Read Hadiyya Xiqqi Kitaaba 17 Bible Online

Xiqqi Kitaaba 17 - Hadiyya bible

Xiqqi Kitaaba 17

¹Waa'i Muse'ena

²«Isra'ee'l minaadab sulli awwonsaaniinsi annannichchiinsim tommoo lam biccoo aa'lla'a kiina uwwitona xa'mme. Annannichchikam summa ixxi bicconnem kitaabe.

³Sulli awwonsaanina annannichchinam mat mat bicci hee'immi hasisso bikkina Leewi'i sulli bicconne Aaroon summa kitaabe.

⁴Ee biccuwwam Keesammi Dukkaa'n woronne an kiinninne atooraroommi Hidi'l Saga'l Saaxi'n illagenne disse.

⁵Ee lasage an do'lloommi manchi bicci latookko. Ee'isinne Isra'eel oos hundi ammanem keesenne quunquuntam qunquunancha bi'isoommo» yukko.

⁶Muse'em eekka Isra'ee'l oosina kurukko. Hundem sulli awwonsaanim ixxuwwi sulli sullinnem tommoo lam biccoo eebba'a uwwitto'o. Aaroon biccim ee biccuwwi lambe'enne hee'ukko.

⁷Muse'em ee biccuwwa hundam aa'aa Hidi'l Saga'l Saaxin yoo Keesammi Dukkaa'n woronne Waa'i illagenne dissukko.

⁸La'm balla daram Muse'e Keesammi Dukkaa'n woro aagoohaare Leewi'i sulli summinne hincu Aaroon bicci quuxo eebaa, lataahii fiitaahii Lawuzika misha mishaahii hee'ukko.

⁹Muse'em ee biccuwwa hundam Waa'i illagiinsi massaa Isra'ee'l oosina hundinam moo'isukko. Ixxuwwim eekka moo'lla'a lasage annannichchim ixxi gaqqi bicco massukko.

¹⁰Waa'im Muse'ena «Aaroon bicco Hidi'l Saga'l Saai'n illagenne dabattaa disse. Isra'ee'l oos eesenne boqqita'a qunquunimma uttobeelas letaman ihukkisa moo'isoohan ihaa hee'ona» yukko.

¹¹Muse'em Waa'i ixxo ijaajukkisannem issukko.

¹²Isra'ee'l oosim Muse'ena «Oono'o neese hundim lenoommo! Bi'nnoommome! Neese hundim bi'nnoommo!

¹³Keesammi Dukkaananne hincookkok hundim lehookko. Hanqinam hundim leneenannihe?» yito'o.