Read Hadiyya Xiqqi Kitaaba 18 Bible Online

Xiqqi Kitaaba 18 - Hadiyya bible

Xiqqi Kitaaba 18

¹Waa'i Aaroon ina «Keesammi Dukkaa'n woronne awwaado moo'oo'isinne ihoo baaxii'l bikkina hundinam atii ki oosii ee'isam Leewi'i oosii xa'mmantakkammo. Qeessooma'n awwaado moo'oo'isinnem ihoo baaxii'l bikkina odim xale'i atii ki oosii xa'mmantakkammo.

²Atii ki oosii Keesammi Dukkaa'n woronne Hidi'l Saaxi'n illagenne awwaaddakkam ammane ki'nnuwwina hara'mmeena kiina moolli ihu Leewi'i sulli kiinninne ihona.

³Ixxuwwim kiina ijaajantu'uuyyi Dukkaananne ihoo awwaado egettona; ihukkaarem ixxuwwii ki'nnuwwii hundim letakkambee'isa Keesammi beyyi mu'utannee kiti'm beyyonnee hincitoone.

⁴Ixxuwwi hundi ammanem ki'nnuwwinne maqire Keesammi Dukkaa'n woronne baxamoo baxo baximmi hasisookko. Mullek Leewwekkichchi ihubee'i ayyi manchim ki'nnuwwi kollonne hincimmi hasisooyyo.

⁵Isra'ee'l oosonne odim i quunqi ihoobee'isa Keesammi beyyikaa kiti'm beyyikaa awwaado xale'i ki'nnuwwi awwaadimmi hasisookko.

⁶Ki'nnuwwi qarmanni ikko'i Leewi'i ooso an Isra'ee'l oos lambe'iinsi doo'llaa massaammo. Ixxuwwim Dukkaa'n woronne baxamoo baxo hundam baxxeena iina annanni ikka'a uwwanto'oo keeno.

⁷Ihukkaarem kiti'm beyyonnee dumiinsi worinne Keesammiinsi Keesammi beyyonnee ihoo qeessooma'n awwaado awwaaddakkamok xale'i atettee ki oosoo. Ookki ki'nnuwwa moo'oohane. Mashka'oomim qeessoomano an ki'nnuwwina sharad issaa uwwaammo; ki'nnuwwiinsi bagaan qeessichchi ihubee'ek ayyim ee beyyo hinculas lehona» yukko.

⁸Ee lasage Aaroonina Waa'i «Isra'ee'l oos iina hincaa'llam shokkoobee'i annanni kitima kiina sharad issaa uwwaammo. Ixxim kiinaa ki shumo'inaa heer heerina sharad ihona uwwaammo.

⁹Hore'em keesammi ihaa iina hincoo kitim hundiinsim oohim hurbaaxxi kitimiinsii baaxii'l haafixxi bikkinaa hawwojji bikkinaa hincoo kitimiinsii shokkoo'n hincoo kitim hundim kiihanee ki oosanee.

¹⁰Eeham keesammi beyyonne ittehe. Ookki keesamma. Goon hundim ittona.

¹¹«Odim Isra'ee'l oos i illagenne wonciwoncaa'llu'uuyyi hincaa'llam kitimmuwwi hundim ki'nnuwwane; ee keeno kiina, ki goo'n oosinaa landinaa waaroo doollenne hundannem sharad ihona uwwaammo. Ki abaroosiinsi muccur ihukkok ayyim iteena xanookko.

¹²«Isra'ee'l oos wee'l zaytiinsi, woyi'n diqaasiinsii hurbaatiinsii iina uwwitam doo'llammi wona an ki'nnuwwina uwwaammo.

¹³Ixxuwwi uulli mishiinsi iina Waa'ina uwwitam won hundim ki'nnuwwan ihu bikkina ki'nnuwwi minenne muccur ihukkok ayyim iteena xanookko.

¹⁴«Isra'eelanne iina annanni ihaa uwwamu luwwi hundim ki'nnuwwan ihookko.

¹⁵«Isra'ee'l oos iina uwwitam mannik te'im fooraam diinaxxek won hundim ki'nnuwwane. Ihukkaarem manni won tissina kin bira aa'llehe. Ee'isam muccur ihubee'i diinaxxi won tissinam kin bira aa'llehe.

