Read Hadiyya Xiqqi Kitaaba 21 Bible Online

Xiqqi Kitaaba 21 - Hadiyya bible

Xiqqi Kitaaba 21

¹Woroo'n qa'l Kana'aa'n uullik Araad adil Isra'ee'l oos Ataarii'm kollinne waatto'isa macceesukko; ixxuwwinnem oramaa hofqax mannam qeefadukko.

²Isra'ee'l oosim «Ka minaadaba ni anganne higissaa uwwittaare ixxuwwaa ixxuwwi beero'uwwaa hundam guullinaa bi'insoommo» yita'a Waa'ina uga'a aaggo'o.

³Waa'im ixxuwwi uunxato macceesaa hara'mmu bikkina Kana'aa'n manna kaa'llo'o. Isra'ee'l oosim ixxuwwaa ixxuwwi beero'uwwaa hundam guullita'a bi'isso'o. Ee bikkina ee beyyika summa «Hoorima[2]» yita'a weeshsho'o.

⁴Isra'ee'l oos Eedoo'm uulli tochchinne do'lla'a matteena hasso'i bikkina Hoor duuniinsi ki'lla'a Ertiira'i dambalaq tochchinne massoo googinne matto'o. Ihukkaarem taakki lophphimmiinsi ki'ukkok gancatto'o.

⁵«Itakkam hurbaatii wo'ii bee'i ka udma'i uullanne beeddinona Gibxiinsi neese mahina fissitakko'o? Ka awwaad bee'i hurbaatam ni orachchi ceemaakko» yita'a Waa'annee Muse'ennee ki'llo'o.

⁶Ee lasage Waa'i minaadabanne qubaam hamashsha asse'ukkaare Isra'ee'l oosiinsi lobakata oo hamashshi qasukkaare beeddito'o.

⁷Minaadabim Muse'e beyyo waatta'a «Waa'annee keesennee jor sagara woncaa hawwondaammo. Ka qasoo hamashsha niinniinsi qeessona Waa'a uunxe» yito'o. Muse'em minaadaphphi bikkina Waa'a uunxukko.

⁸Waa'im Muse'ena «Mat hamashshichcho naas xaarinne baxxaa qeeraa'l haqqanne saqale; hamashshi qasukkok ayyim eekka moo'aa gatookko» yukko.

⁹Muse'em naas xaarinne hamashshichcho baxaa haqqanne saqalukko. Hamashshi qasukkok ayyim ee xaa'l hamashshichcho moo'aa gatam hee'ukko.

¹⁰Isra'ee'l oos odim taakko asheetta'a Oobootanne wiiddanto'o.

¹¹Oobootiinsim matta'a Moo'aaphphi uulliinsi eelliinchi firinne yoo udma'i uullanne hee'oo Abaariimanne wiiddanto'o.

¹²Ee beyyiinsim matta'a Zareed cebbanne wiiddanto'o.

¹³Ee beyyiinsim matta'a Amoore'i manni uulli afeebe'e afoo udma'i uullanne yoo Arnoo'n daajji eeqidonne wiiddanto'o. Arnoo'n daajji Moo'aaphphi uullinaa Amoore'i uullinaa lambe'enne hee'oohan ihaa Moo'aabina gabal hee'ukko.

¹⁴Ee bikkina Waa'i awwonsatinne ihu o'l bikkina kuroo aganni kitaabanne «Sufa'anne hee'oo Waaheeb, Arnoo'n cebbaa

¹⁵Eer beero'i afeebe'e afoo Moo'aaphphi uulli tochchi cebbuwwaa» yamamukko.

¹⁶Ee beyyiinsim ki'lla'a Bii'eera matto'o. Oo beyyim Waa'i Muse'ena «Minaadab hundam mat issitaa wixxaa'e. Anim ixxuwwina wo'o Uwwoommo» yaa wocu wo'i ba'l beyyo.

¹⁷Ee ammane Isra'ee'l minaadab «Ate wo'i bu'o, buqbuqaa'llaa wo'o fisse; ki'nnuwwim ixxena zammallehe.

¹⁸Adilla'n biccinnee ixxuwwi biccuwwinnee Daannuwwi hogooffo'ok, minaadaphphi awwonsaanim hinto'i wo'i bu'o» yoo mazmuura zammatto'o. Ee lasage ee udma'i uulliinsi ki'lla'a Maataana matto'o.

