Read Hadiyya Xiqqi Kitaaba 23 Bible Online

Xiqqi Kitaaba 23 - Hadiyya bible

Xiqqi Kitaaba 23

¹Baala'aamim Baalaaqina «Kiti'm beyyika lamara ka beyyonne iina gudise. Ee'isam lamar mooraa lamar gereebbi ambulluwwaa hincaa'e» yukko.

²Baalaaqim Baala'aam yukkisa issukko; odim ixxuwwi lamim ee kiti'm beyyuwwanne annannichchonnem mat mooraa mat gereechchi ambulaa kitimto'o.

³Ee lasage Baala'aam Baalaaqina «Ayyi la'ukko Waa'i ixxi doo'lla iina kureena waareena xanookko. Ee bikkina an ekke'e maroommo. At eebee'e ka ki kiti'm beyyonne egere. Waa'i iina kuroo luwwa hundam kiina kuroommo» yukko. Ee lasage ixxi mullam mat qoffit beyyo marukko.

⁴Waa'im Baala'aaminne exxukko. Ixxim Waa'ina «Lamar kiti'm beyyo gudisaammo. Ee lamarem kiti'm beyyuwwannem mat mat mooraa mat mat gereechchi ambulaa kitim issaa hincaa'aammo» yukko.

⁵Waa'im Baala'aam Baalaaqina kuroo luwwa wocaa lasage ee beyyom daba'llaa maroo'isa issukko.

⁶Ixxim daba'llaa maroohaare Baalaaq Moo'aaphphi uulli awwonsaaninne hundinnem ee ixxi kiti'm beyyi gadanonnem uullaa hee'ukko.

⁷Baala'aamim kanniinsi woroon yoo hiraago. «Moo'aaphphi uulli adil Baalaaq eelliinchi firinne duunnuwwi hee'oo Sooriyiinsi eese weeshisukko. Ixxim ‹Waare; Yaaqooba qange; Waare; Isra'eelam duume› yukko.

⁸An Waa'i qangubee'eka hinkid qangoommo? Waa'i duumubee'ekdu hinkid duumoommo?

⁹An duu'n ludonne ihaa ixxuwwa moo'ummo; qoffit beyyonnetti ihaatim ixxuwwi bikkina qoossummo; Ixxuwwi mullam hee'llam minaadaba; Ixxuwwi mulli minaadabiinsi annanni keen ikko'isa laqqam minaadaba.

¹⁰Di'llisa xig lophphaakkoo Yaa'qoob shumo'o te'im Isra'ee'l oosika soo'l suumem ayyi xigeena xanookko? Xummaan kee'n leho an lehoommo. I lasaanchim ixxuwwaannisa ihona» yaa hiraagukko.

¹¹Baalaaqim Baala'aamina «At ku issitti luwwi maha? An keese weeshummok i diina'a duuntonatti hee'ukko. Ihukkaarem at ixxuwwa maasse'llitto bagaan maham issittoyyo» yukko.

¹²Ixxim «Waa'i eese woce yukkoka xale'e an wocimmi hasisooyyonnihe?» yukko.

¹³Baalaaqim Baala'aamina «Isra'ee'l oosika hundi ihoo'n xale'e hofqaxooma moo'lleena xantoo mulli beyyo iinninne maqirem mallona; eekke'em ixxuwwa qange» yukko.

¹⁴Ee lasage Phisga'i duu'n ludonne yoo Xoofii'm biira massukko. Eekke'em kiti'm beyyika lamara baxaa annanchonnem mat mat mooraa mat mat gereechchi ambulaa kitimukko.

¹⁵Baala'aamim Baalaaqina «An ekke'e Waa'inne atoorareena maroommo; eebee'e at ka ki kiti'm beyyonne egere» yukko.

¹⁶Waa'im Baala'aaminne eekke'enne exxaa Baalaaqina wocoo woshsha kuraa lasage ixxi beyyo daba'llitaa maroo'isa issukko.

¹⁷Ixxim daba'llaa maroohaare Baalaaq Moo'aaphphi uulli awwonsaaninnem kiti'm beyyi gadanonne uullaa hee'ukko. Baalaaqim Baala'aama Waa'i maha wocuda'e xa'mmukko.

¹⁸Baala'aamim kanniinsi woroon yoo hiraago «Siifoor beet Baalaaqa, kid hincitaa kuroommi woshsha hundam macceese.

¹⁹Qophphano woceena Waa'i mannisayyo. Saxxeenam ixxi manchi beetoyyo. Aagu neeyyato hundam wonshookko. Wocukkoka hundam issookko.

²⁰Eese ijaajukkok maasse'onatte. Ixxi maasse'ukkoka an dabasseena xanoommoyyo.

²¹Yaaqoobanne jor luwwi moo'amukkoyyo. Isra'eelannem hawwi la'ammukkoyyo. Waa'i ixxuwwinnette. Ixxuwwi Moollanni Waa'im ixxuwwinnette. Adi'l ilillaatim ixxuwwi lambe'ennette.

²²Gibxiinsi ixxuwwa fissukkok Waa'a! Ixxuwwikim malaayyi mat buud yoo moochchichchisa.

²³Yaaqoob oosonne kiirat Isra'eelannem genno'i baxooyyo. Kaba Yaaqoobinaa Isra'eelinaa ‹Waa'i issukkoka moo'llehe!› yamamookko.

²⁴Isra'ee'l minaadab meentichchi hobbichchisa ki'ookko. Odim hochchukkoka iteebe'ee shukkaannika xiiga ageebe'ee Usheexxoobee'i hobbichchisa ihaa ki'ookko» hiraagukko.

²⁵Ee lasage Baalaaq Baala'aamina «Eehan ihulas guullitaa duuntitte; te'im guullitaa maasse'llitte» yukko.

²⁶Baala'aamim «Waa'i iina kurukkoka xale'e issoommisa an kiina gaassaa kuraa hee'ummoyyonnihe?» yukko.

²⁷Ee lasage Baalaaq Baala'aamina «Waare mulli beyyo massoommo. Ayyi la'ukko eekke'enne ka minaadaba qangitoo'isina Waa'i doo'l iheena xanookko» yukko.

²⁸Baalaaqim Baala'aama udma'i uulli aad moo'eena xanoo Phee'oor duuna'n ludonne fissukko.

²⁹Baala'aamim «Ka beyyonnem kiti'm beyyika lamara baxe; lamar moolluwwaa lamar gereebbi ambulluwwam gudise» yukko.

³⁰Baalaaqim Baala'aam yukkisanne issukko; lamarem kiti'm beyyonnem lamar moolluwwaa lamar gereebbi ambulluwwaa kitimukko.