¹⁶Qaramukkaanniinsi mat agana ihu ciilluwwa la'amaakkoo bito oohim onti kin bira tisso ee bikkenne aa'llakkeena xantakkamo.

¹⁷La'lleka, gereebbikaa fella'ikaa wona tisso miqakka'a hosisimmi xansiisooyyo; oo keen iina keesamaakkoo keen ihu bikkina hasisookko. Ee kee'n xiiga kiti'm beyyonne wixxehe. Di'iram enji eese Waa'a liiransoo kitim ihona giiranne shokkiissehe.

¹⁸Ee diinaxxi maarim wonceesimminne annanni kitim ihaa hincoo eeddiraasisaa makki lokkisaa ki'nnuwwan ihookko.

¹⁹«Isra'ee'l oos iina annanni issita'a hincaa'llam ki'nnuwwina, ki'nnuwwi goon oosinaa landinaa doolli hundannem hee'oo sharad issaa uwwaammo. Oohim ki'nnuwwinnee ki'nnuwwi shumo'innee aagoommi gindamoobee'i sooqixxi hidiro» yukko.

²⁰Odim Waa'i Aaroonina «Kiina Isra'ee'l uullanne amaxxi ixxuwwi lambe'ennem sharad bee'e. Isra'ee'l oos lambe'enne kiina sharadii gulummii anette.

²¹«Isra'ee'l oos iina uwwitam tommiinsi mato Keesammi Dukkaananne awwaaddam awwaaxxi bikke Leewi'i oosina gulummi issaa uwwaammo.

²²Ka lasage baaxii'l mashka'inne lehinne guzumo'antambee'isa Isra'ee'l oos Keesammi Dukkaa'n kolli hincitoone.

²³Keesammi Dukkaa'n woronne awwaaddamokii ee hawwojji bikkina xa'mmantamokii Leewi'i ooso. Oohim ki'nnuwwi oos oosonne afeebe'e heer heerina hee'oo seera. Leewi'i oosina Isra'ee'l oos lambe'enne ixxuwwi gulummi issita'a a'llitam amaxxi bee'e.

²⁴Isra'ee'l oos iina Waa'ina kitim issita'a hincaa'llam tommiinsi mato Leewi'i oosina ixxuwwi gulummi issaa uwwaammo; an ‹Ixxuwwina Isra'ee'l oos lambe'enne sharad hee'ooyyo› yummok ee bikkinatte» yukko.

²⁵Waa'i Muse'ena

²⁶«Leewi'i oosina ‹An ki'nnuwwina gulummi issaa uwwoommi tommiinsi mato Isra'ee'l oosiinsi aa'llakkam ammane ki'nnuwwim ixxeensi tommiinsi mato annanni issitakka'a Waa'ina hincaa'llehe.

²⁷Oo kitimim ki'nnuwwina oodo'i hurbaatiinsi te'im woyi'n diqaasiinsi hincoo kiti'mmisa xigamookko.

²⁸Ee'isinne ki'nnuwwim Isra'ee'l oosiinsi tommiinsi mato aa'llakkamaanniinsi hundiinsim tommiinsi mato iina Waa'ina kitim issitakka'a hincaa'llehe. Eehanniinsim iina sharad ihu tommiinsi mato qeessichchi Aaroonina uwwitakkamo.

²⁹Ki'nnuwwina uwwamoo luwwi hundiinsim doo'llammaa keesammaa ihukkoka iina Waa'ina hincaa'llehe.

³⁰Doo'llamukkoka iina Waa'ina uwwitakkam ammane abuullaanchi tommiinsi mato uwwaa lasage gatukkok ixxi gaqqan ihoo'isa ki'nnuwwim gatukkoka a'llehe.

³¹Oohim Keesammi Dukkaananne ki'nnuwwi awwaaddakkam awwaadina miqo'i ihu bikkina ki'nnuwwii abaroosinnem hannonnem ittakkeena xantakkamo.

³²Doo'llamaakkookkoka iina Waa'ina hincaa'llaka'a'a lasage ittakkam ammane hawwojji ki'nnuwwanne hee'ooyyo. Ihukkaarem doo'llammi ihukkoka ki'issakkoo'n ee kitimiinsi ittakkolas Isra'ee'l oos keesso'oka haashaassitakkambee'isa ege'llehe. Eekkamdu issitakkolas letakkamo› yoolla yitaa kure» yukko.