¹⁹Maataaniinsi Naahili'eela Naahili'eeliinsi odim Baamoot afeebe'e higga'a matto'o.

²⁰Baamootiinsim ki'lla'a Moo'aabanne yoo cebbi afeebe'e matto'o. Oo cebbim hee'ookkok Phisga'i duu'n lugumonne yoo udma'i uullina illagennette hee'ukko.

²¹Ee lasage Isra'ee'l minaadab Amoore'i mannina adil ihu Siihoon beyyo

²²«Hay neese ki uullinne higse; neesee ni diinatii googiinsi fillaa ki abuulli uulluwwannem ihukko woyi'n kaashshi beyyuwwanne aangoommoyyo; ki wo'i balluwwiinsim wo'o angoommoyyo; ki uulla hingaa malleembe'e adi'l googiinsi bagaanmakkannem qeddannem malloommoyyo» yita'a kuttam asse'amaano asse'llo'o.

²³Ihukkaarem Siihoon ixxi uullinne Isra'ee'l minaadab higeena hoorukko; hore'oomam ixxi gogota wixxaa'aa udma'anne hee'oo Yahaaxa maraa Isra'eelinne oramukko.

²⁴Ihukkaarem Isra'ee'l oos ixxuwwa kaa'llo'o. Arnoo'n daajjiinsi ki'isaa hanaa'n qarinne Amoo'n manni uulli gabal afeebe'e oohim Yaabooq manni daajjenne afeebe'e amaddo'o. Amoo'n manni uulli gabalim girbamaakkoohan ihu bikkina higga'a aaggeena xanto'oyyo.

²⁵Isra'ee'l oosim Haseeboonaa ixxi kululleetanne yoo beero'uwwaa eedda'a Amoore'i manni beero'uwwa hundam amaddo'o. Ee beero'uwwannem afuutto'o.

²⁶Haseeboo'n beero'i Amoore'i uulli adil Siihoon hee'oo beero'i hee'ukko. Ixxim gaassi Moo'aaphphi uulli adilinne oramaa Arnoo'n daajji afeebe'e yoo uulla hundam massaa hee'ukko.

²⁷Ee bikkina mazmuuranne zammaaraan «Haseeboona waallehe; Ku beero'i baxamon! Siihoo'n beero'i areesamonaa.

²⁸Giir Haseebooniinsi labanim Siihoo'n beero'iinsi firukko. Moo'aaphphi Eera bi'isukko; Arnoo'n duunnuwwanne hee'oo gassaanom bi'isukko.

²⁹Moo'aaba, kiina aayye! Kaamoosh minaadaba bi'llakkamo. Ixxi ki'nnuwwika goo'n ooso yaayyanchina landam qeefadanchina Amoore'i manni adil Siihoonina higisaa uwwaakko.

³⁰Ihukkaarem kaba ixxuwwik shumo'im bi'ukko. Haseebooniinsi ki'isaa Diiboon afeebe'e Naashimiinsi ki'isaa Meedaphphi gadanonne yoo Noofa'i afeebe'e hee'llam keen hundim bi'llo'o» yitu'uuyyi zammattam hee'llo'o.

³¹Ee bikkina Isra'ee'l minaadab Amoore'i manni uullanne afuutto'o.

³²Muse'em Ya'izeer beero'o shaashshitam manna asse'aa lasage Isra'ee'l oos ee beero'oo ee beero'i gadanonne yoo hoffi beero'uwwaa hundam massito'o. Eehe'e hee'llam Amoore'i mannam yaayyito'o.

³³Ee lasage lasso daba'llita'a Baasaana massoo googinne aa'lla'a matto'o. Baasaa'n adil Oogim Edira'anne Ixxuwwinne orameena ixxi o'l gogota hundam amadaa firukko.

³⁴Waa'im Muse'ena «An ixxo, ixxi minaadabaa ixxi uullaa hundam kiina higisaa uwwummi bikkina baddititte. Haseeboonanne ihaa gassam hee'u Amoore'i adil Siihoonanne issittoka hundam kannonnem isse» yukko.

³⁵Ee bikkina Isra'ee'l oos Oogaa ixxi oosoo ixxi minaadabaa hundam matom gatissoo'n guullita'a lasage uullooma lago aa'llo'o.