Read Hadiyya Xiqqi Kitaaba 22 Bible Online

Xiqqi Kitaaba 22 - Hadiyya bible

Xiqqi Kitaaba 22

¹Ee lasage Isra'ee'l oos Yoordaanoos daajjiinsi eelliinchi firinne Iyyaarko'i illagenne hee'oo Moo'aaphphi biir beyyonne wiiddanto'o.

²Ee ammane Moo'aaphphi adil hee'u Siifoor beet Baalaaq Isra'ee'l oos Amoore'i mannanne issito'oka hundam moo'ukko.

³Isra'ee'l oosikim xig dut ihu bikkina Moo'aaphphi minaadab lobakata baa'ukko. Isra'ee'l minaadabam lobakata baddito'o.

⁴Moo'aaphphi uulli manni Miidiyaa'm lommannina «Ku ki'nnuwwi moo'llakkam minaadaphphi gogot mat mirgo'i aashaalli hixe guullaa itoo'isa ni kululleetanne yoo luwwa hundam itoo minaadaba» yito'o. Ee bikkina Siifoor beet Maa'aaphphi adil Baalaaq

⁵Aamaawe'i uullanne Efiraaxiis daajji gadanonne Phaatoo'l beero'onne hee'oo Bii'oor beet Baala'aama weeshsham manna asse'ukko. Oo asse'u assim «Gibxiinsi firaakkoo minaadab ka uulla hundoomam ifiisaakko; ni gadanonnem wiiddanaakko.

⁶Ee minaadaphphek xig niihaanniinsi hore'em duta; at waattaa ixxuwwa qange. Ayyi la'ukko ee'isinne an ixxuwwa kaa'eenaa uulliinsim fissaa holleenaa xanoommi ihookko. At maasse'llootok maasse'amoo'isa duuntoottokim duumamoo'isa la'oommo» yoohan hee'ukko.

⁷Ee bikkina Moo'aaphphekii Miidiyaa'mmekii lommanni genno'ina miqakkam bira amadda'a matto'o; Baala'aam beyyom affa'a Baalaaq asse'u asso kutto'o.

⁸Baala'aamim «Kaballa keyye gallehe. Soodo daram Waa'i iina kuroo luwwa hundam an ki'nnuwwina kuroommo» yukko. Ee bikkina Moo'aaphphi awwonsaan Baala'aam beyyonne afuutta'a egetto'o.

⁹Waa'im Baala'aam beyyo waaraa «Ku kiinninne yoo manni mah manna?» yaa xa'mmukko.

¹⁰Ixxim «Moo'aaphphi adil Siifoor beet Baalaaq i beyyo

¹¹‹Gibxiinsi firaa waaraakkoo minaadab uulla hundannem wo'mmaakko. Ee bikkina at waattaa ka minaadaba qangitta'n ayyi la'ukko ixxuwwinne oramaa holleena xanoommi ihookko› yaa i beyyo asse'aakkoo manna» yukko.

¹²Waa'im Baala'aamina «Ee manninne maqire mattitte. Maasse'amaakkoohan ihu bikkina Isra'ee'l minaadaba at duuntitte» yukko.

¹³Baala'aamim ee la'm balla daram Baalaaq asse'u asse'amaa'n beyyo maraa «An ki'nnuwwinne maqire maroombee'isa eese Waa'i hooru bikkina ki'nnuwwi uulla elle'llehe» yukko.

¹⁴Ee bikkina Moo'aaphphi lommanni Baalaaq beyyo daba'llita'a Baala'aam ixxuwwinne waarimma sabukkisa kutto'o.

¹⁵Ee lasage Baalaaq odim illagee'n keeniinsi lombi yoo keenoo dut lommannaa la'm korem asse'ukko.

¹⁶Ixxuwwim Baala'aam beyyo matta'a «I beyyo waatteena hooroo luwwi mahim hee'oone.

¹⁷An kiina lobakat bito miqoommo. At xa'mmitoo luwwa hundam kiina issoommo. Ee bikkina at waattaa hay ka minaadaba qange» yaa Baalaaq asse'ukkisa kutto'o.

¹⁸Ihukkaarem Baala'aam ixxuwwina «Baalaaq ixxi adila'n minenne wo'mmaa hee'oo biraa worqaa hundam uwwuta'nnim I Moollanni Waa'i ijaajiinsi gootto'om ihukko araqa gindeena xanoommoyyo.

¹⁹Ihukkaarem Waa'i iina kuroo luwwi yoohaare la'eembe'e ki'nnuwwim ekee'nnisam keyyem kaballa gallehe» yukko.

²⁰Ee hiimom Waa'i Baala'aam beyyo waaraa «Ku manni ki beyyo waatto'ok ixxuwwinne maqire at exxitaa mattonatti ihaakkoolas mare. Ihukkaarem an kiina kuroommoka xale'e isse» yukko.

