Read Hadiyya Xiqqi Kitaaba 19 Bible Online

Xiqqi Kitaaba 19 - Hadiyya bible

Xiqqi Kitaaba 19

¹Waa'i Muse'enaa Aarooninaa an ijaajoommi seer kane

²«Isra'ee'l oos gaanjaqqi issambee'ekaa miiqakkam luwwi bee'i mat kashar addichchoo eebbona kure.

³Ee addichchom qeessichchi Ali'aazarina uwwehe. Ee addichchom wiidda'n beyyiinsi haxonne Ali'aazar illagenne mat manchi durona.

⁴Qeessichchi Ali'aazarim ee addichchi xiigiinsi aa'aa maxxaara cefukkuuyyi keesammi Dukkaa'n illagenne kollonne lamar kore wixona.

⁵Qeessichchi moo'ukkuuyyim oo addichchi hundoomim shokkona; omachchi, maar, xiigii godaphphi mu'ut hundimii shokkona.

⁶Qeessichchim digiphphi haqqa, hiisoophphi caafaa kashar fatiraa massaa addichchi shokkoo giiranne edona.

⁷Ee lasage qeessichchi ixxi eddechchaa orachchoo wo'inne aanshaqqaa wiidda'n beyyo daba'llona. Ihukkaarem uulli hiimeebe'e muccurubee'an ihookko.

⁸Ee addichcho shokkiisu manchim ixxi eddechchaa orachchoo wo'inne aanshaqqona. Ixxim uulli hiimeebe'e muccurubee'an ihookko.

⁹Muccur ihu mulli manchi ee addichchika gii'l buchcha wixxaa'aa wiidda'n beyyiinsi haxonne muccur beyyo moo'aa dissona. Oo beyyim Isra'ee'l minaadaphpheka haashaarancha muccussimmina awwaadoo wo'o gudisimmina hara'mmoohan ihookko. Oo seerim ihookkok baaxiiliinsi muccurimminatte.

¹⁰Gii'l buchcha wixxaa'u manchim ixxi eddechcha aanshona. Ihukkaarem uulli hiimeebe'e muccurubee'an ihookko. Oohim Isra'ee'l oosinaa ixxuwwinne hee'oo waaraaninaa waaroo doolli hundannem qoxxaa hee'oo seer ihookko.

¹¹«Lehu manchika leeshsha nakkoo ayyim lamar ballina haashaarammi ihookko.

¹²Saxxi ballannee lama'l ballannee muccurimmina gudu wo'nne ixxi gaga muccussona. Ee lasage muccur ihookko; saxxi ballannee lama'l ballannee ixxi gaga muccussubeelas muccureena xanooyyo.

¹³Lehu manchika leeshsha nakkaa ixxi gaga muccussubee'ek Waa'ika Keesammi Dukkaana haashaassookko. Oo manchim Isra'ee'l minaadabiinsi annanni ihaa bi'ona. Mashka'oomim muccussoo wo'o ixxi hanenne wixamubee'i bikkina ixxi haashaaramma; ixxi haashaaranchiinsi muccurukkoyyo.

¹⁴«Mat manchi ixxi gaqqi Dukkaa'n woronne lehoo ammane issimmi hasisoo seer kane; mat manchi lehoo ammane ee Dukkaa'n woronne hee'u manchi te'im ee Dukkaa'n woro aagoo manchi lamar ballina haashaarammi ihookko.

¹⁵Ee'isam ee Dukkaa'n woronne ifiishaanchi bee'e hee'oo mu'ut hundim haashaarammi ihookko.

¹⁶Manni te'im jabbi shaa biiranne ubaa yoo leesha te'im lehu mannika miqe te'im waamma nakkookkok ayyim lamar ballina haashaarammi ihookko.

¹⁷«Haashaaramu mancho muccussimmina shokku addichchi gii'l buchchiinsi hoffokam massita'a harachchonne issitona; ixxi hanennem muccur bu'i wo'o issitona.

¹⁸«Ee lasage muccur ihu mulli manchi Hiisoophphi buyya ee wo'onne cefukkuuyyi ee dukkaanannee Dukkaa'n woronne yoo mu'utanne hundannemii ee'isam ee Dukkaa'n woronne yoo mannannee wixona. Ee'isam lehu mannika miqe te'im leesha te'im waamma nakkukkaannonne ayyi manchonnem wixxona.

¹⁹Saxxi ballannee lama'l ballannee muccuru manchi muccurubee'i manchonne wo'o wixona; lama'l ballannem muccussookko; oo muccuroo manchim ixxi orachchoo eddechchaa aanshaqqaa lasage eelliinchi aagoo ammane muccur ihookko.

²⁰«Mat manchi haashaaramaa ixxi gaga muccussubeelas oo manchi Waa'ika Keesammi Dukkaana haashaassaakkoo bikkina minaadabiinsi annanni ihaa bi'ona. Mashka'oomim muccussoo wo'i ixxonne wixamubee'i bikkina haashaaramma.

²¹Ka seera waaroo doolli hundinam egellehe; muccussoo wo'o wixoo manchim ixxi edechcha aanshimmi hasisookko; odim ee muccussoo wo'o nakkookkok ayyim uulli hiimeebe'e haashaarammi ihookko.

²²Muccurubee'i manchi nakkoo luwwi hundim haashaaramaakkoohan ihookko. Odim eekka nakkoo manchim uulli hiimeebe'e haashaaramaakkoohan ihookko» yukko.