Read Hadiyya Xiqqi Kitaaba 16 Bible Online

Xiqqi Kitaaba 16 - Hadiyya bible

Xiqqi Kitaaba 16

¹Leewi'i sulliinsitti ihu Qa'aat moollan ihoo Yixi'aar beet Qore'e Roobeel sulliinsetti ihu Eeli'aab oos Daataanii Aberoonii ee'isam Feeleet beet Oonii Muse'enne uullixanto'o.

²Isra'ee'l oosiinsim minaadaphphi awwonsaannek la'anto'oo 250 manchii ixxuwwinne maqirem ki'llo.

³Ixxuwwim Muse'aannonnee Aaroon illagennee wixxita'a «Ku minaadab hundim annannichchim keesamaakkohane. Waa'im ixxuwwinnette. Ki'nnuwwi hore'em higissakko'ookko. Ka Waa'i minaadabanne ki'nnuwwi gaga iimiimaa'llakkamuullak mahinatte?» yito'o.

⁴Muse'em eekka macceesaa lasage uullanne aad heeshukko.

⁵Qore'enaa ixxi awwonaaninaa hundinam «Waa'i ixxan ihukkokii keesamukkokii ayyetda'e ihukkisa sooxxi dara annanni issaa la'issookko. Ixxi doo'llu manchom ixxi kollonne hincoo'isa issookko.

⁶Qore macceese; atii ki awwonaanii soodo mude'uwwa ammaddakka'a waallehe.

⁷Ixxonnem soodo giiraa aduruusaa issitakka'a Waa'i illagenne hincaa'llehe. Waa'i doo'lloo manchi keesamaakkoohan ihookko. Leewi'i ooso, hore'em higissakko'ok ki'nnuwwa!» yukko.

⁸Muse'e odim Qore'ena «Ki'nnuwwi Leewi'i oos macceessehe.

⁹Isra'ee'l Waa'i ki'nnuwwa Isra'ee'l minaadabiinsi annanni issaa ixxi Keesammi Dukkaanannee minaadaphphi illagenne uullitakka'hii awwaaddakkona ixxi kollonne hincaa'u qax ki'nnuwwina ihooyyonnihe?

¹⁰Ixxi keesee kiina abbaayyuwwi ikko'i Leewi'i oosoo ixxi kollonne hincaa'aakko. Ihukkaarem kaba ki'nnuwwi qeessoomanom eddakka'a hassakko'ookko.

¹¹Ee bikkina atii ki awwonaanii mat ikkakka'a ki'llakko'ok Waa'annette. Ixxonne quunquuntakkeena Aaroon ayyette?» yukko.

¹²Ee lasage Muse'e Eeli'aab ooso Daataanaa Aberoonaa weeshisukko. Ihukkaarem ixxuwwi «Waalloommoyyo.

¹³Adii marabii dadoo Gibxi uulliinsi ka udma'anne lenona fissittok ihooyyonnihe? Kaba odim neesenne moollanni ikkeena hassaahinnihe?

¹⁴Harish uullanne neese wotbee'is te'im abuulli uullaa woyi'n kaashshi beyyoo lago'aa'issibee'is la'amaakkoohane. Kaba odim neese qawwiisseena hassaatto. Ee bikkina ki beyyo waalloommoyyo» yito'o.

¹⁵Muse'em lobakata quuqukko. Waa'inam «Ixxuwwika kitima at aa'llitte. An ixxuwwika mat hallichchom massummoyyo. Ixxuwwiinsim mat manchom hawwodummoyyo» yukko.

¹⁶Muse'em Qore'ena «Soodo atii lam xibbii ontayyi ki awwonaanii Keesammi Dukkaa'n beyyo waallehe. Aaroonim eekke'enne hee'ookko.

¹⁷Ki'nnuwwi annannichchim mude'e amaddakka'a waallehe; ee mude'uwwannem aduruusa issehe; lam xibbennee ontayyi mude'uwwannee Waa'i illagenne ki'nnuwwi aduruusa hincaa'llehe; atii Aaroonim ki'nnuwwi aduruusa hincaa'llehe» yukko.

¹⁸Ee bikkina annannichchim mude'enne giiraa aduruusaa issita'a Keesammi Dukkaa'n nafaranne Muse'ennee Aarooninnee maqirem uullito'o.

¹⁹Ee lasage Qore'e ixxi awwonaano hundam wixxaa'aa waaraa Dukkaa'n nafaranne Muse'aannonnee Aaroon illagennee uullukko. Waa'ikim lombi ee manni hundinam Moo'amukko.

²⁰Waa'im Muse'enaa Aarooninaa

²¹«Ka minaadabiinsi annanni ikke'e; an ixxuwwa mexxo'aa'llem bi'isoommo» yukko.

²²Muse'ee Aaroonim uullanne aad heeshita'a «Waa'a, at manni hundinam Waa'a; mat manchi baaxiilina manni hundannem quuqqoohonnihe?» yito'o.

²³Waa'im Muse'ena

²⁴«Qore'aanniinsi, Daataanaanniinsii Aberoon Dukkaa'n gadaniinsii laa'itona minaadabina kure» yukko.

²⁵Ee lasage Muse'e Isra'ee'l awwonsaano amadaa Daataan beyyoo Aberoon beyyoo marukko.