²¹Baala'aamim ee la'm balla daram hallichchonne saa'llaa Moo'aaphphi manni awwonsaaninnem marukko.

²²Baala'aam maru bikkina Waa'i ixxonne quuqukko. Baala'aamim hallichchonne saa'llaa lam awwaadaaninne maqire maronam Waa'i asse'amaanchi ixxi illagenne uullaa googo ifiisukko.

²³Waa'i asse'amaanchim bisa'a gudisaa googonne uullukkisa hallichchi moo'aa ee googiinsi firaa abuulli woronne aagukko. Baala'aamim googonne dabareena ee hallichcho lobakata aphphisukko.

²⁴Ee lasage lamem kollinnem woyi'n kaashshi yoo kininne ootamaakkoo xuqqi googonne Waa'i asse'amaanchi waaraa illagenne uullukko.

²⁵Hallichchim Waa'i asse'amaancho moo'u ammanenne ki'n ooxxi kolli hincaa Baala'aam lookko ootanne edaa xiibukko. Baala'aamim eeda lobakata aphphisukko.

²⁶Oo asse'amaanchim higaa maraa hore'em makkannem qeddannem daba'llakkeena xanakkambee'i xuqqi beyyonne uullukko.

²⁷Hallichchim ee beyyonne Waa'i asse'amaancho moo'aa uullanne gii'mmukko. Baala'aamim lobakata quuqaa ee hallichcho biccinne lobakata aphphisukko.

²⁸Ee ammanenne Waa'i hallichchi woccona suume fooqa'ukko. Baala'aaminam «Eese sas kore kaa'n aphphissittok an keese ma'issummaarette?» yukko.

²⁹Baala'aamim dabaraa «Eesenne lobakata lellitti bikkinatte. Anganne bisa'i yoota'n keyyem keese sham hee'ummo» yukko.

³⁰Hallichchim dabaraa «Lobakat doolliinsi ki'isaa kaballi afeebe'e saa'llitam hee'llitti ki hallichchoyyonihe? Hanqinam an ka ballisa ihummi balli yoohonnihe?» yukko. Baala'aamim «Ka'isa ikkaa hore'em laqqooyyo» yukko.

³¹Ee ammanenne Waa'i Baala'aamika ille fooqaa'ukko. Ixxim Waa'i asse'amaanchi bisa'a makkisaa amadaa googonne uullaakkoo moo'ukko. Baala'aamim illillaachcha uullanne heeshukko.

³²Waa'i asse'amaanchi «Ki hallichcho sas kore kaa'nna aphphissittok mahinatte? Ki goog i illagenne boqqi ihu bikkina kiinninne uullixxameena an waaraammo.

³³At saa'llititti hallichchi eese moo'aa sasem korem i illagiinsi laa'ubeeta'n hanqo'isam an kabe'e keese shaa hallichchooma gatisam hee'ummo» yukko.

³⁴Baala'aamim «An baaxiilo baxaammo. At iinninne uullixxanteena googonne uullittisa la'ummoyyo. Kabadem i marimmanne at liirantoobee'an ihulas daba'lloommo» yukko.

³⁵Waa'i asse'amaanchim ixxena dabaraa «Marimmooma ka manninne maqirem mare. Ihukkaarem an kiina kuuroommoka xalle'i woce» yukko. Ee bikkina Baala'aam Baalaaq uulli awwonsaaninne maqirem marukko.

³⁶Baalaaq Baala'aam waaroolli ihukkisa macceesaa ki'aa Moo'aaphphi uulli tochchonne Arnoo'n daajji gadanonne hee'oo Eer beero'onne aa'eena marukko.

³⁷Baalaaqim Baala'aamina «Qaqqissaa waattona asse'aa hee'ummoyyonnihe? Eehaare mahina waattittoyyo? Hanqinqm an kiina bito miqeena xanoombee'eka labissaahinnihe?» yukko.

³⁸Baala'aamim «Kaba waaraammoollayyonnihe? Ihukkaarem iina mah malaayyi yookko? An woceena xanoommok iina Waa'i wocu qax xale'e» yaa dabarukko.

³⁹Ee bikkina Baala'aam Baalaaqinne maqirem Qiiryaat Huxoot beero'o marukko.

⁴⁰Baalaaqim laroo gereebbaa duraa lasage ee maariinsi Baala'aaminaa ixxenne maqire hee'llo'i awwonsaaninaa uwwukko.

⁴¹Ee la'm balla daram Baalaaq Baala'aama Isra'ee'l minaadaphpheka hofqaxam moo'isoo Baamootba'aa'l qoffitenne fissukko.