee'l zaytinne cukkamaakkoo sas kiillo'i er qama hurbaaxxi kitim ihona hincaa'llehe.

¹⁰Ee'isam liitiro'i kollo ihoo woyi'n diqaasa aggi kitim ihona hinccaa'llehe; oohim enji eese liiransoo shokkiisakka'a hincaa'akkam kitima.

¹¹« ‹Ee'isinne mat labeeninne te'im gereechchi ambulinne te'im gereechchaanninne te'im fellakkichchi geex ambulinne hincoo hurbaaxxi kitim kane.

¹²Kitimina hincoo diinat matiinsi hanaan ihulas hincoo hurbaaxxi kitimim ee'isam exximmi hasisookko.

¹³Ee uullanne qaramu Isra'eel hundim enji Waa'a liiransoo hurbaaxxi kitima hincaa'oo ammane ee hundam issimmi hasisookko.

¹⁴Ki'nnuwwinne hee'oo waaraan te'im waaroo ki'nnuwwi qaranchinne ayyim hee'ulas Waa'ina inje'oo hurbaaxxi kitima giirinne hincaa'eena hasulas ee ki'nnuwwi issitakkamisa ixxim issimmi hasisookko.

¹⁵Ki'nnuwwinaa ki'nnuwwinne hee'oo waaraaninaa ku seer heer heerina gudaanchoominne egeranchi hasisookko. Ki'nnuwwii ki'nnuwwinne hee'oo waaraanii hundim Waa'i illagenne gudo.

¹⁶Ki'nnuwwinaa ki'nnuwwinne hee'oo waaraaninaa hundinam seerii gattii gudaancho› yitaa kure» yukko.

¹⁷Waa'i Muse'ena

¹⁸«Isra'ee'l oosina ‹An ki'nnuwwa awwonsaa massoommi uulla aaggakkam ammane

¹⁹ee uulli atootiinsi ittakkam ammane ee atootiinsi ludo iina Waa'ina kitim issitakka'a hincaa'llehe.

²⁰Oohim gaassaa liitamu haareechchi hurbaaxxi qamiinsi qorosho'o sattakka'a oodo'iinsi hincoo hurbaaxxi kiti'mmisa issitakka'a iina hincaa'llehe.

²¹Waaroo doollenne hundannem haareechchi hurbaatiinsi liitissakkam luxxi balli qamiinsi sattakkam qorosho'iinsi iina Waa'ina annanni kitim ihaa hincimmi hasisookko.

²²«Ki'nnuwwi lachchoonginne an Waa'i Muse'ena uwwummi seeriinsi mato ginditakkolas

²³te'im ki'nnuwwi shumo'i an Waa'i Muse'enne ihaa ijaajummi ijaajina ijaajamubeelas

²⁴Oo huushanchim ihukkok minaadaphphi lachchoonginnetti ihulas oo minaadab hundim mat labeena hurbaaxxi kitiminnee aggi kitiminnee maqirem enji eese Waa'a liiransoohan ihona shokkiisakka'a hincaa'akkam kitima hincaa'ona. Ee'isam baaxii'l haafitina mat fellakkichchi ambula kitim issaa hincaa'ona.

²⁵Qeessichchim hundem Isra'ee'l minaadabinam haafissiisookko; minaadab huushamukkok la'oo'nnetti ihu bikkinaa baaxii'l haafitina ihoo kitimaa hurbaaxxi kitimaa iina Waa'ina hincaa'llo'i bikkinaa ixxuwwi baaxiil haafamookko.

²⁶Hundim lachchoonginne huushamu bikkina hundem Isra'ee'l minaadabinaa ixxuwwinne hee'oo waaraaninaa baaxiil haafamookko.

²⁷«Ihukkaarem mat manchi la'oo'n baaxiilo baxulas mat hiinchi meentichchi fellakkichcho ixxi baaxii'l haafixxi kitimina hincaa'ona.

²⁸Qeessichchim ee la'oo'n baaxiilo baxu manchika baaxiilo Waa'i illagenne haafiissiisookko; ee manchi baaxiilim haafamookko.

²⁹Isra'ee'l oosinam ihukko ixxuwwinne hee'oo waaraanina la'oo'n baaxiilo baxoo hundinam ihoo seer kane.

³⁰«Ihukkaarem Isra'ee'l oosiinsettem ihukko waaraaniinsi ayyim iggimminne baaxiilo baxookkok Waa'a sholliisu bikkina hundim minaadabiinsi annanni ihaa bi'ona.

³¹Mashka'oomim ixxi Waa'i sagara gadu bikkinaa ijaajom gindu bikkinaa oo manchi hore'em bi'ona. Ee baaxii'l bikkina xa'mmamookkok ixxi gagame› yihe» yukko.

³²Isra'ee'l minaadab udma'i uullanne hee'llu'uuyyi mat manchi usheexxaxxi ballanne haqqa feerukkuuyyi amadamukko.

³³Oo amaddo'i mannim Isra'eel hundim, Muse'ee Aaroonii yo'i beyyo massitto'o.

³⁴Ixxonnem maha issimmi hasisooda'e caakkaa la'amubee'i bikkina karaxxi minenne egeroo'isa issito'o.

³⁵Ee lasage Waa'i Muse'ena «Oo machi lehona; Isra'ee'l oos hundim wiidda'n beyyiinsi haxonne fissita'a kininne aphphissa'a shitona» yukko.

³⁶Ee bikkina Isra'ee'l oos hundim Waa'i ijaajukkisannem wiidda'n beyyiinsi haxonne fissita'a kininne aphphissa'a shito'o.

³⁷Waa'i Muse'ena

³⁸«Isra'ee'l oosina ‹Ki'nnuwwi eddechchi kasanne shoga axissehe; ixxim shaano'i fatirinne dadamaakkoohan ihona. Eeham waaroo qaranchi hundannem issehe.

³⁹Oo shog Waa'ika ijaajo tiittakkonaa egettakkonaa ee'isam ki'nnuwwi tiironne mixxakko'okaa illi moo'ukkokaa awwontakka'a saa'llakkambee'isa tiissiisoohan ihookko.

⁴⁰I ijaajo hundam sawwitakkonaa egettakkonaa iina ki'nnuwwi Waa'inam keesantakko'oo keen ikkakkonaa oo shog ki'nnuwwi eddechchi kasanne moo'amoohan ihona.

⁴¹An ki'nnuwwina Moollanni Waa'a. An ki'nnuwwina Moollanni iheena Gibxi uulliinsi ki'nnuwwa fissummo. An ki'nnuwwina Moollanni Waa'a› yoolla yitaa kure» yukko.