²⁶Minaadabinam «Ka boqqi manni Dukkaa'n gadaniinsi laa'i'llehe. Ixxuwwika maham nakkitakkotte. Eebeelas ki'nnuwwim ixxuwwi baaxii'l mashka'inne beedditakkamo» yukko.

²⁷Ee bikkina minaadab Qore'aanniinsi, Daataanaanniinsii Aberoon dukkaannuwwiinsii qee'llito'o. Daataanii Aberoonim ixxuwwi meentinne, oosinnee ciilluwwinnee maqirem ixxuwwi dukkaannuwwi goocanne uullita'a hee'llo'o.

²⁸Muse'em «Ka hundam issoommok Waa'i asse'ukkaarette bagaan i gagiinsi ihubee'isa kanninne laqqakkammo.

²⁹Ku manni ayyi manchim lehoo'isa letolasii mulli mannanne afookkok xale'i ixxuwwanne afulasii eese Waa'i asse'ukkoyyo.

³⁰Ihukkaarem Waa'i macceesakka'a la'akkambee'i haareechchi luwwa qooccaa foorinne hee'llu'uuyyim si'oolanne dillitona uulli suume fooqaa'aa ixxuwwaa ixxuwwina yoo luwwaa hundam xuuxulas oo manni Waa'inne uullixxanto'an ihukkisa laqqakkamo» yukko.

³¹Muse'e eekka wocaa guullukkisam Daataanii Aberoonii uullita'a hee'llo'i beyyi fooqukko.

³²Ixxuwwa, ixxuwwi abaroosaa ee'isam Qore'e awwonaanoo ixxuwwi amaxxa hundammii xuuxukko.

³³Ee bikkina foorinne hee'llu'uuyyim ixxuwwi amaxxinnem Si'oolanne dillito'o. Uullim ixxuwwi hanenne shiraashiramukko; minaadaphphi lambe'iinsim bi'llo'o.

³⁴Ee beyyonne hee'llo'i Isra'ee'l minaadab hundim ee kee'n laachcha macceessa'a gibbo'o. «Ku uulli neesem xuuxeena xanoo bikkina gimbona!» yitu'uuyyi laatto'o.

³⁵Ee lasage Waa'i giira dilliisaa aduruusa wiriissitam hee'llo'i lam xibbee ontayyi manchoo shokkiisukko.

³⁶Ee lasage Waa'i Muse'ena

³⁷«Aaroon beet Ali'aazar naas xaa'l Mude'uwwa keesammi ihu bikkina giirinne shokkito'i manni beyyiinsi massaa woronne yoo giira qee'lli beyyonne fuqaa'ona kure.

³⁸Mude'uwwi Waa'i illagenne hincu ammane keesammuwwi ihaakko. Ee bikkina ixxuwwi baaxiilinne leto'i mannika mude'uwwa xaamsitaa caraqisimminne kiti'm beyyonne goolabe; oohim Isra'ee'l oosina mare'i ihookko» yukko.

³⁹Ee bikkina qeessichchi Ali'aazar giirinne shokku manni hincaa'u naas xaa'l mude'uwwa wixxaa'aa kiti'm beyyonne goolabeena xaamsaa caraqisukko.

⁴⁰Oohim Waa'i Muse'ennetti ihaa ixxo ijaajukkisinnette. Aaroon shumo'iinsette ihubee'i ayyi manchim Waa'i illagenne aduruusa wiriisseena hincimmi hasisoobee'isa Isra'ee'l oosina mare'e. Eebeelas Qore'ennee ixxi awwonaanonnee afukkok ixxonnem afookko.

⁴¹Ee la'm balla daram odim Isra'ee'l minaadab hundim «Ki'nnuwwi Waa'i minaadaba shitakko'ookko» yita'a Muse'ennee Aaroonannee ki'llo'o.

⁴²Muse'ennee Aaroonannee hundim wixxita'a ki'lla'a lasage Keesammi Dukkaa'n kolli daba'llita'a moo'llu'uuyyi duub Keesammi Dukkaana ifiisukko. Waa'i lombim caakkukko.

⁴³Muse'ee Aaroonim Keesammi Dukkaa'n illagenne waatta'a uullito'o.

⁴⁴Waa'im Muse'ena

⁴⁵«Ka minaadabiinsi qee'llitakka'a uullehee. An ixxuwwa mexxo'aa'llem bi'isoommo» yukko. Ixxuwwi lamim uullanne aad heeshito'o.

⁴⁶Muse'em Aaroonina «Ki mude'e massitaa ixxonne kiti'm beyyi giiriinsi isse. Ee giirannem aduruusa isse. Minaadabina haafissiisseena qaqqissaa ixxuwwi mare. Waa'i quuqu bikkina booban asheeraakko» yukko.

⁴⁷Aaroonim Muse'e ijaajukkisannem mude'e amadaa minaadaphphi beyyo geeraa marukko. Ee ammanenne booban minaadaphphi lambe'enne asheeraa hee'ukko; Aaroonim aduruusa wiriissaa minaadabina haafissiisukko.

⁴⁸Ee'isinne booban uulloo'isa issukko. Areenim leto'i kee'nnaannonnee foorinne yoo manni lambe'ennee uullaa hee'ukko.

⁴⁹Ee ammane leto'i mannik xig Qoore'inne maqire boqqita'a beeddito'i manniinsi mulli manna edoo'n 14,700 hee'ukko.

⁵⁰Booban uullaa lasage Aaroon Keesammi Dukkaa'n goocanne hee'u Muse'i beyyo daba'llukko.