Read Hadiyya Xiqqi Kitaaba 20 Bible Online

Xiqqi Kitaaba 20 - Hadiyya bible

Xiqqi Kitaaba 20

¹Isra'ee'l minaadab hundim luxxi agananne Xiin udma'i uulla waatta'a Qaadeesanne wiiddanto'o. Maaraamem eekke'enne leta'a waammanto'o.

²Ee wiidda'n beyyonnem wo'i hee'ubee'i bikkina minaadab wixxaa Muse'ennee Aaroonannee ki'ukko.

³Muse'ennem wocanta'a «Niyyabbaayyuwwi Waa'i illagenne leto'i ammane neesem lenaammoota'n eran hee'ukko.

⁴Waa'ika minaadaba ka udma'i uulla wottakko'ok neese ni diinatinne maqirem keyye beeddinonannihe?

⁵Ka jor uulla wottakkeena neese mahina Gibxiinsi fissitakko'o? Ka beyyonne hurbaat te'im oda'i mish woyin te'im oroomaan bee'e; agakkam wo'im bee'e!» yito'o.

⁶Muse'ee Aaroonim minaadabiinsi annanni ikka'a Keesammi Dukkaa'n gooca matta'a uullanne aad heeshito'o; Waa'ikim lombi caakkaa moo'ammukko.

⁷Waa'im Muse'ena

⁸«Hidi'l Saga'l Saaxi'n illagenne yoo bicco amaddaa Aaroon innem minaadaba hundam wixxaa'llehe; ixxuwwi moo'llu'uuyyim illagenne yoo sifo'i kiniinsi wo'i firona ijaaje. Ee'isinne ee kiiniinsi wo'o fissitootto; ee lasage ixxuwwii ixxuwwi diinatii agookko» yukko.

⁹Ijaajamukkisannem Muse'e Waa'i illagiinsi bicco massukko.

¹⁰Muse'ee Aaroonii Isra'ee'l minaadaba hundam ee ki'n illagenne wixaa'lla'a lasage Muse'e minaadabina «Ka boqqi keeno! Ka kiniinsi ki'nnuwwina wo'o fissinonnihe?» yukko.

¹¹Ee lasage Muse'e anga iimaa'aa biccinne ee kina lam kore aphphisukko. Lobakat wo'im firukkaare mannii diinatii hundim agukko.

¹²Ihukkaarem Waa'i Muse'enaa Aarooninaa «Isra'ee'l minaadaphphi illagenne eese Keesammoomaninne lonsitakkeena amma'nnantakkobee'i bikkina ki'nnuwwina uwweena sagara aagummi uulla ka minaadaba awwonsitakka'a aaggakkamoyyo» yukko.

¹³Isra'ee'l minaadab Waa'inne wocanto'okii Waa'im ixxi keesammoo'm lomba moo'isu beyyi Mariiba yamamu bikkina oo wo'i Mariiphphi wo'o.

¹⁴Muse'e Eedoo'm adilina Qaadeesiinsi asse'amaano asse'ukko. Ixxuwwim «Ki qarmanni ikko'i Isra'eel ‹Neesenne afu hawwi hundam laqqaatto.

¹⁵Gaassi niyyanno'i Gibxa hinkid dillitoda'ee neesem lobakat doolle Gibxanne hee'nnummisaa at laqqootto. Gibxi uulli manni gaassi niyyanno'oo neesee lobakata u'nnisso'ookko.

¹⁶Neesem niina hara'mmona ni Waa'i kollonne laallummaare ni laachcha macceesukko. Ixxi asse'amaancho asse'aa neese Gibxiinsi fissukkaare waallaa at gassitoo uulli gabalanne yoo Qaadees beero'onne yoommine.

¹⁷Ee bikkina hay ki uullinne higise; neesee ni diinatii googiinsi fillaa ki abuulli uullannem ihukko woyi'n kaashshanne aangoommoyyo. Ki wo'i balleewwiinsi wo'o angoommoyyo; ki uulla hingaa mallambe'e adi'l googiinsi bagaan makkannem qeddannem filloommoyyo› yitamuulla» yito'o.

¹⁸Ihukkaarem Eedoo'm uulli manni «Neese ni uullinne higgakka'a mattakkona hansoommoyyo. Ayyi la'ukko ni uullinnemdu higgakkeena waattakkolas neese hundim fillaa ki'nnuwwa bisa'inne qansoommo» yito'o.

¹⁹Odim Isra'ee'l oos ixxuwwina «Neese lob bobba'iinsi hore'em filloommoyyo. Neese te'im ni diinatiinsi matim ki'nnuwwi wo'iinsi angumlas ki'nnuwwina ixxi bikke bito minqoommo. Xale'i lokkinne hancaancaa hingoommi qaxa bagaan mulleka maham hansoommoyyo» yita'a dabatto'o.

²⁰Ihukkaarem Eedoo'm uulli manni «Ihooyyo! Keen hore'em higgakkamoyyo» yaa dabarukko. Malaayyaam o'l gogotam gudissa'a Isra'ee'l minaadabinne oranteena fitto'o.

²¹Eedoo'm uulli manni Isra'ee'l oos ixxuwwi uullinne higgambee'isa hootto'i bikkina Isra'ee'l oos daba'llita'a mulli googinne matto'o.

²²Hundem Isra'ee'l oosim Qaadeesiinsi ki'lla'a Hoo'l duuna affo'o.

²³Oohim Eedoo'm uulli tochchonne hee'oo beyyi hee'ukko. Waa'im ee beyyonne Muse'enaa Aarooninaa

²⁴«Aaroona, an Isra'ee'l oosina uwweena sagara aagummi uulla aagooyyo. Mashka'oomim Mariibanne ki'nnuwwi lamim i ijaajo ginditako'i bikkina Aaroon lehookko.

²⁵Aaroonaa ixxi beeto Ali'aazaraa amaddaa Hoo'l duunanne fire.

²⁶Aaroonim ixxi moolli kollonne wixxoo bikkina ixxi edde'u eddechcha sheelattaa ixxi beetina Ali'aazarina eddeese. Aaroonim eekke'enne lehookko» yukko.

²⁷Muse'em Waa'i ijaajukkoka hundam issukko; hundem minaadabim moo'llu'uuyyi Hoo'l duunanne fitto'o.

²⁸Muse'em Aaroon edde'u qeessooma'n eddechcha sheelataa Ali'aazarina eddeesukko. Aaroonim ee duu'n ludonne lehukko; Muse'ee Ali'aazarim daba'llita'a ee duu'n ludiinsi dillito'o.

²⁹Isra'ee'l minaadabim Aaroon lehukkisa macceesaa sad balla wi'llukko.